नेपाली टिम हिरो गोल्डकपको फाइनलमा रोकियो
काठमाडौँ — नेपाली महिला राष्ट्रिय टिम भुवनेश्वरमा भएको हिरो गोल्डकप फुटबलको फाइनलमा रोकिएको छ । कालिंगा रंगशालामा शुक्रबार भएको फाइनलमा म्यान्मारविरुद्ध ३–१ ले हारेपछि नेपाल उपविजेतामा सीमित भएको हो ।
फिफा वरीयतामा ६४ स्थानमाथिको टिमविरुद्ध नेपाल ३८ औं मिनेटमा पछटाडि परेको थियो । यी यी ओको गोलमा म्यान्मारले अग्रता लिएको थियो । तर, मन्जली कुमारी योन्जनले ४५ औं मिनेटमा गोल गरेपछि नेपालले पहिलो हाफ १–१ मा टुंग्याएको थियो ।
दोस्रो हाफमा पनि नेपालको प्रदर्शन गतिलो रहेन । र,वीन थेन्गी तुनले ५३ औं मिनेटमा गोल गरेर फेरि म्यान्मारलाई २–१ को अग्रता दिलाइन् । यी यी ओले ६३ औं मिनेटमा व्यक्तिगत दोस्रो गोल गर्दै म्यान्मारको उपाधि पक्का गरिदिइन् ।
समूह चरणको पहिलो खेलको भेटमा पनि म्यान्मारले नेपाललाई हराएको थियो । त्यस बेला म्यान्मारले ३–० को जित निकालेको थियो । म्यान्मार शतप्रतिशत जितसहित फाइनल पुगेको थियो भने नेपालले पछिल्ला दुई खेलमा घरेलु टिम भारतलाई २–१ र इरानलाई ३–० ले पन्छाउँदै फाइनल यात्रा तय गरेको थियो । भारतविरुद्धको ऐतिहासिक जित र इरानविरुद्ध दुई–दुई गोल गरेकी फरवार्ड सावित्रा भण्डारीले फाइनलमा उस्तै लयलाई निरन्तरता दिन सकिनन् ।