भुटानको हार, नेपाल सेमिफाइनलमा

बंगलादेश २–० भुटान
विनोद भण्डारी

विराटनगर — भुटान सहिद रंगशालामा बिहीबार बंगलादेशविरुद्ध २–० को हार बेहोर्दै पाँचौं साफ वुमेन्स च्याम्पियनसिपबाट बाहिरिएको छ । भुटानले यसअघि आयोजक नेपालसँग ३–० को हार भोगेको थियो । बंगलादेश र नेपाल भने एक खेल बाँकी छँदै समूह ‘ए’ बाट सेमिफाइनल पुग्ने निश्चित भयो । नेपाल र बंगलादेश समूहको अन्तिम खेलमा शनिबार भिड्ने छन् । त्यसको नतिजाले समूह विजेताको टुंगो लगाउने छ ।

एयरबलमा जुध्दै भुटानकी नाम्गेल डिमा र बंगलादेशकी श्यामसुन्नहर (हरियो) । तस्बिर : वेदराज पौडेल/कान्तिपुर  

Citizen

सुधारिएको खेल पस्किएको भुटानले बंगलादेशलाई पहिलो हाफमा गोलविहीन अवस्थामा रोकेको थियो । दोस्रो हाफमा भने उसले सम्हालिन नपाउँदै गोल बेहोर्‍यो । मिडफिल्डर मिसरात जाहन मौसुमीले ४६ औं मिनेटमा गोल गर्दै बंगलादेशलाई अग्रता दिलाइन् । उनले मोनिका चकमाको कर्नरमा घम्साघम्सीबीच हेडबाट गोल गरिन् । कप्तान सविना खातुनले ८५ औं मिनेटमा गोल थप्दै बंगलादेशको जित पक्का गरिन् । उनले एक्लै बल अघि बढाएर दुई डिफेन्स र गोलकिपर छक्याउँदै लोभलाग्दो गोल गरिन् ।

खेलको ११ औं मिनेटमा बंगलादेशकी सोपना सिरातले अवसर गुमाउँदा टिमले गोलका लागि दोस्रो हाफ कुर्नुपरेको हो । भुटानकी गोलकिपर संगीता मगर अघि बढेको अवस्थामा सोपनाको प्रहार पोस्ट बाहिरियो । २३ औं मिनेटमा सोपनाको सशक्त प्रहार संगीताले उत्कृष्ट बचाउ गर्दै टिमको संकट टारेकी थिइन् । ३० औं मिनेटमा मारिया मान्डाको कर्नरलाई कप्तान सविनाले नियन्त्रण गर्न नसक्दा गोल अवसर चुकेको थियो । ३४ औं मिनेटमा सविनाको प्रहार संगीताले उत्कृष्ट बचाउ गर्दै टिमका लागि दोस्रो संकट टार्दा ४१ औं मिनेटमा जाहन मौसुमीको गोललाई श्रीलंकन रेफ्री मोदइ शाहद फारुखले अफसाइडको करार गरिदिएका थिए ।
भुटानी गोलकिपर संगीताको उत्कृष्ट प्रदर्शनका कारण बंगलादेशले फराकिलो गोल अन्तरको जित दर्ता गर्न सकेन । भुटानले साफ वुमेन्स च्याम्पियन्समा हालसम्म कुनै पनि खेल जितेको छैन । पहिलो साफ २०१० मा श्रीलंकाविरुद्ध १–१ को बराबरी गरेयताका सबै खेलमा भुटान हारेको छ ।

बंगलादेशका प्रशिक्षक गोलाम रब्बानी छोतनले भने, ‘केटीहरूले उत्कृष्ट प्रदर्शन गरे । हामीले सुरुबाटै खेल नियन्त्रणमा लियौं । भुटानले रक्षात्मक खेल्यो । मध्यान्तरमा मैले खेलाडीलाई पहिलो हाफमा जस्तै खेल्यो भने नतिजा निस्किन्छ भनेको थिएँ, खेलाडीले त्यसै गरे र नतिजा पनि आयो ।’

भुटानका प्रशिक्षक सुङ जाए लीले नेपालसँगको तुलनामा बंगलादेशविरुद्ध सुधारिएको खेल देखाएकोभन्दै सन्तुष्टि जनाए ।

प्रकाशित : चैत्र १, २०७५ १०:२४
प्रतिक्रिया
पठाउनुहोस्

माईभ्यालीमा रोकियो एपीएफ

विप्लव भट्टराई

(इलाम) — तेस्रो पटकको भेटमा पनि क्यामरुनको दाउफिन्स क्लब विभागीय टिम एपीएफविरुद्ध अब्बल साबित भएको छ । इलाममा जारी पाँचौं आमन्त्रण टुबोर्ग माईभ्याली गोल्डकप फुटबलको तेस्रो क्वाटर फाइनलमा बिहीबार दाउफिन्सले एपीएफको चुनौती ३–१ ले समाप्त पारेको हो । यसअघि पोखराको मनकामना केबलकार पोखरा कप र धरानको बुढासुब्बा गोल्डकपमा पनि एपीएफ क्यामरुनी टोलीसँग रोकिएको थियो ।

प्रतिस्पर्धात्मक खेल भए अफ्रिकन खेलाडीसामु एपीएफले नतिजा आफ्नो पक्षमा पार्न सकेन । दाउफिन्सका मेसुकेले १४ औं मिनेटमा गोलको खाता खोले । १९ औं मिनेटमा पेटंगाले गोल गर्दै अन्तर बढाए । एपीएफका हरि कार्कीले ३६ औं मिनेटमा गोल फर्काउँदै अन्तर कम गरेका थिए । तर खेलको ५७ औं मिनेटमा पेटंगाले गोल थप्दै क्यामरुनीको जित सुनिश्चित बनाए । म्यान अफ द म्याच दुई गोल गरेका पेटंगा घोषित भए ।

बलियो टोली दाउफिन्ससँग एपीएफले केही अवसर भने सिर्जना गर्‍यो । टिमका भरपर्दा खेलाडी आदित्य चौधरी, नवीन लामा, आशिष लामा र राजन गुरुङबिना नै एपीएफ मैदान उत्रेको थियो । आदित्य राष्ट्रिय टोलीको तयारीमा छन् भने आशिष र राजन यू–२३ को बन्द प्रशिक्षणमा छन् । लिगमा थ्रीस्टारसँग खेल्दा घाइते भएका नवीन लामा अझै फर्कन सकेका छैनन् ।

एपीएफले विवादस्पद गोलका कारण हार बेहोर्नुपरेको दाबी आरोप लगायो । ‘गोललाइन क्रस नभएको बललाई गोल दिइयो,’ प्रशिक्षक सुदीप श्रेष्ठले भने, ‘पहिलो गोल नै त्यसरी दिइएपछि खेलमा फर्कन सकिएन ।’ दाउफिन्सका अहोन्डा इसाको कर्नरमा मेसुकेले हेड गर्दा रेफ्री श्याम दनुवारले दिएको गोलप्रति चित्त नबुझाएका एपीएफ खेलाडीले तत्काल आपत्तिसमेत जनाएका थिए ।

खेलाडीले उच्च मनोबलसाथ अब्बल खेल पस्किएकाले जित निस्किएको दाउफिन्सका टिम म्यानेजर आशिक थापा मगरको प्रतिक्रिया थियो ।

माईभ्यालीको दोस्रो संस्करण फाइनलमा झापासँग पराजित एपीएफ तेस्रो संस्करणमा पहिलो खेलमा नै झापासँग हारेको थियो । अघिल्लो सिजन एपीएफ सेमिफाइनलमा थ्रीस्टारसँग पराजित हुँदै घर फर्केको थियो ।

यो सिजन एपीएफ पोखरा कपमा फाइनल पुग्यो । मोफसलका आठ प्रतियोगितामा सहभागिता जनाएको दाउफिन्सले भने पोखरा, बुढासुब्बा, तिलोत्तमा गोल्डकप जितेको थियो । झापा गोल्डकप र आहा–रारामा आर्मीसँग पराजित दाउफिन्सले इलाममा फाइनल पुग्नका लागि अर्को विभागीय टोली नेपाल पुलिस क्लबको सामना गर्नेछ ।

प्रकाशित : चैत्र १, २०७५ १०:१६
पूरा पढ्नुहोस्
प्रतिक्रिया
पठाउनुहोस्