पुलिसको कठिन जित

विप्लव भट्टराई

इलाम — भारतको पश्चिम बंगालस्थित युनाइटेड दार्जिलिङविरुद्ध २–१ गोलको कठिन जित निकाल्दै नेपाल पुलिस क्लब पाँचौं माइभ्याली अन्तर्राष्ट्रिय आमन्त्रण फुटबल प्रतियोगिताको सेमिफाइनल प्रवेश गरेको छ  । पुलिसले फाइनल प्रवेशका लागि एपीएफ र क्यामरुनको दाफिन्सबीचको विजेताको सामना गर्नुपर्नेछ  ।

पुलिसलाई सोमबार छैटौं मिनेटमा सौजन्य याक्खा राईले गोल गर्दै अग्रता दिलााए । दार्जिलिङका गोलरक्षक विनोद क्षत्रीले फाउल गरेपछि पाएको फ्रिकिकमा सौजन्यले गोल गरेका हुन् । अर्को गोल पनि पुलिसले फ्रिकिकमार्फत नै निकाल्यो । भरत शाहले ८१ औं मिनेट गरेको प्रहारलाई दार्जिलिङका गोलरक्षकले वचाउन सकेनन् ।


उद्घाटन खेलमा आयोजकलाई हराउँदै पुलिस प्रतिद्वन्द्वी पाएको दार्जिलिङका लागि करन राईले ८४ औं मिनेटमा १ गोल फर्काए पनि जित निकाल्न पर्याप्त रहेन । म्यान अफ द म्याच पुलिसका सौजन्य घोषित भए । जारी सिजनमा खप्तड गोल्डकप जितेको पुलिसले त्यसयता अर्को उपाधि उचाल्न सकेको छैन । तिलोत्तमामा दाफिन्ससँग पराजित पुलिसले त्यहाँ भने युनाइटेड दार्जिलिङ २–० ले पराजित गरेको थियो । पुलिस इटहरीमा सेमिफाइनलमा मनाङसँग पराजित रह्यो भने पोखरामा क्वाटरफाइनलमा दाफिन्ससँग नै रोकियो । झापा गोल्डकपको क्वाटरफाइनलमा टाइब्रकेरम थ्री–स्टारलाई नतिजा सुम्पिएको पुलिसले माइभ्यालीमा पनि सुरक्षित महसुस गर्न हम्मे प¥यो ।

Citizen


पुलिसका अजित भण्डारी, रवि पासवान र सुमन लामा राष्ट्रिय टिमको क्लोज क्याम्पमा छन् । एएफसी यू–२३ च्याम्पियनसिपको छनोटका तयारीका क्रममा अभिषेक रिजाल र तेज तामाङ पनि नेपाली युवा टोलीसँग छन् । ‘नयाँ खेलाडीलाई मौका दिए पनि अपेक्षाअनुरूप खेल्न सकेनन्,’ प्रशिक्षक अनन्त थापाले भने, ‘विपक्षी टिमको फिनिसिङ नमिल्दा हामीले जित निकाल्न सक्यौं ।’ दार्जिलिङले भने हारमा बललाई दोष लगाएको छ । ‘उता खेलेको बल र यताको नमिल्दा’ खेलाडीले चाहेअनुसार प्रदर्शन गर्न नसकेको भनाइ दार्जिलिङको टोलीको थियो । पहिलो खेलमा भन्दा २ खेलाडी परिवर्तन गरेको दार्जिलिङले पुलिसलाई अन्तिम मिनेटसम्म चुनौती भने पस्किएको थियो । पुलिसविरुद्धको खेलमा मनीष बस्नेत र इन्डियन आर्मीका विशाल क्षत्रीलाई खेलाएको दार्जिलिङले केही सुन्दर अवसरलाई गोल गर्न सकेको थिएन ।


तिलोत्तमापछि दोस्रो पटक नेपाल छिरेको सीमापारि दार्जिलिङको टिमले सुकुना, मिलनमोड र सुकिया गोल्डकप जितेको थियो । मंगलबार डिफेन्डिङ च्याम्पियन थ्रिस्टार क्लब र हिमालयन शेर्पाबीच अर्को क्वाटरफाइनल हुनेछ । हिमालयनले हिजोको खेलमा नेप्लिज एकाडेमी हङकङलाई पराजित गरेको थियो भने थ्रिस्टार बाई पाएर सिधै क्वाटरफाइनलमा प्रवेश पाएको हो । फागुन २६ गते सुरु भएको प्रतियोगिता चैत ५ गतेसम्म चल्नेछ । विजेताले ७ लाख र उपविजेताले ४ लाख रुपैयाँ पुरस्कार पाउनेछन् ।

प्रकाशित : फाल्गुन २९, २०७५ १०:२६
ADVERTISEMENT
प्रतिक्रिया
पठाउनुहोस्
ADVERTISEMENT

अपेक्षा ६ गोल, भयो ३

नेपाल ३–० भुटान
राजु घिसिङ, विनोद भण्डारी

विराटनगर — नेपाली महिला टिमले भुटानविरुद्ध अघिल्ला दुई भेटमा समान ८–० को जित हात पारेको थियो  । सुरुका तीन संस्करणमा उपविजेता भएको नेपाली टिमले पाँचौं साफ वुमेन्स च्याम्पियनसिपमा उपाधि जित्ने लक्ष्य बनाएको छ  ।

ओलम्पिक छनोट, हिरो गोल्डकपमा सहभागी भएको नेपाली टिम सात महिनायता तयारीमा व्यस्त पनि रह्यो । त्यसैले पाँचौं साफको उद्घाटन खेलमा भुटानविरुद्ध सहज जित हासिल गर्ने अनुमान गरिएको थियो । नतिजा अनुमान गरेजस्तो भएन ।


विंगर मन्जली कुमारी योन्जनले १३ औं मिनेटमै नेपाललाई अग्रता दिलाइन् । मिडफिल्डर दीपा राईले पेनाल्टी क्षेत्रमा ‘अनमार्क’ रहेकी मन्जलीले फस्ट बारमै बललाई पोस्टको दिशा दिँदै गोलको खाता खोलिन् । गत महिना हिरो गोल्डकपको फाइनलमा म्यान्मारविरुद्ध ३–१ ले पराजित भएको खेलमा पनि गोल गरेकी १८ वर्षीया उनको यो तेस्रो अन्तर्राष्ट्रिय गोल हो ।सहिद मैदानमा १–० को अग्रता लिएको तीन मिनेटपछि नै नेपाल २–० ले अघि बढ्यो । टिमका मुख्य खेलाडीका रूपमा रहेकी फरवार्ड सावित्रा भण्डारीले दुई डिफेन्सलाई छक्याउँदै अघि बढाएको बललाई पेनाल्टी क्षेत्रभित्रबाट गोलमा परिणत गरिन् । यो उनको २३ औं अन्तर्राष्ट्रिय गोल हो । यसले उनलाई सर्वाधिक गोलकर्ताको सूचीमा पूर्वकप्तान जमुना गुरुङ (२५ गोल) र अनु लामा (३५ गोल) को नजिक पु¥याएको छ ।

भुटानविरुद्ध आठ
सावित्राका लागि भुटानविरुद्धको खेल सधैं सुखद् हुँदै आएको थियो । उनले साफ वुमेन्स च्याम्पियनसिप २०१४ मा इस्लामावादमा भुटानविरुद्ध कप्तान अनु लामाको स्थानमा ८६ औं मिनेटमा मैदानमा प्रवेश गर्दै अन्तर्राष्ट्रिय फुटबलमा डेब्यु गरेकी थिइन् । मैदानमा प्रवेश गरेको दोस्रो मिनेटमै गोलको खाता खोलेकी उनले सिलिगुडीमा भएको साफ २०१६ मा भुटानविरुद्ध कीर्तिमान ६ गोल गरेकी थिइन् । यसपालि सहित सावित्राले भुटानविरुद्ध आठ गोल पु¥याइन् ।


चौथो साफमा सर्वाधिक (१२ गोल) गोलकर्ता रहेकी सावित्राले यसपालि पनि भुटानविरुद्ध प्रभावशाली प्रदर्शन गर्दै गोल संख्या वृद्धि गर्ने अपेक्षा गरिएको थियो । तर भुटानी डिफेन्सको कडा निगरानीमा परेकी सावित्राले मैदानमा अपेक्षाअनुरूप गोल गर्न सकिनन् । उनी ४४ औं मिनेटमा भुटानी गोलकिपर संगीता मोंगरविरुद्धको ‘वान भर्सेस वान’ मा गोल गर्न चुकिन् । बल मोंगरले रोकिदिइन् । खेलमा मोंगरले केही राम्रा बचाउ गरिन् ।


मोंगरले खेलको अन्त्यतिर सावित्रा र मन्जलीको सशक्त प्रहारमा लोभलाग्दो बचाउ गरेकी थिइन् । पहिलो हाफको इन्ज्युरी समयमा मन्जलीले पेनाल्टी क्षेत्रबाहिरैबाट प्रहार गरेको बल पोस्ट नजिकिँदै बाहिरिएको थियो ।

निरुको नवौं गोल
दोस्रो हाफमा नेपालले केही सुधारिएको खेल पस्कियो । विंगर अनिता बस्नेतको क्रसमा सवित्राको हेडरमा प्राप्त बललाई गोललाइननजिक पुगेकी कप्तान निरू थापाले गोलमा परिणत गर्दै नेपाललाई ३–० ले अघि बढाइन् । यो उनको नवौं अन्तर्राष्ट्रिय गोल हो । यससँगै उनी दीपा अधिकारी (८ गोल) लाई उछिन्दै नेपालको सर्वाधिक गोल गर्ने चौथो खेलाडी भइन् । मुख्य प्रशिक्ष्ँक हरि खड्काले टिम सम्हालेयता कप्तानी गर्ने अवसर पाएकी निरूले ३५ खेल खेलेकी छन् ।भुटानविरुद्धको प्रतिस्पर्धासँगै २९ वर्षीया निरु र मिडफिल्डर रेनुका नगरकोटे साफ वुमेन्स च्याम्पियनसिपको चार संस्करण खेल्ने नेपाली भए । निरूले यसअघि २०१० मा कक्स बजार (बंगलादेश), २०१२ मा कोलम्बो (श्रीलंका) र २०१४ मा इस्लामावाद (पाकिस्तान) भएको साफ च्याम्पियनसिप खेलेकी थिइन् । दुई वर्षअघि सिलिगुडीमा भएको चौथो साफमा भने उनी प्रशिक्ष्ँक कुमार थापाको टिममा अटाएकी थिइनन् । चौथो साफमा कप्तान रहेकी रेनुका २०१० र २०१४ को साफमा पनि मैदानमा ओर्लिएकी थिइन् ।

नेपाली टिम दक्षिण एसियाली टिमविरुद्ध भारतबाहेक अरू देशविरुद्ध हारेको छैन । भुटानले भने कुनै पनि टिमलाई पराजित गर्न सकेको छैन । तैपनि तीन गोलको अन्तरमा नेपाललाई सीमित गर्नु पनि भुटानका लागि सुधारिएको नतिजा हो । विगतको तुलनामा भुटानी खेलाडीले सुधारिएको प्रदर्शन गरे । बल क्लियर गर्दै अघि बढाउने प्रयास गरे पनि नेपाली गोलकिपर अन्जिला तुम्बापो सुब्बाले २५ औं मिनेटमा मात्रै बल छुने मौका पाएकी थिइन् ।

रेखाको डेब्यु
राष्ट्रिय टिममा पूर्वकप्तान अनु लामाको स्थान लिएकी फरवार्ड रेखा पौडेलले भुटानविरुद्धको खेलमार्फत अन्तर्राष्ट्रिय फुटबलमा डेब्यु गरेकी छन् । १९ वर्षीया उनी अमृता जैसीको स्थानमा ८८ औं मिनेटमा मैदानमा प्रवेश गरेकी थिइन् । हिरो वुमेन्स गोल्डकपबाट टिममा रहेकी उनले भुटानमा भएको साफ यू १८ महिला च्याम्पियनसिप २०१८ को उपाधि यात्रामा आठ गोल र थाइल्यान्डमा सम्पन्न एएफसी यू १९ च्याम्पियनसिप छनोटमा भारतविरुद्ध दुई गोल गरेकी थिइन् ।

नेपाली टिम
अन्जिला तुम्बापो सुब्बा (गोलकिपर), हीरा कुमारी भुजेल, अमृता जैसी (८८ मिनेट ः रेखा पौडेल), गीता राना, मनमाया लिम्बू (५२ मिनेट ः सरु लिम्बू), दीपा राई, रेनुका नगरकोटे, अनिता बस्नेत, मन्जली कुमारी योन्जन, निरु थापा (कप्तान) (७२ मिनेट ः अनिता केसी), सावित्रा भण्डारी 

प्रकाशित : फाल्गुन २९, २०७५ १०:२२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT