आठौं राष्ट्रिय खेलकुद : सुष्मिताको नयाँ कीर्तिमान

कान्तिपुर संवाददाता

बाँके — सुटिङतर्फ महिला १० मिटर एयर राइफलमा प्रदेश ३ की सुष्मिता नेपालले मंगलबार नयाँ राष्ट्रिय कीर्तिमान बनाएकी छन्  । सुष्मिताले २४० पूर्णांकमा २३४ अंक जोडदै स्नेहा राज्यलक्ष्मी राणाले राखेप च्याम्पियनसिपमा बनाएको २३३ अंकलाई भंग गर्दै कीर्तिमानी स्वर्ण जितिन्  ।

२२७ अंकमा आर्मीकी कल्पना परियार दोस्रो तथा २०३ अंकमा प्रहरीकी अस्मिता राई तेस्रो भइन् ।
नेपालगन्ज रंगशालास्थित सुटिङ रेन्जमा भएको प्रतियोगिताअन्तर्गत सोही स्पर्धाको पुरुषमा प्रदेश ५ का अर्नव घिमिरे पहिलो भए । उनले कुल २४० अंकमा २१६ अंक जोडे । २१४ अंक जोडेका प्रहरीका हरिबहादुर थापा दोस्रो तथा १९६ अंक जोडेका आर्मीका सुरेश चौधरी तेस्रो भए । विजेतालाई राष्ट्रिय खेलकुद परिषदका सदस्यसचिव केशवकुमार विष्टलगायतले एक कार्यक्रमबीच पुरस्कृत गरे ।

उसुमा आर्मीलाई १४ स्वर्णआठौं राष्ट्रिय खेलकुदअन्तर्गत १४ औं राष्ट्रिय उसुमा आर्मीले सर्वाधिक १४ स्वर्ण जितेको छ । आर्मीले थप १ रजत र ३ कांस्य पनि जित्यो । एपीएफले ५ स्वर्ण, ८ रजत र ५ कांस्य हात पार्‍यो । प्रहरीले २ स्वर्ण, १ रजत र ५ कांस्य प्राप्त गर्‍यो । २२ स्वर्णका लागि भएको प्रतिस्पर्धामा १ स्वर्ण कर्णाली प्रदेशले हासिल गर्‍यो ।

उसुको अन्तिम दिन मंगलबार थाउलोमा २ तथा सान्सौंमा ६ गरी ८ स्पर्धाका फाइनल भए । थाउलोको महिला चियन सु/छियाङ सुमा एपीएफकी कविता थापामगर पहिलो भइन् । कविताले १८.०५ अंक जोडिन् । सुदूरपश्चिम प्रदेशकी अलिशा खाती दोस्रो तथा आर्मीकी मुना शिरीष मगर तेस्रो भए । पुरुष ताव सु/कुन सुमा आर्मीका विश्व बुढा मगरले स्वर्ण जिते । उनले १८.९ अंक जोडे । एपीएफका कुमार सिन्जाली दोस्रो तथा प्रदेश ५ का राजीव तामाङ तेस्रो भए ।

सान्सौंको महिला ५२ केजीमा आर्मीकी एलिना चौधरीले सुदूर प्रदेशकी गौरी घर्ती मगर, ५६ केजीमा प्रहरीकी जुनी राईले एपीएफकी कमला बोहरा तथा ६० केजीमा आर्मीकी लुमन्ती श्रेष्ठले एपीएफकी निशा विकलाई फाइनलमा पराजित गर्दै पहिलो भए । महिला ६५ केजीमा एपीएफकी मनीषा रावतले प्रहरीकी पूजा गुप्ता, ७० केजीमा आर्मीकी विन्दु पुनमगरले प्रदेश १ की तनुजा सुन्दास र ७५ केजीमा आर्मीकी शीलु डंगोलले गण्डकीकी अनिशा आलेमगरलाई फाइनलमा पाखा लगाउँदै स्वर्ण जिते ।

प्रकाशित : वैशाख ११, २०७६ ०८:३५
प्रतिक्रिया
पठाउनुहोस्

गाउँले पाए संरचना, खेलाडीले सम्मान

ठाकुरसिंह थारू

बर्दिया — नेपाल आर्मीका खो खो खेलका प्रशिक्षक लक्षमीनारायण वैद्य प्रतिस्पर्धाका लागि खेलाडीको टोलीसहित बर्दिया ठाकुरबाबा नगरपालिका २ रानीपुर गाउँमा छन् । बर्दिया राष्ट्रिय निकुन्ज छेउको उक्त गाउँ पुग्ने सपनामा पनि सोचेका थिएनन् । आठौं राष्ट्रिय खेलकुद प्रतियोगिताले भने त्यो अवसर जुरायो ।

काठमाडौंको कोलहालमा बस्ने बानी परिसकेका उनलाई गाउँको वातावरणमा रमाउने अवसर जुरेको छ । ‘खो खो खेल ह्नुे ठाउँ नजिकै जंगल छ । खुला वातावरणको मजा नै फरक,’ वैद्य भन्छन्, ‘गाउँमा प्रतियोगिता भए पनि निकै रमाइलो भइरहेको छ । यहाँको समुदायले खेलाडीलाई सम्मान गरेर हौसला प्रदान गरिरहेका छन् ।’

उनले ठूला सहर र गाउँमा हुने प्रतियोगिता हेर्न दर्शकमा पनि निकै भिन्नता पाएको अनुभव सुनाए । गाउँका सर्वंसाधारणहरूले खेलाडीहरूलाई निकै माया दिएको उनको अनुभव छ । ‘प्रतियोगिता हेर्न सहरभन्दा गाउँमा बढी भीड लाग्दो रहेछ । यहाँका मान्छेहरूले माया दिएर खेलाडीको मनोबल बढाउन निकै सहयोग गरेका छन्,’ उनले कान्तिपुरसँग भने, ‘गाउँले दिएको सम्मानले खेलाडीलाई प्रतिस्पर्धा गर्न ऊर्जा थपेको छ ।’

सुदूरपश्चिम प्रदेशकी खो खो खेलाडी मनमती धामी पनि बर्दिया आएको पहिलोपल्ट हो । यसअघि बर्दिया आएको अनुभव उनीसँग छैन । खेलमा स्पर्धा गरिरहेकी उनले गाउँको वातावरणमा बस्न पाउँदा रमाइलो भइरहेको सुनाइन् ।

‘राष्ट्रिय प्रतियोगिता गाउँमा खेल्न पाउँदा रमाइलो लागेको छ । गाउँमा माया पाइएको छ,’ उनले गाउँ बसाइको अनुभव सुनाइन्, ‘खेल खेलिसकेपछि फुर्सदको समयमा गाउँमा घुमघाम गर्दा फरक अनुभव भइरहेको छ ।’ बर्दियाको सदरमुकाम गुलरियाबाहेक जिल्लामा खासै सहर छैन । सानातिना बजार छन् । यही जिल्लामा राष्ट्रियस्तरका चार प्रतियोगिता भइरहेका छन् ।

ग्रामीण क्षेत्रमा प्रतियोगिता सञ्चालन भइरहँदा गाउँले करोडौंका खेल भौतिक संरचना पाएका छन् । राष्ट्रियस्तरको प्रतियोगिता आयोजना भएका गाउँले मुलुकमा आफ्नो पहिचान पाएका छन् । मुलुकभरिबाट छनोट भएर स्पर्धा गर्न आएका खेलाडीले बर्दियालाई चिन्ने अवसर पाएका छन् । गाउँमा भइरहेका प्रतियोगितालाई भव्य रूपमा सम्पन्न गर्न स्थानीयहरू लागिपरेका छन् । उनीहरूले सम्मान दिएर खेलाडीलाई हौसला प्रदान गरिरहेका छन् ।

बर्दिया बाँसगढी नगरपालिका ४ मगरपुर गाउँमा सवा दुई करोडको कबड्डी एकेडेमी निमार्ण भएको छ । सामुदायिक वन नजिकै कबड्डी प्रतियोगिता भयो । स्पर्धाका लागि आएका खेलाडीहरू गाउँमा रमाए । ठाकुरबाबा नगरपालिका २ रानीपुरमा सवा दुई करोडमा खो कबर्ड हल निमार्ण भइसकेको छ । यहाँ महिला/पुरुष खो खो प्रतियोगिता आयोजना भइरहेको छ ।

ठाकुरद्वारामा चेस, गुलरिया नगरपालिका त्लुसीपुर गाउँमा सेपाकतक्रो (चुङ्गीजस्तै चोयाको बल) प्रतियोगिता भयो । यहाँ १ करोड ५ लाखको संरचना बनेको छ । गुलरियामा एथ्लेटिक्सका लागि सुर्की ट्र्याक निर्माण गरिएको छ । बर्दियाको बढैया तालमा हुने भनिएको ट्राइथलन प्रतियोगिता पोखरा सारिएको छ ।

त्यस्तै बाँकेको खजुरा गाउँपालिका सीतापुर गाउँमा महिला/पुरुष भलिवल प्रयोगिता आयोजना भयो । खजुरा डी गाउँमा फुटबल, बी गाउँमा पुरुष बक्सिङ र के गाउँमा महिला हक्की प्रतियोगिता भए । ‘राष्ट्रिय प्रतियोगिता आफ्नै गाउँमा गराउन पाउँदा हाम्रो लागि गौरवको विषय हो । मुलुकभरिका खेलाडीहरूलाई हाम्रो गाउँ चिनाउने अवसर पाइयो,’ खजुरा गाउँपालिका ३ का वडा अध्यक्ष तिलकवीर सुनार भन्छन् ।खेलकुद विकास समिति प्रदेश ५ का अध्यक्ष भीम वलीले राष्ट्रिय प्रतियोगिताले ग्रामीण खेलकुदको विकासमा टेवा पुगेको बताए । उनले गाउँगाउँमा खेलको मौहल छाएको जनाए ।

‘हाम्रो चाहना भनेकै ग्रामीण खेदकुदको विकास गर्नु नै थियो । त्यो उद्देश्य पूरा भएको छ,’ उनले भने, ‘प्रतियोगिताले गाउँमा खेलकुदले संरचना पाए । खेलाडीले सम्मान ।’ राष्ट्रिय प्रतियोगितामा ३५ खेल समाबेश गरिएका थिए । अधिकांश खेलहरू सम्पन्न भइसकेका छन् ।

प्रकाशित : वैशाख ११, २०७६ ०८:३४
पूरा पढ्नुहोस्
प्रतिक्रिया
पठाउनुहोस्