आर्मी तेस्रोपल्ट च्याम्पियन

अर्जुन राजवंशी

बिर्तामोड — त्रिभुवन आर्मी क्लबले तेस्रोपल्ट मगमग चौथो झापा गोल्डकप फुटबलको उपाधि जितेको छ । विभागीय टोली आर्मीले सोमबार फाइनलमा आयोजक झापा ११ लाई ५–३ ले पराजित गर्दै लगातार दोस्रो र समग्रमा तेस्रोपल्ट उपाधि जितेको हो । 

झापा गोल्डकपको उपाधि जितेपछि ट्रफीसहित खुसी साट्दै त्रिभुवन आर्मीका खेलाडी । तस्बिर : अर्जुन/कान्तिपुर

डोमालाल राजवंशी रंगशालामा आर्मीको जितमा सन्तोष तामाङले २, भरत खवास, नवयुग श्रेष्ठ र टेकबहादुर बुढाथोकीले १–१ गोल गरे । झापाबाट योगेश गुरुङ, विदेशी खेलाडी फ्रान्सिस ओएमी र भिक्टोर एमोबीले गोल फर्काए । २४ औं मिनेटमा आर्मीका सन्तोषले एकल प्रयासमा गोल गर्दै टोलीलाई अग्रता दिलाए । ३३ औं मिनेटमा कप्तान भरतले गोल थप्दै टिमको अग्रता दोब्बर बनाएका थिए ।

झापाले गोल फर्काएर ४३ औं मिनेटमा आर्मीको अग्रता छोट्याएको थियो । फ्रान्सिसको सशक्त प्रहार पोस्टको क्रसबारमा लागेर गोलमा परिणत भयो । ५५ औं मिनेटमा योगेश गुरुङले गोल गर्दै झापालाई खेलमा फर्काएका थिए । फ्रान्सिसको पासमा योगेशले वान टचमै गोल गरेर खेल २–२ को बराबरीमा ल्याए ।

७६ औं मिनेटमा स्ट्राइकर नवयुगले आकर्षक गोल गरेर पुनः आर्मीलाई अग्रता दिलाएका थिए । त्यसको तीन मिनेटपछि सन्तोषले व्यक्तिगत दोस्रो तथा आर्मीका लागि चौथो गोल गरेका थिए । निर्धारित समय सकिएपछि इन्ज्युरी समयको दोस्रो मिनेटमा टेकबहादुरले गोल गर्दै आर्मीको जित सुनिश्चित गरेका थिए ।

इन्ज्युरीको छैटौं मिनेटमा झापाबाट विदेशी खेलाडी भिक्टोरले गोल गरेर अन्तर घटाए पनि आर्मीको जितलाई रोक्न सकेनन् । आर्मीले १२ लाख ५५ हजार र घरेलु टोली झापाले ६ लाख ५ हजार रुपैयाँ पुरस्कार पाएका थिए ।

पहिलो हाफमा निकै खटेर खेलेको घरेलु टोली झापाले दोस्रो हाफमा लय गुमाएको थियो । पाँचौं मिनेटमा आर्मीका टंक बस्नेतको प्रहार बतासिएर बाहिरियो । आर्मीका कप्तान भरतले १० औं मिनेटमा पोस्टमा गरेको प्रहार सशक्त हुन सकेन । झापाका हेमन गुरुङको कडा प्रहार १९ औं मिनेटमा बाहिरियो । ३० औं मिनेटमा झापाका भिक्टोरको प्रहार गोलकिपर विकेश कुथुले नियन्त्रणमा लिए ।

५२ औं मिनेटमा झापाका फ्रान्सिसको पासमा सन्जोग राईले गरेको प्रहार पोस्टमाथिबाटबाहिरियो । ५८ औं मिनेटमा झापाका भिक्टोरको प्रहार पोस्ट नजिकबाट बाहिर पुग्यो । आर्मीकाविवेक बस्नेतको सशक्त प्रहार झापाका डिफेन्डरले ७१ औं मिनेटमा क्लियर गरेका थिए । झापाका कर्ण लिम्बुको प्रहार रिबाउन्ड भएपछि पुनः फ्रान्सिसको प्रहार पोस्ट नजिकैबाट बाहिरिँदा खेल ७४ औं मिनेटमा चलिरहेको थियो ।

आर्मीले झापा गोल्डकपको पहिलो, तेस्रो र चौथो संस्करण जितेको हो । झापा ११ भने लगातार चौथो पटक फाइनल पुगेर पनि उपाधि जित्न चुकेको छ । जारी सिजनमा पाँच वटा गोल्डकपको फाइनल खेलेको आर्मीले तीन गोल्डकप जितेको छ । उसले विशाल मेमोरियल गोल्डकप वीरगन्ज, मदन भण्डारी गोल्डकप इटहरी र झापा गोल्डकपको उपाधि जितेको हो । सिमरा र आहा–रारा गोल्डकपको फाइनलमा भने आर्मी पराजित भएको थियो ।

खेलमा दुई गोल गरेका आर्मीका सन्तोष तामाङ म्यान अफ द म्याच घोषित भए । उनले १५ हजार रुपैयाँ प्राप्त गरे । झापाका दिलेन लोक्ताम सर्वोत्कृष्ट खेलाडी घोषित भए । उनले यामाहाकोमोटरसाइकल पुरस्कार पाए । आर्मीका विकेश कुथु उत्कृष्ट गोलकिपर, झापाका देवेन्द्र तामाङ उत्कृष्ट डिफेन्डर, झापाका पुजन उपरकोटी उत्कृष्ट मिडफिल्डर र आर्मीका चुनबहादुर थापा उत्कृष्ट प्रशिक्षक घोषित भए । उनीहरूले जनही २१ हजार रुपैयाँ पाए । आयोजकले झापाका निशान्त खड्कालाई उदीयमान खेलाडी तथा सन्जोग राईलाई उत्कृष्ट खेलेको भन्दै पुरस्कृत गरेको छ । उनीहरूले जनही १५ हजार पाए ।

नरेन्द्रमणिलाई लाइफटाइम अवार्ड
झापा गोल्डकप आयोजक समितिले झापाका पूर्व खेलाडी नरेन्द्रमणि लिम्बुलाई लाइफलाइम एचिभमेन्ट अवार्ड प्रदान गरेको छ । समापन कार्यक्रममा आयोजकले लिम्बूलाई एक थान यामाहा मोटरसाइकल प्रदान गरेको छ । लामो समयदेखि झापाली फुटबल विकासमा महत्वपूर्ण योगदान पुर्‍याएकाले उनलाई उक्त अवार्ड प्रदान गरेको आयोजक समितिका अध्यक्ष महेन्द्रकुमार गिरीले बताए ।

स्कुले जीवनदेखि फुटबलमा लागेका बिर्तामोड नगरपालिका ४ निवासी लिम्बुले जिल्लास्तरीय, पूर्वाञ्चलस्तरीय र ‘ए’ डिभिजनका क्लबबाट समेत खेलेका थिए । उनले सन् १९९५ देखि व्यावसायिक फुटबल खेलेका हुन् । लिम्बुले ०७२ देखि झापा ११ मा आबद्ध भएर खेलेका थिए । टिमका उनी मुख्य खेलाडी थिए ।

प्रकाशित : फाल्गुन २८, २०७५ ०९:०८
प्रतिक्रिया
पठाउनुहोस्

‘दबाब होइन, अवसर’

राजु घिसिङ

विराटनगर — घरेलु मैदानमा पहिलोपल्ट प्रतियोगिता खेल्न लागेको नेपाली महिला टिमका लागि पाँचौं साफ वुमेन्स च्याम्पियनसिप अवसरका रूपमा रहेको मुख्य प्रशिक्षक हरि खड्काले बताएका छन् । 


उद्घाटन खेलमा नेपालले मंगलबार कमजोर मानिएको भुटानविरुद्ध खेल्दैछ । ‘पहिलोपल्ट नेपालमा हुन लागेको साफ महिला च्याम्पियनसिपमा हाम्रा खेलाडीहरू हजारौं समर्थकबीचमा खेल्दैछन् । घरेलु मैदान र दर्शकबीच खेल्दा जित्नैपर्ने दबाब हुनसक्छ । तर, यसलाई दबाब होइन, अवसरका रूपमालिनेछौं,’ सोमबार पत्रकार सम्मेलनमा प्रशिक्षकखड्काले भने, ‘हाम्रो तयारी पूरा भएको छ । मिसन सुरु भयो । पहिलो खेलको लागि मानसिक, शारीरिक रूपमा तयार छौं ।’

मुख्य खेलाडी फरवार्ड सावित्रा भण्डारीले ठेउलाको कारण करिब एक साता आराम गर्नुपरेको थियो । चौथो साफमा भुटानविरुद्ध कीर्तिमान ६ गोल गरेकी उनी आइतबारदेखि टिमको प्रशिक्षणमा फर्किइन् । उनी पूरा फिट भइसकेको खड्काले बताए । नेपाल र भुटान साफ च्याम्पियनसिपमा तेस्रोपल्ट भिड्न लागेका हुन् । यसअघि साफ वुमेन्स च्याम्पियनसिप २०१४ र २०१६ मा भएको भेटमा नेपालले समान ८—० को जित निकालेको थियो । भुटानले साफमा कुनै पनि खेल जितेको छैन । त्यसैले नेपालले पाँचौं साफको पहिलो खेलमा पनि सहज जित हात पार्ने अपेक्षा गरिएको छ ।

‘हामी सबै प्रतिद्वन्द्वीलाई सम्मान गर्छौं । सजिलो रूपमा कसैलाई लिएका छैनौं । राम्रो खेल्छौं, त्यसैका लागि कोसिस गर्नेछौं, ‘गत वर्ष जेठमा महिला टिम हेर्न थालेका खड्काले भने, ‘हाम्रो समूहमा रहेको बंगलादेश राम्रो टिम हो । हरेक खेलमा आफ्नो कमी कमजोरी केलाएर सच्याउँदै र बलियो पक्ष थप राम्रो बनाएर लानेछौं । ओलम्पिक छनोटमा बंगलादेशविरुद्ध गल्ती गरे पनि हिरो गोल्डकपमा भारतविरुद्ध राम्रो खेलेका थियौं । दिन प्रतिदिन प्रगति भइरहेको छ । त्यसैले खेलाडीले अलि मिहिनेत गरे भने हामी उपाधि जित्नसक्छौं ।’

प्रशिक्षक खड्काले समर्थकबाट प्रोत्साहन पाएको र आफ्नो टिम सन्तुलित भएको पनि बताए । ‘खेलाडीहरूमा जितप्रति भोक देखेको छु । सबैले कडा मिहिनेत गरिरहेका छन् । त्यसैले घरेलु मैदानमा खेल्न पाउनु हाम्रा लागि अवसर हो । यसलाई सफलतामा परिणत गर्न चाहन्छौं । नेपाली टिम सुरुको तीनपल्ट साफमा उपविजेता भएको थियो ।

चौथो संस्करणमा भने सेमिफाइनलमा चुक्यो । दुईपल्ट दक्षिण एसियाली खेलकुदमा रजत पदकमा सीमित भएको थियो । गत महिना भुवनेश्वरमा भएको हिरो वुमेन्स च्याम्पियनसिपमा पनि उपविजेता नै भयो । त्यसैले पहिलोपल्ट ट्रफी हात पार्दै नेपाली टिमको उपविजेताको छवि बदल्ने खड्काको टिमले योजना बनाएको छ ।

तीनैपल्ट उपविजेता नेपाली टिममा रहेकी नीरु थापाले यसपालि टिमको कप्तानी गर्ने अवसर पाएकी छन् । उनले भनिन्, ‘इटहरी र विराटनगरमा राम्रो तयारी भयो । घरेलु मैदानमा खेल्न पाएकोमा खुसी छौं । सबैले हौसला बढाइरहेका छन् । पहिलाभन्दा अट्याकिङ डिफेन्स राम्रो भएको छ । त्यसैले हामी यसपालि उपाधि जित्छौं जस्तो लाग्छ ।’

भुटानका दक्षिण कोरियाली प्रशिक्षक
सुङ जाए लीले आफ्नो टिमले काठमाडौंमा ट्रेनिङसँगै नेपाली यू–१९ टिमसँग अभ्यास खेल खेलेको बताए । उनले भने, ‘हाम्रो टिममा यू–१९ का धेरै खेलाडी छन् । भविष्यमा केन्द्रित भएर टिम बनाइएको हो । हामी राम्रो खेल्ने प्रयास गर्नेछौं ।’ भुटानी टिमकी कप्तान सोन्मा छोदेनले भनिन्, ‘नेपाल धेरै बलियो टिम हो । हामी राम्रो खेल्ने प्रयास गर्नेछौं । यो साफ हाम्रो लागि राम्रो अनुभव हुनसक्छ ।’

भारतको जित्ने दाबी
भारतीय टोलीकी मुख्य प्रशिक्षक मायमोल रक्कीले उपाधि जित्नका लागि नेपाल आएको बताइन् । ‘हिरो गोल्डकपबाट धेरै सिक्यौं । त्यो हार (नेपालविरुद्ध) हार पुरानो भइसक्यो, त्यसमा फर्कन चाहँदैनौं । युवा खेलाडीले जादुयी अनुभव गराउने छन् । हामी पाँचौंपल्ट साफको उपाधि जित्नका लागि आएका हौं ।’ भारतकी कप्तान असलतादेवीले पनि साफको उपाधि जित्नेमा विश्वस्त रहेको बताइन् ।

बंगलादेशले पछिल्लोपल्ट सन् २०१६ को साफमा फाइनल खेलेको थियो । त्यो नै उसको सबैभन्दा ठूलो उपलब्धि हो । ‘हामीले उमेर समूहमा राम्रो गरिरहेका छौं । यसपालि सिनियरको तयारी पनि राम्रै छ । निरन्तर खेलिरहेका छौं । टिम अनुभवी भइरहेको छ र महिला फुटबलमा दक्षिण एसिायकै भविष्य राम्रो देखेको छु ।

त्यसैले यसपालि सेमिफाइनल हुँदै फाइनलमा पुग्ने लक्ष्य लिएका छौं,’ बंग्लादेशका प्रशिक्षक गोलाम रब्बानी चोतानले भने । श्रीलंका, माल्दिभ्स र भुटानले भने विराटनगर यात्रालाई अनुभव बटुल्ने र प्रदर्शन सुधार्ने अवसरमा लिएका छन् ।

प्रकाशित : फाल्गुन २८, २०७५ ०९:०६
पूरा पढ्नुहोस्
प्रतिक्रिया
पठाउनुहोस्