टिम स्वर्ण आर्मी र एपीएफलाई 

कान्तिपुर संवाददाता

दाङ — ब्याडमिन्टनको महिला टिम इभेन्टको स्वर्ण एपीएफले जितेको छ । एपीएफले आर्मीलाई २–१ ले पराजित गर्दै स्वर्ण जित्दा सुदूरपश्चिम र प्रदेश १ ले कांस्य जिते । 

घोराहीमा जारी महिला बास्केटबलमा प्रतिस्पर्धा गर्दै एपीएफ (सेतो) र पुलिसका खेलाडी ।तस्बिर : दुर्गालाल केसी/कान्तिपुर

पुरुष टिमको स्वर्ण भने आर्मीले एपीएफलाई ३–२ ले पराजित गर्दै जितेको थियो । टिम इभेन्टको पुरुष एकलतर्फ राष्ट्रिय नम्बर एक खेलाडी रत्नजित तामाङलाई एपीएफका दीपेश धामीले २१–११, २१–१२ ले हराएर एक गेमको अग्रता दिलाए ।

एपीएफका सुदीप सेढाईंलाई आर्मीका नवीन श्रेष्ठले हराएर खेल १–१ बराबरी गरे । एपीएफका गौतम कठायतले आर्मीका प्रफुल महर्जनलाई पराजित गरी पुन अग्रता दिलाए । पुरुष एकलमा हार बेहोरेका रत्नले नवीनसँग मिलेर एपीएफका दीपेश र विजित थापामगरको जोडीलाई पराजित गर्दै गेम २–२ को बराबरी बनाए । आर्मीका प्रफुल र रुकेश महर्जनको जोडीले एपीएफका साजनकृष्ण ताम्राकार र सुदीपको जोडीलाई पराजित गरेपछि आर्मीले खेल ३–२ ले जित्यो ।

पुरुष टिममा पुलिस र सुदूरपश्चिम कांस्य जिते । एपीएफले सेमिफाइनलमा पुलिसलाई ३–० र आर्मीले सुदूरपश्चिमलाई ३–१ ले हराएका थिए । सुदूरपश्चिमका प्रिन्स दाहालले नम्बर एक खेलाडी रत्नजितलाई २१–१८, २१–१४ ले हराएर सनसनी मच्चाए ।

घोराहीस्थित कभर्डहलमा जारी स्पर्धाको पुरुष एकलतर्फ पुलिसका पूर्णबहादुर बोहराले प्रदेश ३ का भोजबहादुर गुरुङलाई २१–१३, २१–१२ ले, प्रदेश ५ का विश्व नेपालले सुदूरपश्चिमका प्रियांशु सिंह क्षेत्रीलाई ११–२१, २१–१३, २१–६ ले र पुलिसका जीवन आचार्यको प्रदेश ३ का निश्चल बस्नेतलाई २१–७, २१–११ ले हराए ।

बास्केटबल
आठौं राष्ट्रिय खेलकुदको घोराहीमा भइरहेको बास्केटबलमा सोमबार महिलातर्फ चार खेल भएका छन् । प्रदेश ३, सुदूरपश्चिम, त्रिभुवन आर्मी र पुलिस क्लब सेमिफाइनल पुगेका छन् । प्रदेश ३ ले प्रदेश ५ लाई ४५–१२ ले, आर्मीले प्रदेश ४ लाई ३१–५ ले, सुदूरपश्चिमले प्रदेश १ लाई २९–३३ स्कोरले हराए । एपीएफलाई ३५–५७ अंकले हराउँदै पुलिसले अन्तिम चारको यात्रा तय गरेको छ । आफ्नो टिमलाई जिताउने क्रममा प्रदेश ३ की सदिना श्रेष्ठले १३, आर्मीकी सुमन्ता खड्काले १५, प्रदेश ७ की अनीता भण्डारीले १७ र पुलिसकी एलिसा मल्लले १५ स्कोर गरे ।

सेमिफाइनलमा प्रदेश ३ ले आर्मी र सुदूरपश्चिमले पुलिससँग खेल्नेछन् ।

पुरुषतर्फ प्रदेश ३, आर्मी, प्रहरी र गण्डकी सेमिफाइनलमा पुगेका छन् । प्रदेश ३ ले एपीएफलाई ६०–५१, आर्मीले प्रदेश १ लाई ७६–५५, पुलिसले प्रदेश ५ लाई ६८–४२ र गण्डकीले सुदूरपश्चिम प्रदेशलाई ७७–४४ स्कोरले हराए । प्रदेश ३ का सदीश प्रधानले १९, आर्मीका आयुश सिंहले १६, पुलिसका रितेश मगरले १७ र गण्डकीका सुदीप कार्कीले २१ स्कोर जोडे । सेमिफाइनलमा पुलिसले आर्मी र प्रदेश ३ ले गण्डकीसँग खेल्नेछन् ।

प्रकाशित : वैशाख ३, २०७६ ०७:५५
प्रतिक्रिया
पठाउनुहोस्

स्वर्णमा आर्मीको दाउ

दीपक परियार

लेखनाथ — राष्ट्रिय खेलकुदमा पहिलोपल्ट समावेश पाराग्लाइडिङमा जित हासिल गर्न सहभागी टिमको तयारी तीव्र बनेको छ । आठौं राष्ट्रिय खेलकुदअन्तर्गत पोखरामा वैशाख ६ देखि ९ सम्म हुने प्रतियोगितामा सहभागी हुने टिमले विभिन्न स्थानमा तयारी गरिरहेका हुन् । 

आठौं राष्ट्रिय खेलकुदमा पहिलोपल्ट समावेश पाराग्लाइडिङ प्रतियोगितामा सहभागी हुने आर्मीका खेलाडी पोखरामा अभ्यास गर्दै ।तस्बिर : दीपक/कान्तिपुर

प्रतियोगितामा एक्युरेसी टिम र व्यक्तिगत (महिला/फुरुष) र क्रसकन्ट्री टिम र व्यत्तिगत (महिला/पुरुष) गरी ६ स्पर्धामा खेल हुँदै छ । एक्युरेसी र क्रसकन्ट्रीको पुरुषतर्फ प्रदेश १, प्रदेश ३, गण्डकी प्रदेश र विभागीय टोली आर्मी क्लब सहभागी हुँदै छन् । कर्णाली र प्रदेश ७ ले भने एक्युरेसीको पुरुष टिममात्रै खेलाडी उतार्दै छ ।

प्रदेश १ का खेलाडीले धरानमा अभ्यास गरिरहेका छन् । प्रदेश ३ का आधा खेलाडी काठमाडौं र आधाले पोखरामा अभ्यास गरेका छन् । गण्डकी, प्रदेश ६, ७ र आर्मीका खेलाडीले पोखरामै अभ्यास गरिरहेका छन् । आर्मीले व्यावसायिक खेलाडीलाई भित्र्याएको छ । आर्मीबाट १० पुरुष र ४ महिला खेलाडीले सहभागिता जनाउने छन् ।

एक्रोब्याट खेलाडी सुवास थापा टिम प्रशिक्षकका रूपमा आर्मी भित्रिएका छन् । एसियाडमा पदक ल्याउन सफल खेलाडी पनि आर्मी भित्रिएका छन् । एक्युरेसी टिमको कप्तानी विजय गौतमले सम्हाल्दै छन् । क्रसकन्ट्री टिमको कप्तान विशाल थापा चुनिएका छन् । दुवै एसियाडमा सहभागी खेलाडी हुन् । महिला खेलाडी दुर्गा गुरुङ, स्वस्तिका गुरुङ, ऋतु श्रेष्ठ र श्रृष्टि श्रेष्ठ आर्मीबाट खेल्दै छन् । आर्मीका प्रशिक्षक थापा धेरै पदक जित्नेमा आशावादी छन् । ‘धेरै बलिया खेलाडी हाम्रो टिममा छन्,’ उनले भने, ‘धेरै स्वर्ण हामीले नै ल्याउँछौं ।’

गण्डकीको टिमबाट पनि एसियाडमा पदक ल्याउन सफल खेलाडी सुशील गुरुङ र युकेश गुरुङ खेल्दै छन् । एसियाडमै सहभागी महिला खेलाडी तृष्णा श्रेष्ठ, प्रतिभा भुजेल र सविता तामाङ गण्डकीकै टिममा छन् । अन्य प्रदेशबाट सहभागी अधिकांस खेलाडी पोखरालाई कार्यक्षेत्र बनाएका मध्ये छन् ।

नेपाल प्याराग्लाइडिङ तथा ह्याङग्लाइडिङ संघ (नेफा) का महासचिव शैलेन्द्र राउत सबै टिम उत्तिकै बलियो भएको बताउँछन् । ‘सबै प्रदेशमा खेलाडी बाँडिएका छन्,’ उनी भन्छन्, ‘प्रदेशस्तरमा पहिलोपल्ट प्रतियोगिता भएकाले कसले जित्छ, यसै भन्नसक्ने अवस्था छैन ।’ पोखरामै हुने १३ औं साग खेलकुदमा पाराग्लाइडिङ पोखरामै हुने भएकाले खेलाडीमा निखारता ल्याउने उनले जनाए ।

खर्च भएन पूर्वाधारको बजेट
पाराग्लाइडिङ प्रतियोगिता पोखरामा हुने भएपछि राखेपले पूर्वाधार विकासमा १० लाख रुपैयाँ छुट्यायो तर उक्त रकम खर्च हुनै सकेन ।

पाराग्लाइडिङको उडान (टेकअफ) र अवतरण (ल्यान्डिङ) गर्ने स्थायी ठाउँ नभएकाले रकम खर्च हुन नसकेको बताउँछन् नेफाका महासचिव राउत । ‘महानगरले जग्गाको व्यवस्था गर्न सकेको छैन,’ उनी भन्छन्, ‘निजी जग्गामा सरकारले लगानी गर्न मिल्दैन ।’
पाराग्लाइडिङले कम्पनीले निजी जग्गा भाडामा लिएर उडान (टेकअफ) र अवतरण (ल्यान्डिङ) गर्दै आएका छन् । हाल पोखरा महानगरपालिका १८ को सराङकोट, तोरीपानी र मान्द्रेढुंगाबाट पाराग्लाइडिङ उडान हुन्छन् ।

सराङकोटबाट उड्नेले खपौंदी, तोरीपानीबाट उड्नेले चंखपुर र मान्द्रेढुंगाबाट उड्नेले पामेमा अवतरण गर्नुपर्छ । पाराग्लाइडिङ पोखराबाट रंगीचंगी चरा उडेजस्तै सुन्दर देखिए पनि उडान र अवतरणस्थल पुग्दा कुरुप देखिन्छ । उडान स्थलमा ढुंगैढुंगा निस्किएका छन् । धेरै भिरालो जमिनमा सुरक्षाको कुनै प्रबन्ध छैन । अवतरणस्थलमा आपतकालीन उद्दारको व्यवस्था छैन । उडान र अवतरण स्थलमा शौचालयसमेत छैनन् । दिशापिसाब गर्न पाइलट र यात्रु नजिकैको झाँडीमा पस्नुपर्ने बाध्यता छ ।

टेकअफ र ल्यान्डिङ स्थलको स्थायी व्यवस्थापन गर्न साबिकको सराङकोट गाविस र पाराग्लाइडिङ कम्पनीबीच पटक–पटक सम्झौतासमेत भएको थियो । गाविस महानगरमा गाभिएपछि स्थायी जग्गा व्यवस्था गर्न कुनै पहल हुन सकेको छैन ।

प्रकाशित : वैशाख ३, २०७६ ०७:५२
पूरा पढ्नुहोस्
प्रतिक्रिया
पठाउनुहोस्