च्याम्पियन्स लिग : टोटेनहम प्रभावशाली

घरेलु मैदान वेम्बलीमा डर्टमन्डले पहिलो हाफ नियन्त्रणमा राखेको थियो । तर टोटेनहमका गोलरक्षक ह्युगो लोरिस केही उत्कृष्ट बचाउ गरी आफ्नो स्तरको प्रदर्शन कायम राख्न सफल भए ।

दोस्रो हाफको सुरुमै दक्षिण कोरियाली सन ह्युङ मिनले गोल गरी घरेलु टोलीलाई अग्रता दिलाए । पछिल्लो चार खेलमा उनको चौथो गोल हो भने सिजनको १६ औं गोल हो । डिफेन्डर जान भर्टोगानले दोस्रो गोल गर्दा वैकल्पिक खेलाडी फर्नान्डो लोरेन्टले निर्णायक गोल गरेपछि टोटेनहमको प्रभावशाली नतिजा निस्कियो ।

व्यस्त कार्यतालिकाका बाबजुत पनि सिजनकै उत्कृष्ट प्रदर्शन गर्न सफल भएकोमा प्रशिक्षक पोचेटिनोले सबै खेलाडीलाई बधाई दिए । ‘म सबै खेलाडीलाई बधाई दिन चाहन्छु । यो एक सानदार खेल थियो । एउटा ठूलो प्रयास थियो,’ उनले भने, ‘मेरा खेलाडी हिरो हुन् । यस सिजन उनीहरूले गरेको प्रयास प्रशंसनीय र यो आश्चर्यजनक छ ।’

टोटेनहमले क्वाटरफाइनल प्रवेश निश्चित गराउन मार्च ५ मा डर्टमन्डको घरेलु मैदानमा दोस्रो लेग खेल्नेछ । त्यस खेल आफूअनुकूल नतिजा निस्किएमा टोटेनहम सन् २०११ पछि पहिलोपल्ट च्याम्पियन्स लिगको अन्तिम आठमा पुग्नेछ ।

फरक खेलमा गोल गरेका रियल म्याड्रिडका करिम बेन्जेमा ।

च्याम्पियन्स लिग इतिहासमा पहिलोपल्ट भिडियो असिस्टेन्ट रेफ्री (भार) प्रयोग गरिएको खेलमा रियल म्याड्रिडले अयाक्सविरुद्ध २–१ को संघर्षपूर्ण जित निकालेको छ । अयाक्सले २४ वर्षको इतिहासमा अहिलेसम्म रियललाई हराउन सकेको छैन । योहान क्राएफ एरिनामा बुधबार रियलका गोलरक्षक थियावट कोर्टवाको गल्तीमा डिफेन्डर निकोलास टाग्लिया–फिकोले गरेको हेडरमार्फत घरेलु

टोलीलाई अग्रता दिलाएका थिए ।

तर रेफ्री दामिर कोमिनाले उनको गोललाई मान्यता दिएनन् र भारको प्रयोग गरी अफसाइड करार गरे । पहिलो हाफमा युवा खेलाडीले भरिएको अयाक्सविरुद्ध रियल प्रभावशाली देखिएको थिएन । दोस्रो हाफमा भने करिम बेन्जेमा र एसेन्सियोले गोल गरे ।

हाकिम जियेचले अयाक्सका लागि एक गोल फर्काएका थिए । अयाक्सले दोस्रो लेग सान्टियागो बेर्नाबेउमा खेल्नेछ तर घरेलु मैदानमा २–१ को हारले रियल धेरै अघि बढिसकेको छ ।