सावित्राको चार गोल

सेतु उपाधि नजिक
कान्तिपुर संवाददाता

काठमाडौँ — नेपाली स्टार खेलाडीद्वय सावित्रा भण्डारी र अनिता बस्नेत आबद्ध सेतु एफसीले इन्डियन वुमन्स लिग फुटबलको फाइनल यात्रा तय गरेको छ । सोमबार सेमिफाइनलमा सेन्ट्रल एसएसबी वुमन्स फुटबल टिममाथि ८-१ गोलको फराकिलो जित निकाल्दै सेतुले मणिपुर पुलिस विरुद्धको उपाधि भिडन्त पक्का गर्‍यो । 

पन्जाबस्थित गुरु नानक रंगशालामा सेतुलाई फाइनलमा पुर्‍याउन सावित्राले ह्याटि्रकसहित ४ गोल गरिन् । प्रतियोगितामा उनको यो तेस्रो ह्याटि्रक हो । उनले यस लिगमा व्यक्तिगत गोलसंख्या १३ पुर्‍याएकी छन् ।

सावित्राले ४ गोलका अलावा दाङमेई ग्रेसले पनि ह्याटि्रक पूरा गरिन् भने रतनवाला देवीले १ गोल थपिन् । सावित्राले पहिलो हाफको ४१ औँ मिनेटमा व्यक्तिगत पहिलो र टिमका लागि दोस्रो गोल गरिन् । सावित्रा, ग्रेस र रतनवालासम्मिलित सेतुको अग्रपंक्ति निकै नै आक्रामक बनेको खेलमा सावित्राले ५९ र ६५ औँ मिनेटमा गोल गरी ह्याटि्रक पूरा गरिन् । अन्तिम मिनेटमा उनले चौथो गोल गरेकी थिइन् ।

यसअघि १३ औँ मिनेटमा ग्रेसको गोलमार्फत सेतुले अग्रता बनाएको हो । त्यसयता उनले पहिलो हाफको इन्ज्युरी समयमा दोस्रो गोल गरिन् भने ५२ औँ मिनेटमा ह्याटि्रक पूरा गरिन् । रतनवालाले ७१ औँ मिनेटमा एक गोल गरिन् । रतनवालाले गोल गर्नु एक मिनेटअघि एसएसबीका लागि दुलार मारान्डीले एक गोल फर्काएकी थिइन् ।

सोमबारै पहिलो सेमिफाइनलमा मणिपुर पुलिसले गोकुलम केरला एफसीलाई ४-२ ले पराजित गरेको थियो । ४७ औँ मिनेटमै १० खेलाडीमा समेटिँदा २-१ ले पछि रहेको मणिपुरले सशक्त प्रदर्शन गरी नाटकीय रूपमा खेल आफ्नो पक्षमा पारेको थियो ।

सेतु र मणिपुरले समूह चरणको पहिलो खेलमा प्रतिस्पर्धा गरेका थिए । जहाँ सेतु ६-४ ले विजयी भएको थियो । त्यसमा पनि सावित्राले ४ गोल गरेकी थिइन् । लिगमा सेतु अपराजित टिम हो भने मणिपुरले सेतुसँग मात्र हारेको छ ।

प्रकाशित : जेष्ठ ६, २०७६ २०:५९
प्रतिक्रिया
पठाउनुहोस्

युद्ध भए इरान ध्वस्त : ट्रम्प

एजेन्सी

वासिङटन — अमेरिकी राष्ट्रपति डोनाल्ड ट्रम्पले इरान अमेरिकासँग युद्धमा होमिए ध्वस्त पारिदिने चेतावनी दिएका छन् । 'यदि इरान युद्ध गर्न चाहन्छ भने त्यो इरानको आधिकारिक अन्त्य हो,' ट्रम्पले ट्वीटरमा भनेका छन्, 'त्यसपछि इरानले संयुक्तराज्य अमेरिकालाई कहिल्यै धम्की दिनेछैन ।' 


अमेरिकाले पछिल्ला दिनमा खाडी क्षेत्रमा सैनिक युद्धपोत तथा विमानहरु थपेको छ। आइतबार फक्स न्युजसँगको अन्तरवार्तामा राष्ट्रपति ट्रम्पले 'इरानलाई कुनै पनि हालतमा परमाणु हतियार विकसित गर्न नदिने' बताएका थिए।

'म युद्धमा जान चाहने व्यक्ति होइन किनकि यसले देशको अर्थतन्त्रमा असर पर्छ, र मानिस हताहत हुन्छन्,' उनले भने। इरान पनि अमेरिकासँग युद्ध नचाहने पक्षमा देखिन्छ। यसअघि इरानी विदेशमन्त्री मोहम्मद जाभद जारिफले आफूहरुले अमेरिकासँग युद्ध नचाहेको बताएका थिए।

इरान र अन्तर्राष्ट्रिय समुदायबीच सन् २०१५ मा भएको परमाणु सम्झौताबाट अमेरिका बाहिरिने निर्णय गरेपछि दुई देशबीच तनाव बढेको हो। इरानले खाडी क्षेत्रमा परमाणु हतियार राख्ने गरेको संयुक्त अरब इमरेटसले दाबी गर्दै आएको छ। तर उक्त आरोपको इरानले खण्डन गर्दैर् आएको छ।

प्रकाशित : जेष्ठ ६, २०७६ २०:३६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT