लहानलाई मेयर कप

कान्तिपुर संवाददाता

सिरहा — प्रदेशस्तरीय प्रथम मेयर कप टी-२० क्रिकेटको उपाधि लहान स्पोर्टस् एकेडमीले जितेको छ । कर्जन्हा नगरपालिकाद्वारा आयोजित फाइनलमा लहानले महोत्तरी क्रिकेट क्लबलाई १८ रनले हरायो ।

टस जितेको लहानले २० ओभरमा ९ विकेट गुमाउँदै १ सय ४१ रन बनायो । म्यान अफ द म्याच राजन रौनियारले अर्धशतकीय ५० रन जोडे । लहानका कुश मण्डलले २४, रामएकवाल यादवले १५ र कप्तान राकेश कामतले ११ रन बनाए । १ सय ४२ रनको लक्ष्य पाएको महोत्तरीले फितलो प्रदर्शन गर्दै १८.१ ओभरमा सबै विकेट गुमाउँदै ९७ रनमा समेटिएको थियो ।

लहानका तपेश्वर मुखिया बेस्ट बलर, राकेश कामत बेस्ट ब्याट्सम्यान र राजन म्यान अफ द सिरिज भएका छन् । कर्जन्हा नगरपालिकाका प्रमुख गंगा पासवानले विजेतालाई २५ हजार ५ सय ५५ रुपैयाँ पुरस्कार प्रदान गरे । उपविजेता महोत्तरीले १५ हजार ५ सय ५५ रुपैयाँ पायो ।

प्रकाशित : जेष्ठ ८, २०७६ २०:०६
ADVERTISEMENT
ADVERTISEMENT
प्रतिक्रिया
पठाउनुहोस्

उपेन्द्र नेतृत्वको समाजवादीका जिल्ला संयोजकसहित २० जनाले दिए राजीनामा

कान्तिपुर संवाददाता

वीरेन्द्रनगर — तत्कालीन नयाँ शक्ति पार्टी नेपालका सुर्खेत जिल्ला संयोजक प्रचण्डकुमार पोखरेलसहित २० जनाले समाजवादी पार्टी परित्याग गरेका छन् । सङ्घीय समाजवादी फोरम र नयाँ शक्ति पार्टीबीच एकताप्रति असन्तुष्टि जनाउँदै जिल्ला संयोजक पोखरेलसहित २० जनाले पार्टी परित्याग गरेका हुन् । समाजवादी पार्टीका उपाध्यक्षद्वय परशुराम खापुङ र हिसिला यमीलाई भेटेर बुधबार जिल्लास्तरीय नेताले पार्टी परित्यागको घोषणा गरे । 

लोकतान्त्रिक मूल्य मान्यतालाई कुल्चने, वाचा गरेका जिम्मेवारी पूरा नगर्ने र शक्ति आर्जनका लागि आफूहरूलाई अनावश्यक प्रयोग गर्न खोजेकाले पार्टी परित्याग गर्नु परेको पोखरेलको भनाइ छ । पार्टी एकता प्रक्रियाप्रति असन्तुष्टि जनाएर गत वैशाख २३ गते समाजवादी पार्टीका संघीय परिषद् अध्यक्ष बाबुराम भट्टराईलाई नेताहरुले ६ बुँदे ज्ञापन पत्र बुझाएका थिए । विज्ञप्तिमा समाजवादी पार्टी गैरलोकतान्त्रिक, गैरजिम्मेवार र नोकरशाही चरित्रको भएकाले पार्टी परित्याग गरिएको उल्लेख छ ।

पार्टी परित्याग गर्नेहरुमा नयाँ शक्तिका सुर्खेत जिल्ला संयोजक पोखरेलसहित नयाँ शक्ति विद्यार्थी युनियनका कर्णाली प्रदेश संयोजक रविकिरण हमाल, विज्ञ परिषद्का कर्णाली संयोजक सुरथकुमार पोखरेल, युवा शक्तिका कर्णाली प्रदेश संयोजक भक्ति आचार्य र केन्द्रीय सदस्य टेकप्रसाद भट्टराई लगायत २० जना छन् ।

प्रकाशित : जेष्ठ ८, २०७६ १९:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT