रातारात रंगशाला बन्दै

दुर्गालाल केसी

दाङ — आठौं राष्ट्रिय खेलकुदको महिला फुटबल र एथलेटिक्स प्रतियोगिता हुने बेलझुण्डी रंगशाला रातारात निर्माण भइरहेको छ । खेलको समय नजिकिँदा पनि रंगशाला तयार नभएपछि रातारात काम जारी छ ।

आठौं राष्ट्रिय खेलकुदका लागि दाङको बेलझुण्डीमा निर्माण भएको रंगशालामा दुबो लगाउने र सिंचाइ गर्ने काम गरिँदै । एथलेटिक्सका लागि तयार रंगशालाको सेन्थेटिक ट्र्याक (माथि) ।तस्बिर : दुर्गालाल/कान्तिपुर

मैदान निर्माण गरेर दुबो लगाउने र सिंचाइ गर्ने काम भइरहेको छ । मैदानवरपर रनिङ प्यारापिट बनाउने काम पनि अन्तिम चरणमा पुगेको जनाइएको छ । वैशाख ४ देखि खेल हुने तालिका सार्वजनिक भइसकेकाले रातारात रंगशालाको काम गरिरहेको निर्माण कम्पनी दिवा/एमए/प्रतिष्ठा कन्स्ट्रक्सन जेभीका साइट इन्चार्ज प्रकाश पोखरेलले बताए । ‘रातभर नसुतेर काम गरिरहेका छौं । खेल समय अगाडि आइसकेकाले वैशाख ३ सम्म हामीले मैदान तयार पारिसक्नुपर्नेछ,’ उनले भने, ‘४ गते बिहान खेल्न मिल्ने बनाएर हस्तान्तरण गर्छौं ।’

भर्खंरै दुबो लगाउने र सिंचाइ गर्ने काम भइरहेकाले तत्काल खेल्न नमिल्ने भन्दै घोराहीको भरतपुर चौरलाई वैकल्पिक मैदानका रूपमा लिइएको छ । पोखरेलले भने रंगशालालाई नै खेल्न मिल्ने बनाइने दाबी गरे । ‘सबै काम अन्तिम चरणमा पुगिसकेको छ । खेल समयसम्म तयार पार्ने योजनाअनुसार नै रातारात काम गरिरहेका छौं,’उनले भने, ‘खेलमा कुनै असर पर्दैन । तोकिएको समयमै खेल्न मिल्छ । अब अन्तिममा केही साना कामहरू मात्रै बाँकी छन् ।’

फुटबल मैदान, साधारण प्यारापिट र सेन्थेटिक ट्रयाक निर्माण भइसकेको पोखरेलले बताए । उनका अनुसार तोकिएका काममध्ये भीआईपी प्यारापिट, चेन्जिङ रुम, बैठक रुम र भीआईपी तथा मिडियाकक्ष निर्माणको काम बाँकी छ । यी काम राष्ट्रिय खेलकुदपछि निर्माण हुन्छ ।

असार ७ मा सम्झौता भएको रंगशाला निर्माणको समय मंसिर ८ मा सकिएको थियो । फेरि समय थप गरी जेठ मसान्तसम्म लम्ब्याइएको हो । २४ करोड २४ लाख ४५ हजार २ सय ९३ रुपैयाँको लागतमा रंगशाला निर्माण भइरहेको छ । विभिन्न प्राविधिक समस्याले निर्माणमा ढिलाइ भएको पोखरेलले बताए । ‘सुरुमा माटो भरियो, पछि फेरि माटो खनेर मैदान गहिरो बनाउनुपर्ने भयो । पहिले मैदान पूर्वपश्चिम थियो । पछि अन्तर्राष्ट्रिय मापदण्डअनुसार उत्तरदक्षिणको बनाइयो,’ उनले भने, ‘वर्षामा हिलो भएर काम नै गर्न सकिएन । यस्ता प्राविधिक समस्याले समयमा रंगशालाकोकाम हुन सकेन ।’

सेन्थेटिक ट्र्याकको दोस्रो ठूलो रंगशाला
बेलझुण्डीको रंगशाला सेन्थेटिक रनिङ ट्र्याकको काठमाडौंको दशरथ रंगशालापछि दोस्रो ठूलो भएको निर्माण कम्पनीका साइट इन्जिनियर गोकर्ण अधिकारीले बताए । ‘सेन्थेटिक ट्र्याक जडान गरेर काठमाडौंपछि अरु रंगशालामा अहिलेसम्म काम भएको छैन । यो देशकै दोस्रो ठूलो हो । सेन्थेटिक जडानको काम पनि सकिन लागेको छ,’ उनले भने, ‘यसले दौडन सजिलो बनाउँछ । लचकदार रबर हुने भएकाले खेलाडीलाई कठिन हुँदैन ।’

सेन्थेटिक ट्र्याक ४ सय रनिङ मिटरको रहेको र एकसाथ आठ खेलाडी दौडन मिल्ने अधिकारीले बताए । उनका अनुसार रनिङ ट्र्याकभित्र १ सय ६ मिटर लम्बाई र ६८ मिटर चौडाइको खेलकुद मैदान रहेको छ । ‘फुटबलका लागि पर्याप्त मैदान छ । रनिङका लागि सुविधासम्पन्न आधुनिक ट्र्याक बनेको छ,’ उनले भने, ‘यो राष्ट्रिय खेलकुद पछि पनि उपयोगी र महत्त्वपूर्ण रंगशाला हुन्छ ।’ मैदानमा पानी जम्न नदिन जमिनमुनि पाइप जडान गरी नालीमा जोडिएको उनले बताए । यसबाट जुनसुकै बेला पनि खेलकुद मैदान उपयोगमा सहजता हुने उनको भनाइ छ ।

रातारात मैदान निर्माण गरेर प्रतियोगिता सफलतापूर्वक सम्पन्न गर्ने प्रयासमा रहेको जिल्ला खेलकुद विकास समितिका अध्यक्ष डिल्ली डाँगीले बताए । ‘सबै संरचना तयार हुने अवस्था छैन । खेल मैदान भने तयार गरिसक्ने योजनामा छौं,’ उनले भने, ‘तोकिएका खेलहरू सम्पन्न गर्न हामी तत्पर छौं । निर्माण कम्पनीलाई पनि तोकिएको समयमा तयार पारिसक्न निरन्तर दबाब दिएका छौं ।’

प्रकाशित : वैशाख २, २०७६ ०७:४०
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

माला र विमला भिड्ने

कान्तिपुर संवाददाता

बाँके — आठौं राष्ट्रिय खेलकुदमा २८ औं पुरुष तथा नवौं महिला बक्सिङ प्रतियोगितामा आइतबार एपीएफकी माला राई र आर्मीकी विमला श्रेष्ठ फाइनल पुगेका छन् ।

बाँकेको खजुरामा जारी महिला बक्सिङमा प्रतिस्पर्धा गर्दै खेलाडी । तस्बिर : राखेप

बाँकेको खजुरास्थित ज्ञानोदय माविको मैदानमा महिला ५१ केजी तौल समूहमा मालाले प्रदेश १ की रोशिना लावतीलाई रेफ्री स्टप कन्टेस्ट (आरएससी) को आधारमा हराइन् । विमलाले प्रदेश ३ की रोशनी राईलाई अंकको आधारमा ५–० अंकले हराइन् ।

महिला ६४ केजीमा आर्मीकी पुनम रावलले प्रदेश १ की तृषा जागेबु लिम्बुलाई आरएससीका आधारमा हराएर फाइनल तय गरिन् । अर्को सेमिफाइनलमा एपीएफकी विनिता थापा मगरले प्रदेश ५ की माया चौधरीलाई हराइन् । त्यसअघि ५४ केजीको क्वाटरफाइनलमा प्रदेश ३ की शिवानी श्रेष्ठ र पुलिसकी निशा तामाङले सेमिफाइनल पक्का गरेका छन् । शिवानीले प्रदेश ५ की सुष्मा पुनलाई अंकको आधारमा ४–१ ले हराइन् । निशाले प्रदेश ७ की हरिना ऐरलाई ५–० अंकले हराइन् । एपीएफकी सन्जुमाया थिङ प्रदेश ४ की जोसिका श्रेष्ठलाई नकआउट हान्दै सेमिफाइनल पक्का गरिन् ।

महिला ५७ केजीमा आर्मीकी चन्द्रकला थापा, एपीएफकी माया चौधरी, प्रदेश ७ की भावना ऐरी र प्रदेश १ की दिया लिम्बु सेमिफाइनल पुगेका छन् । चन्द्रकलाले प्रदेश ३ की कुसुम तामाङ, मायाले प्रदेश ४ की माया गुरुङ र भावनाले प्रदेश ६ की राधा बिकलाई हराए । दियाले प्रदेश ५ की लक्ष्मी घर्तीमगरलाई अंकको आधारमा हराइन् ।

६० केजी तौल समूहको सेमिफाइनलमा प्रदेश ५ की संगीता दंगाल, प्रदेश ७ की संगीता चौधरी र आर्मीकी सविना श्रेष्ठले स्थान बनाए । संगीताले प्रदेश ६ की रिता बिकलाई अंकको आधारमा ४–१ ले हराए । संगीता चौधरीले प्रदेश ४ की अस्मिता बस्नेतलाई आरएससी आधारमा पराजित गरिन् । सविनाले प्रदेश १ की रन्जिता मगरलाई पन्छाइन् ।

प्रकाशित : वैशाख २, २०७६ ०७:३९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT