दोस्रो दिन सुवास अगाडि

कान्तिपुर संवाददाता

काठमाडौँ — एमेच्योर गल्फर सुवास तामाङ घिसिङले दोस्रो दिन पनि तीन अन्डर ६९ को प्रदर्शन गरेपछि सूर्य नेपाल प्रिमियर गल्फ च्याम्पियनसिपको दोस्रो चरण सकिँदा अग्रता हासिल गरेका छन् । 

गोकर्ण गल्फ कोर्समा मंगलबारको प्रदर्शनबाट सुवासको कुल स्कोर ६ अन्डर १३८ पुगेको छ । उनले पहिलो चरणमा अग्रता हासिल गरेका जयराम श्रेष्ठ र अर्का एमेच्योर शुक्रबहादुर राईलाई २ स्ट्रोकले पछि पारेका छन् ।

मंगलबार शुक्रको प्रदर्शन सबैभन्दा राम्रो रह्यो । उनले ६ अन्डर ६६ को स्कोर निकालेका थिए । जयरामले दोस्रो चरणमा लेभल पार ७२ को मात्र प्रदर्शन गर्न सके । दुवैको कुल स्कोर ४ अन्डर १४० को छ । दोस्रो चरणमा ५ अन्डर ६७ को प्रदर्शन गरेका रमेश अधिकारीको कुल ३ अन्डर १४१ स्कोर भएको छ ।

भुवन नगरकोटी र धनबहादुर थापाको समग्र स्कोर २ अन्डर १४२ छ । दोस्रो चरणमा भुवनले ५ अन्डर ६७ र धनले ३ अन्डर ६९ को प्रदर्शन गरेका थिए । सन्जोग मोक्तान र एमेच्योर टंकबहादुर कार्कीको समग्र स्कोर १ अन्डर १४३ छ ।

प्रकाशित : जेष्ठ १, २०७६ ०७:४३
ADVERTISEMENT
प्रतिक्रिया
पठाउनुहोस्

महिला क्रिकेट लिगमा पहिलो ड्राफ्ट

पोखरा पल्टन बलियो
कान्तिपुर संवाददाता

काठमाडौँ — नेपाली महिला क्रिकेटमा नयाँ अध्याय थप्दै वुमन्स च्याम्पियन्स लिग (डब्लूसीएल) ट्वान्टी-२० क्रिकेट लिगको ड्राफ्ट सकिएको छ । महिला क्रिकेटमा पहिलोपल्ट भएको ड्राफ्टबाट पोखरा पल्टन बलियो टोलीमा अगाडि आएको छ । 

क्वीन्स इभेन्टको आयोजनामा हुने भनिएको डब्लूसीएल समय र मैदान अभावसँग जुध्दै असोज तेस्रो सातालाई सरेको छ । मंगलबार गरिएको ड्राफ्टमा १ सय ९ खेलाडीले दर्ता गरेका थिए । त्यसमध्ये ७९ खेलाडीलाई प्रस्तुत गरियो । ५ फ्रेन्चाइज टोलीले ११-११ खेलाडी लिएका छन् ।

ड्राफ्टमा खेलाडीलाई तीन समूहमा वर्गीकरण गरिएको थियो । डायमन्ड समूहमा रहने खेलाडीले ७५ हजार, रुबिज समूहमा रहनेले ५० हजार र सफायर समूहमा रहने खेलाडीले प्रतियोगिता खेलेको २५ हजार पाउने प्रावधान रहेको छ । डायमन्डमा १० खेलाडी रहेका थिए, सबै ड्राफ्टबाट टिममा परेका छन् । ११ खेलाडी ५ लाखभित्र रहेर टोलीले लिनुपर्ने प्रावधान थियो । विराटनगर टाइटन्सले ११ खेलाडी लिनेक्रममा सबै ५ लाख खर्चेको छ । वाइल्ड कार्डबाट २-२ खेलाडी लिन बाँकी नै रहेको छ ।

विनायक पोखरेलको स्वामित्व र विनोद दासको प्रशिक्षणमा रहने पोखराको मार्की खेलाडीमा सीता रानामगर छिन् । टोलीले ७५-७५ हजारमा कविता कुँवर र विन्दु रावललाई लिएको थियो । त्यस्तै अञ्जली चन्द र अनुराधा चौधरीलाई ५०-५० हजार तथा रुबी पोदार, रेवती धामी, मन्जुकुमारी बोगटी, राजमती ऐरी, सरस्वती घर्तीमगर, नवीना खडा र निशा भाटलाई समान २५ हजारमा लिइएको हो ।

पोखरासँगै ललितपुर फाल्कन्स र चितवन राइनोजले समान ४ लाख २५ हजार खर्च गरेका थिए । नेरी थापा मार्की खेलाडी र राजु बस्न्यात प्रशिक्षक रहेको ललितपुरले डायमन्डबाट ममता चौधरी र करुणा भण्डारीलाई ७५-७५ हजारमा लिएको छ । सरिता दिश्वा मगर, रोशनी बोहरालाई ५०-५० हजार तथा कविता जोशी, कृति सेन, सीमा थापा, गीता गोसाईं, शान्तिकुमारी चौधरी, सम्झना खडा र एलिसा केसीलाई २५-२५ हजारमा ड्राफ्टबाट लिएको छ ।

चितवनको प्रशिक्षकमा श्यामसन जंग थापा र मार्की खेलाडीमा इन्दु वर्मा छन् । ड्राफ्टको पहिलो नाम छान्ने अवसर पाउँदा टोलीले काजल श्रेष्ठलाई ७५ हजारमा लियो । अर्को डायमन्ड खेलाडीमा टोलीले रितु कनोजियालाई उठायो । रेखा रावल र सन्तोषी चौधरीलाई ५०-५० हजारमा लिएको चितवनले सुमन खतिवडा, सरस्वती पुन, अस्मिता खरेल, प्यारी चौधरी, कञ्चन श्रेष्ठ, सञ्जु लामा र सावित्रा जिसीलाई समान २५ हजार तिरेको छ ।

उपलब्ध रकम सबै ५ लाख खर्च गरेको विराटनगरले सोनु खडा र आरती बिँडारीलाई ७५-७५ हजारमा लिएको थियो । महेश रिजाल प्रशिक्षक र सरिता रानामगर मार्की खेलाडी रहेको विराटनगरले ज्योति पाण्डे, डोली भट्ट, लक्ष्मी चौधरी, सवनम राई र प्रतीक्षा बस्याललाई ५०-५० हजार तथा कृतिका मरासिनी, अस्मिना कर्माचार्य, शर्मिला रोक्का मगर, करिश्मा गुरुङलाई समान २५ हजारमा लिएको छ ।

दीपा अग्रवालको स्वामित्वमा रहेको क्याट क्वीन्स काठमाडौंको मार्की खेलाडीमा रुबिना क्षेत्री र प्रशिक्षकमा मनोज कटुवाल छन् । टोलीले अप्सरी बेगम र रोमा थापालाई ७५-७५ हजारमा लिएको छ । रश्मी शर्मा चौलागार्इं, संगीता राई, सरस्वती चौधरी, ममता थापालाई ५०-५० हजार तथा सुमन विष्ट, नीतु भण्डारी, ईश्वरी विष्ट, लक्ष्मी साउद र मनीषा रानालाई समान २५ हजारमा लिएको थियो ।

प्रकाशित : जेष्ठ १, २०७६ ०७:४३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT