नेपालले ओमानलाई १५० रनले हरायो
काठमाडौँ — उन्नाइस वर्षमुनिको आईसीसी (यू-१९) एकदिवसीय विश्वकप क्रिकेटको एशिया छनोट अन्तरगत मंगलबार भएको खेलमा नेपालले ओमानलाई १५० रनले पराजित गरेको छ ।
मलेसियाको शिलानगोर ट्रफ क्लबको मैदानमा मंगलबार भएको चौथो खेलमा टस हारेर पहिले ब्याटिङको निम्तो पाएको नेपालले ४३ दशमलव दुई ओभरमा सबै विकेट गुमाउँदै २२९ रन बनाएको थियो ।
जवाफी ब्याटिङ गर्न आएको ओमानले ४४.१ ओभरमा सबै विकेट गुमाएर मात्र ७९ रन बनाउन सफल भएको थियो । नेपालका लागि पवन सर्राफले ३ विकेट तथा प्रतिस जीसी, सूर्य तामाङले २-२ विकेट लिएका थिए । यस्तै कुशल मल्ल, भीम सार्की र कमलसिंह ऐरीले १-१ विकेट लिएका थिए ।
ओमानका लागि पुच्छारका दुई ब्याट्स्म्यानले मात्रै दोहोरो अंक जोड्न सफल भएका थिए ।
नेपाली टोलीका भने कप्तान रोहितकुमार पौडेलले सर्वाधिक ७५ रनको योगदान दिए । त्यसैगरी प्रतिष जिसीले ४१, भीम सार्कीले ३९, अभिषेक बस्नेतले १५ तथा रित गौतमले १० रन जोडे ।
बलिङतर्फ ओमानका मुजाहिर राजा, सञ्जय रवीन्द्र, जिल तन्ना र अजम अलीले २-२ विकेट झारे ।
यसअघि तीन खेल खेलेको नेपालले दुई खेलमा जित तथा एक खेलमा पराजय भोगेको छ ।
नेपालले पहिलो खेलमा सिङ्गापुरलाई २१७ रनको भारी अन्तरले पराजित गरेको थियो भने दोस्रो खेलमा युएइसँग एक रनले पराजित भएको थियो । यस्तै तेस्रो खेलमा नेपालले मलेसियालाई आठ विकेटले हराएको थियो ।
प्रकाशित : वैशाख ३, २०७६ १४:१९
