माला र विमला भिड्ने

कान्तिपुर संवाददाता

बाँके — आठौं राष्ट्रिय खेलकुदमा २८ औं पुरुष तथा नवौं महिला बक्सिङ प्रतियोगितामा आइतबार एपीएफकी माला राई र आर्मीकी विमला श्रेष्ठ फाइनल पुगेका छन् ।

बाँकेको खजुरामा जारी महिला बक्सिङमा प्रतिस्पर्धा गर्दै खेलाडी । तस्बिर : राखेप

बाँकेको खजुरास्थित ज्ञानोदय माविको मैदानमा महिला ५१ केजी तौल समूहमा मालाले प्रदेश १ की रोशिना लावतीलाई रेफ्री स्टप कन्टेस्ट (आरएससी) को आधारमा हराइन् । विमलाले प्रदेश ३ की रोशनी राईलाई अंकको आधारमा ५–० अंकले हराइन् ।

महिला ६४ केजीमा आर्मीकी पुनम रावलले प्रदेश १ की तृषा जागेबु लिम्बुलाई आरएससीका आधारमा हराएर फाइनल तय गरिन् । अर्को सेमिफाइनलमा एपीएफकी विनिता थापा मगरले प्रदेश ५ की माया चौधरीलाई हराइन् । त्यसअघि ५४ केजीको क्वाटरफाइनलमा प्रदेश ३ की शिवानी श्रेष्ठ र पुलिसकी निशा तामाङले सेमिफाइनल पक्का गरेका छन् । शिवानीले प्रदेश ५ की सुष्मा पुनलाई अंकको आधारमा ४–१ ले हराइन् । निशाले प्रदेश ७ की हरिना ऐरलाई ५–० अंकले हराइन् । एपीएफकी सन्जुमाया थिङ प्रदेश ४ की जोसिका श्रेष्ठलाई नकआउट हान्दै सेमिफाइनल पक्का गरिन् ।

महिला ५७ केजीमा आर्मीकी चन्द्रकला थापा, एपीएफकी माया चौधरी, प्रदेश ७ की भावना ऐरी र प्रदेश १ की दिया लिम्बु सेमिफाइनल पुगेका छन् । चन्द्रकलाले प्रदेश ३ की कुसुम तामाङ, मायाले प्रदेश ४ की माया गुरुङ र भावनाले प्रदेश ६ की राधा बिकलाई हराए । दियाले प्रदेश ५ की लक्ष्मी घर्तीमगरलाई अंकको आधारमा हराइन् ।

६० केजी तौल समूहको सेमिफाइनलमा प्रदेश ५ की संगीता दंगाल, प्रदेश ७ की संगीता चौधरी र आर्मीकी सविना श्रेष्ठले स्थान बनाए । संगीताले प्रदेश ६ की रिता बिकलाई अंकको आधारमा ४–१ ले हराए । संगीता चौधरीले प्रदेश ४ की अस्मिता बस्नेतलाई आरएससी आधारमा पराजित गरिन् । सविनाले प्रदेश १ की रन्जिता मगरलाई पन्छाइन् ।

प्रकाशित : वैशाख २, २०७६ ०७:३९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

हारेर जितिन्

मधु शाही

बाँके — दुवै खुट्टा खोच्याउँदै हिँडेकी पुष्पा भण्डारीलाई देख्नेहरूले कठै र विचारा भाव दर्शाउँथे । उनको अनुहारमा भने सान्त्वनाको कुनै किरण झल्किँदैनथ्यो । अरु सवलांग खेलाडीजस्तै प्रफुल्लित र निडर भएर उनी जुडोको एरिनामा उत्रेकी थिइन् । 

प्रतिस्पर्धामा पुष्पा भण्डारी र शारदाकुमारी खत्री। तस्बिर : केशव थापा/कान्तिपुर

नेपालगन्जमा जारी आठौं राष्ट्रिय खेलकुदअन्तर्गत आइतबार जुडो सुरु भएको छ । महिला तौल समूहमा सल्यानकी १९ वर्षीया पुष्पाले खेलमा हारेर पनि जित हासिल गरिन् । दुवै पैतालो गुमाएकी उनी सवलांग खेलाडीसँग निरन्तर जुधिरहिन् । उनको हिम्मतिलो प्रदर्शन सेमिफाइनलभन्दा अगाडि बढ्न सकेन । तर दर्शक र निणार्यकहरूले जितेसरह उनलाई प्रशंसा गरिदियो ।

दर्शक शारीरिक समस्या भएकी पुष्पाको हिम्मत देखेर चकित भए । खेलमा विजेता हुनु र नहुनु प्राविधिक पक्ष मानिन्छ । पुष्पाको सन्दर्भमा आमधारणा बेग्लै थियो । शारीरिक सक्षम भएका खेलाडीसँग दुवै पैताला गुमाएकी उनी प्रतिस्पर्धामा उत्रन सक्नु नै बहादुरी थियो । उनी सल्यान रानीकोट–८ की हुन् । ४८ केजी तौल समूहमा उनले सुरुआतका तीन खेल जितिन् । प्रदेश ५ की
शारदाकुमारी खत्रीसँग भने उनी हारिन् । जुन कांस्य पदकको भिडन्त थियो ।

उनले सन् २००७ मा दक्षिण एसियाली जुडोमा वेस्ट प्लेयरको अवार्ड पाएकी थिइन् । ९ वर्षदेखि जुडोमा सक्रिय उनले यही खेलमा आफ्नो भविष्य देखेकी छन् । ‘म हारे पनि सधैं जितेकै महसुस गर्छु,’ उनी भन्छिन्, ‘किनकि म अरुभन्दा विशेष अवस्थाकी खेलाडी हुँ ।’ जुडोमा दृष्टिविहीन र बहिराका लागि छुट्टाछुट्टै प्रतियोगिता हुने व्यवस्था छ । तर पुष्पाजस्ता शारीरिक बनावटमा समस्या भएकाहरूले भने सवलांगसँगै जुध्नुपर्ने बाध्यता छ ।

जुडो प्रशिक्षक मोहन सुनुवारका अनुसार पुष्पाले खुट्टाकै समस्याका कारण पदक जित्न नसकेको बताए । यद्यपि उनी कहिल्यै दुःखी हुँदिनन् । हरेक प्रतियोगितामा सहभागिता जनाउन उनी छोडदनन् ।

पुष्पाले दुवै खुट्टाको पैताला ६ वर्षकी छँदा नै गुमाएको सुनाइन् । अगेनाछेउ उनलाई राखेर आमा बाख्रा सार्न र बावु आलु खन्न गएका थिए । पुष्पा बामे सर्दै आगोको चुल्होमा पुगिन् । आगोले उनको पैताला जल्यो । उपचारका क्रममा आगोले जलेका भाग काट्नुपरेको पुष्पाले सुनाइन् ।

भर्खर १० कक्षामा पढै गरेकी पुष्पाको सपना धेरै छैन । माक्र खेलमै सत्रिय भएर एउटा परिचय बनाउने छ । ‘म खेलिरहन्छु,’ उनी भन्छिन्, ‘यही खेलले कहाँ पुर्‍याउँछथाहा छैन ।’

मनितालाई स्वर्ण

१६ औं राष्ट्रिय जुडोको पहिलो दिन सात स्वर्णको फैसला हुँदा सागकी पदकधारी पुलिसकी मनिता श्रेष्ठ प्रधानले स्वर्ण जितेकी छन् । उनले महिला ५७ केजीमुनि फाइनलमा प्रदेश ३ की कविता नेपालीलाई हराइन् । प्रदेश ३ की देवकीमाया श्रेष्ठ र गण्डकीकी सुमी थापा तेस्रो भए ।

४८ केजीमुनि प्रदेश ५ की सोनिया भट्टले एपीएफकी धनदेवी रोकायालाई हराएर स्वर्ण जितिन् । प्रदेश ५ की शारदाकुमारी खत्री र प्रहरीकी रत्ना तामाङ तेस्रो भए ।

७० केजीमुनि पुलिसकी निशा चौधरी विजेता भइन् । फाइनलमा निशाले आर्मीकी विनिता मगर खत्रीलाई पन्छाइन् । प्रदेश ३ की रञ्जना खडा र आर्मीकी रचना श्रेष्ठ तेस्रो बने ।

पुरुष ६० केजीमुनि पुलिसका उमेश मगरले बाजी मारे । उनले फाइनलमा आर्मीका कर्मा तामाङलाई हराए । एनआरएनका मोहन बम र पुलिसका सुदेश दोङले कांस्य जिते । ६६ केजीमुनि फाइनलमा पुलिसका इन्द्रबहादुर श्रेष्ठले प्रदेश ३ का सुनील नगरकोटीलाई हराएर स्वर्ण जिते । एपीएफका निर्दोष चलाउनेले कांस्य जिते । ८१ केजीमुनि आर्मीका पवनकुमार श्रेष्ठ तथा १०० केजीमाथि पुलिसका राजन जोशीले स्वर्ण जिते ।

फाइनलमा पवनले पुलिसका मनीष महतो र राजनले प्रणितसिंह ठकुरीलाई हराए ।८१ केजीमा एपीएफका लेलिन डंगोल र प्रदेश २ का गुड्डुकुमार सकानु तथा १०० केजीमाथि सुदूरपश्चिम प्रदेशका आशिष ओझा तेस्रो स्थानमा रहे ।

प्रकाशित : वैशाख २, २०७६ ०७:३७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT