धुले मैदानमा काभ्रे गोल्डकप

काभ्रे र फ्रेन्ड्स आज भिड्दै
नगेन्द्र अधिकारी

काभ्रे — पूर्वाधार अभावका कारण धुले मैदानमा नै काभ्रे गोल्डकप फुटबलको तयारी पूरा गरिएको छ । ए डिभिजनका ५ क्लबसहित १० टिमको सहभागितामा बिहीबारदेखि चैत १७ सम्म हुने प्रतियोगिताका लागि धुलिखेलस्थित मैदान मर्मत तथा अस्थायी पूर्वाधार निर्माण गरिएको हो । 

काभ्रे गोल्डकप आयोजना हुने धुलिखेलस्थित खेलमैदान । तस्बिर : नगेन्द्र/कान्तिपुर

बिहीबार उद्घाटन खेलमा आयोजक काभ्रे जिल्ला फुटबल संघ र ललितपुरको फ्रेन्ड्स क्लब भिड्ने संयोजक निरोज श्रेष्ठले जानकारी गराए । जिल्लामा पहिलो पटक ए डिभिजन क्लबसमेतको सहभागितामा काभ्रे गोल्डकप हुन लागेको हो ।

Citizen

प्रतियोगितामा विभागीय टिम आर्मी, एपिएफ, संकटा, जावलाखेल, फ्रेन्ड्ससहित प्लेअफ अत्तरिया र काभ्रे, भक्तपुर, दोलखा र सिन्धुपाल्चोक जिल्ला फुटबल संघ १० टिमको सहभागिता रहने छ । विजेताले ४ लाख र उपविजेताले २ लाखसहित ट्रफी पाउनेछन् । अखिल नेपाल फुटबल संघसँगको सहकार्यमा हुने प्रतियोगितालाई जिल्लाका स्थानीयतह र संघसंस्थाले संहयोग गरेका छन् ।

‘जिल्लामा स्ट्यान्डर्ड साइजको खेल मैदान यही हो,’ उपाध्यक्ष श्रेष्ठले भने, ‘पनौतीमा क्षेत्रीय रंगशाला बन्न समय लाग्ने देखिएकाले उपलब्ध पूर्वाधारमा नै प्रतियोगिता गरेका हौं ।’ जग्गा विवादका कारण पनौतीमा रंगशाला निर्माणमा ढिलाइ हुँदै आएको छ ।

धुलिखेलस्थित सार्वजनिक जग्गालाई काभ्रे जिल्ला फुटबल संघले नगरपालिकामार्फत प्रयोगमा ल्याएर पूर्वाधार विकास गरिरहेको छ । प्रतियोगिताका लागि ढुंगा टिप्ने र माटो सम्याउने काम भइरहेको श्रेष्ठले बताए । ‘प्रतियोगिता अवधिभर धुलो उड्न दिँदैनौं, खेल अवधिमा तीन पटकसम्म पानी हाल्नेछौं,’ संयोजक श्रेष्ठले भने, ‘यसअघि जिल्ला लिगलगायत प्रतियोगिता पनि यसरी नै गर्दै आएका छौं ।’

गोल्डकपका लागि अस्थायी रूपमा प्रयोग गर्न फलामको प्यारापिट पनि निर्माण गरिएको छ । ८ सयसम्म पनि खेल हेर्नसक्ने गरी पूर्वाधार बनाइएको आयोजकको दाबी छ । मैदानका लगि धुलिखेल नगरपालिकाले गत वर्ष १० लाख र एन्फाले १० लाख बजेट उपलब्ध गराएका थिए ।

२२ वर्षअघि जिल्ला फुटबल संघ गठन भए पनि गोल्डकप हुन लागेको यो पहिलो हो । संघका अर्का उपाध्यक्ष महेशकुमार कर्माचार्यले बनेपा, पनौतीलगायतका स्थानमा पनि फूर्वाधार बन्ने क्रम रहेकाले त्रमशः अन्य स्थानमा पनि प्रतियोगिता गरिने बताए ।

बनेपास्थित बनेपा बहुप्राविधिक महाविद्यालयको मैदान, नमोबुद्धको पिपलटार, तेमाल नारायणस्थान, रोशीको मंगलटारमा रहेका मैदानमा नाइन–ए–साइड प्रतियोगिता हुँदै आएको छ । काठमाडौं विश्वविद्यालय, प्रहरी स्कुल, मल्पी स्कुलमा खेलमैदान भए पनि त्यहाँ आन्तरिक प्रतियोगिता मात्रै हुँदै आएको छ ।

पूर्वाधार अभावका कारण खेलाडी उत्पादनलगायतका विषयमा मार परिरहेको कर्माचार्यले बताए । ‘सानो खेलमैदानमा अभ्यास गरेका खेलाडीले ठूलोमा राम्रो प्रस्तुति दिन सक्दैनन्, पूर्वाधार नभएपछि प्रतियोगिता नै आयोजना गर्न सकिएको छैन,’ कर्माचार्यले भने, ‘ए डिभिजन क्लबहरू आउनै मान्दैनन्, आइहाले पनि प्रतियोगिताको लागत नै बढ्छ ।’

४५ लाख खर्च हुने अनुमान गरिएको प्रतियोगिताका आयोजक दाताकै भरमा छन् । उपत्यकासँग जोडिएको जिल्लामा पूर्वाधार र प्रतियोगिता नहुँदा खेलाडी कम उत्पादन भएका छन् । काभ्रेका जर्जप्रिन्स कार्की आर्मी र राष्ट्रिय टोलीमा छन् भने प्रिजन तामाङ यू–१९ राष्ट्रिय टोलीमा छन् ।

प्रकाशित : चैत्र ७, २०७५ ०७:४९
ADVERTISEMENT
प्रतिक्रिया
पठाउनुहोस्

बागलुङ रंगशालाको डीपीआर तयार

प्रकाश बराल

बागलुङ — बांगेचौर मैदानलाई व्यवस्थित रंगशाला बनाउन विस्तृत परियोजना प्रतिवेदन (डीपीआर) तयार भएको छ । जिल्ला खेलकुद विकास समितिले समितिले सदरमुकामस्थित उक्त मैदान र ढोरपाटनमा हाई अल्टिच्युड ट्रेनिङ सेन्टरका लागि प्रतिवेदन तयारीको काम गरिरहेको थियो । 

डीपीआर तयारीसँगै रंगशाला बनाउन लागिएको बागलुङको बांगेचौर खेल मैदान । तस्बिर : प्रकाश/कान्तिपुर

ढोरपाटनको काम जग्गा व्यवस्थापनमा ढिलाइ भएकाले रोकिए पनि बांगेचौरको डीपीआर तयार भएको समिति अध्यक्ष धनबहादुर परियारले बताए । युवा तथा खेलकुद मन्त्रालय र राष्ट्रिय खेलकुद परिषद्ले जिल्ला खेलकुद विकास समितिको सहकार्यमा डीपीआर तयार पारेको जानकारी उनले दिए ।

‘बांगेचौर मैदानमा सुविधायुक्त प्यारापिट, एथलेटिक्स र इन्डोर खेलहरूका लागि पूर्वाधारसहितका संरचना बनाउन सकिने डीपीआरमा छ,’ उनले भने, ‘तयारीका लागि समितिले २० लाख खर्चेको छ । डीपीआरअनुसार काम गर्न १५ करोड ४० लाख रुपैयाँ खर्च हुने अनुमान छ ।’

योजनाअनुसारको काम र बजेट माग गर्न अब प्रदेश र संघीय सरकारमा जाने तयारी गरिएको अध्यक्ष परियारले बताए । समितिले चालु वर्षभित्रै खर्च गर्नेगरी बागलुङमै कभर्डहल निर्माणका लागि ३० लाख, दुर्लेबेसी खेल मैदान निर्माण गर्न २० लाख, मदन भण्डारी स्पोर्टस एकेडेमीका लागि २० लाख र बांगेचौर खेल मैदान सम्याउन २० लाख बजेट लगानी गरिरहेको छ । ती स्थानमा प्राविधिक र निर्माणको काम पनि थालिएको छ ।

समितिले चालु वर्षमै ढोरपाटनमा पनि चिसो मौसममा खेल खेल्न सकिने मैदानको डीपीआर बनाउन लागेको हो । उक्त स्थानमा भने आवश्यक जग्गा उपलब्ध गराउन कानुनी र प्रक्रियागत झन्झटले ढिला हुने भएको छ । कम्तीमा एकसय रोपनी जमिन उपलब्ध गराएपछि उक्त स्थानमा मैदान बनाउने मन्त्रालय र परिषदले प्रतिवद्धता जनाइसकेका छन् । जग्गा छनोटका लागि ढोरपाटन नगरपालिका, खेलकुद विकास समिति र स्थानीयको पहल भइरहेको हो ।

अवलोकनका लागि परिषदले इन्जिनियर प्रनिश ताम्राकारको नेतृत्वमा प्राविधिक खटाएर प्रारम्भिक अध्ययन गरिसकेको छ । ‘जग्गा भयो भने काम गर्न समस्या छैन, जग्गा व्यवस्थापनका लागि भनेका छौं,’ परियारले भने, ‘आवश्यक पूर्वाधार बनाउन सकियो भने नेपालकै उत्कृष्ट खेल गन्तव्य हुनेछ ।’ यहाँ अन्तर्राष्ट्रिय मापदण्डअनुसार फुटबल मैदान र सुविधासम्पन्न कभर्डहल निर्माण गर्ने मन्त्रालयको योजना छ ।

कभर्डहलमा ‘इन्डोर’ खेलहरू सञ्चालन हुनेछन् भने मैदानमा क्रिकेट, फुटबल र अन्य खेलको अभ्यास र राष्ट्रिय प्रतियोगता गर्न सकिन्छ । प्रारम्भिक अध्ययनका लागि मन्त्रालयले चालु वर्ष ३० लाख रुपैयाँ बजेट दिएको छ । समितिले उत्तरगंगा नजिकैको एक स्थान र छेन्टुङको अर्को मैदानलाई सिफारिस गरेपछि जग्गा प्राप्तिको तयारी भएको हो ।

प्रकाशित : चैत्र ७, २०७५ ०७:४८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT