शुक्र र गीतालाई अवार्ड

प्रदीप मेन्याङ्बो

सुनसरी — गल्फ खेलाडी शुक्रबहादुर राई र टेबलटेनिसकी पूर्व राष्ट्रिय खेलाडी गीता थापामगरलाई धरान उपमहानगरपालिकाको नगर खेलकुद विकास समितिले शुक्रबार वर्ष खेलाडीमा पुरस्कृत गरेको छ ।

धरान वर्ष खेलाडी गल्फर शुक्रबहादुर राई र 'अनसिन हिरो अफ द धरान’ को अवार्ड थापेकी पूर्व टेबलटेनिस खेलाडी गीता थापामगर । तस्बिरः प्रदीप/कान्तिपुर

समितिले गल्फर शुक्रलाई वर्ष खेलाडीमा चुन्दै एक लाख र गीतालाई ‘अनसिन हिरो अफ द धरान’ को रूपमा ५० हजार रुपैयाँसहित पुरस्कृत गरेको छ ।

शुक्र एकपछि अर्को गर्दै एमेच्योर गल्फमा नम्बर वान खेलाडी बनेर सफलताको शिखरमा पुगेका धरानका युवा खेलाडी हुन् । गीता टेबलटेनिसकी पूर्व नम्बर वान खेलाडी हुन् । पुरस्कृत राईले क्याडीबाट गल्फ खेल्न थालेका थिए ।

शुक्रले एउटै सिजनमा एक अन्तर्राष्ट्रिय गल्फ च्याम्पियनसिप र स्वदेशमा प्रोफेसनल गल्फ च्याम्पियनसिपका दुई उपाधि जितेर जितेर नयाँ कीर्तिमान बनाएका थिए । गत साता शुक्रले काठमाडौंमा सम्पन्न सूर्य नेपाल प्रिमियर गल्फ च्याम्पियनसिप र पुसमा सूर्य नेपाल इस्टर्न ओपन जितेका थिए । उनले माघमा बंगलादेशमा आयोजित एमेच्योर ओपन गल्फमा पनि उपाधि जितेका थिए ।

धरानको निर्वाणा कन्ट्री क्लबमा आयोजित इस्टर्न ओपनमा नेपालका नम्बर वान प्रो शिवराम श्रेष्ठलाई हराउँदै शुक्रले एकसाथ एमेच्योर र प्रोफेसनल दुवै उपाधि जितेर सबैलाई आश्चर्यमा पारेका थिए । उनले इन्डोनेसियाको जकार्तामा सम्पन्न १८ औं एसियाली खेलकुदमा पनि उत्कृष्ट प्रदर्शन गरेका थिए ।

२१ वर्षीय उनी विश्वका ६ हजार २ सय ५३ गल्फरमा ९०३ औं वरीयतामा छन् । आर्थिक अवस्था कमजोर भए पनि गल्फमा उत्कृष्ट प्रदर्शन गर्दै आएका शुक्रलाई पाँच महिनाअघि मात्र बेलायत, सिंगापुरमा कार्यरत नेपाली र धरानका बासिन्दा र गल्फ एसोसिएसनले ७ लाख रुपैयाँको एउटा घर निर्माण गरिदिएका थिए ।

हाल नेपाल गल्फ एसोसिएसनले मासिक ८ हजार रुपैयाँ तलब दिँदै आर्थिक सहयोग गर्दै आएको छ । पुरस्कृत भएपछि उनले भने, ‘मैले अपेक्षा नगरेको सम्मान र पुरस्कार धरानबाट पाएको छु । सबैलाई मेरो हार्दिक आभार । आज मैले पाएको एक लाख नगद बैंकमा राख्छु । यो रकमले डिसेम्बरमा हुने दक्षिण एसियाली खेलकुदमा स्वर्ण जित्ने गरी अभ्यास गर्नेछु ।’

धरानले सम्मान पुरस्कृत गरेकी टेबलटेनिसकी ४६ वर्षीया पूर्व खेलाडी गीताले ०५१ सालमा सम्पन्न २७ औं राष्ट्रिय टेवलटेनिस स्पर्धामा महिला जुनियरमा स्वर्ण, डबल्समा रजत, सिंगल्समा कांस्य र टिम इभेन्टमा कांस्य जितेकी थिइन् ।

०५३ सालमा जनकपुरमा सम्पन्न २८ औं राष्ट्रिय टेबलटेनिस प्रतियागितामा महिला डबल्समा कांस्य, सिंगल्समा रजत र टिम इभेन्टमा रजत, ०५५ सालमा सम्पन्न चौथो राष्ट्रिय खेलकुदमा महिला सिंगल्समा स्वर्ण, महिला डवलमा रजत र टिम इभेन्टमा कांस्य पदक जितेकी थिइन् ।

०६० मा काठमाडौंमा सम्पन्न ३० औं राष्ट्रिय टेबलटेनिसमा स्वर्ण, पोखरामा सम्पन्न ३१ औ राष्ट्रिय प्रतितियोगितामा पनि स्वर्णलगायत अरु धेरै पदक जितेकी गीता अन्तर्राष्ट्रिय टेबलटेनिसमा पनि छाएकी थिइन् ।

उनले भारतको मद्रासमा सम्पन्न सातौं दक्षिण एसियाली, सिंगापुरमा सम्पन्न १३ औं एसियन टेबलटेनिस, सन् १९९७ मा बंगलादेशको ढाकामा सम्पन्न सिल्भर जुब्ली इन्डिपेन्डेन्ट्स टेबलटेनिस च्याम्पियनसिपको महिला टिम र डबल्स दुवैमा स्वर्ण पदक दिलाएकी थिइन् ।

उनले धरानमा स्वयंसेविकाको रूपमा नयाँ पुस्तालाई टेबलटेनिस प्रशिक्षण दिँदै आएकी छन् । टेबलटेनिसमै गीताले आधा जीवन बिताए पनि राष्ट्रिय खेलकुद परिषदको बेवास्तामा परेकी थिइन् । आफ्नै गृहनरमा सम्मानित भएपछि उनले भनिन्, ‘टेबलटेनिसमै आधा जीवन बित्यो । जीवनमा टेबलटेनिसभन्दा केही सोचिनँ । अरु सपना पनि देखिनँ । यो सम्मानले मलाई टेबलटेनिसमा अरु काम गर्न थप प्रेरणा दिएको छ ।’

उनलाई धरान उपमहानगरपालिकाले साउनदेखि लागू हुने गरी नगरको टेबलटेनिस प्रशिक्षकको रूपमा नियुक्त गर्ने घोषणा कार्यवाहक प्रमुख मञ्जु भण्डारी सुवेदीले गरिन् । उनले भनिन्, ‘धरान खेलकुदको पूर्वाधारयुक्त सहर भएकाले र्स्पोर्टस भिलेजका लागि अवधारणा ल्याएका छौं । त्यसको डीपीआर हुँदै छ । प्रदेश रंगशाला धरानमा निर्माण गर्न पहल गरिरहेका छौं ।’

उनले उपमहानगरले सामुदायिक विद्यालयलक्षित गरेर खेलकुदका गतिविधि तीव्र बनाएको बताइन् । नगर खेलकुद विकास समितिका अध्यक्ष सुवास राईले नगरले खेलकुदमा विनियोजन गरेको खर्चमध्ये ६० प्रतिशत रकम खेलकुदको पूर्वाधार तयारी र ४० प्रतिशत खेलकुद प्रवर्द्धनमा प्रयोग गर्ने निति अवलम्बन गरेको बताए ।

एन्फाका मानार्थ वरिष्ठ उपाध्यक्ष किशोर राईले स्थानीय, प्रदेश र केन्द्र सरकारले खेलाडीको जीविकोपार्जनका लागि यस्ता पुरस्कार सम्मान महत्वपूर्ण हुने र नयाँ पुस्तालाई प्रेरित गर्ने बताए ।

प्रकाशित : जेष्ठ ११, २०७६ ०८:२८
प्रतिक्रिया
पठाउनुहोस्
ADVERTISEMENT
ADVERTISEMENT

प्रदूषण रोक्न नागरिककै भूमिका निर्णायक

म्याराथनको समयमा खेलाडीलाई सहज वातावरण बनाउने जिम्मेवारी सबैभन्दा धेरै सर्वसाधारणकै हुन्छ । यो अन्तर्राष्ट्रिय अभ्यास पनि हो ।
कुशल तिमल्सिना

काठमाडौँ — काठमाडौं उपत्यकामा लामो दूरीको दौड प्रतियोगिता आयोजनाका लागि सबैभन्दा ठूलो चुनौती यातायात व्यवस्थापन हो ।

सवारी चाप कम हुने शनिबार वा अन्य सार्वजनिक विदाका दिन आयोजना भए पनि म्याराथनजस्ता प्रतियोगितामा खेलाडीलाई सबैभन्दा ठूलो डर सवारी साधनकै हुने गरेको विगतको अनुभव छ ।

शनिबार कान्तिपुर हाफ म्याराथनको नवौं संस्करण आयोजना हुँदै छ र यातायात व्यवस्थापनमा ट्राफिक प्रहरीले सबैमा यो अनुरोध गरेको छ कि राष्ट्रियस्तरको प्रतियोगिता सफल बनाउन सर्वसाधारण सबैबाट सहयोग अपेक्षा गर्दछौं ।

म्याराथनको समयमा खेलाडीलाई सहज वातावरण बनाउने जिम्मेवारी सबैभन्दा धेरै सर्वसाधारणकै हुन्छ । यो अन्तर्राष्ट्रिय अभ्यास पनि हो । सहरका जनताले प्रतियोगितालाई अपनत्व लिएर प्रतियोगिताको समयमा सकेसम्म कम सवारी चलाउनु यातायात व्यवस्थापनका लागि उपयुक्त विकल्प हुनसक्छ । त्यसबाहेक दौडको रुटभन्दा वैकल्पिक मार्गको प्रयोग गरेर पनि प्रतियोगितालाई सहयोग गर्न सकिन्छ ।

नेपाल प्रहरीका प्रमुख सर्वर्न्द्रे खनालले पनि कान्तिपुर हाफ म्याराथनलक्षित गरी शनिबार बिहानको समयमा दौड हुने बाटोमा ट्राफिक डाइभर्सन गरिने बताए । ‘कान्तिपुर हाफ म्याराथन केवल दौडमात्र रहेन, यसले वातावरण प्रदूषणविरुद्धको दौडका रूपमा अभियान बोकेको छ,’ प्रहरी महानिरीक्षक खनालले भने, ‘प्रदूषणको मुख्य कारक सवारी साधनलाई दौड हुने समयमा ग्यारेज वा घरबाट ननिकाल्ने कि ? यसले दौडको रुटलाई पनि सहज बनाउँछ, प्रदूषणविरुद्धको अभियानमा पनि ऐक्यवद्धता जस्तो देखिन्छ ।’

अन्तर्राष्ट्रिय ठूला म्याराथन आयोजना हुँदा सम्बन्धित सहरका बासिन्दाले त्यस समयमा आफैंले रुट खाली गरेर सहयोग गर्छन् । नेपालमा पनि त्यस सहयोगको अपेक्षा सर्वसाधारणबाट गरिएको छ । तर त्यो मात्र समस्याको समाधान पनि होइन ।

‘काठमाडौंमा वैकल्पिक मार्गहरू निकै थोरै छन्, मुख्य सडक बन्द हुँदा वा त्यसको विकल्पका रूपमा अर्को सडकबाट गन्तव्यमा पुग्ने सम्भावना कम छ, शनिबारको समय भएकाले सवारी चाप कम हुन्छ र हामीलाई व्यवस्थापनमा पनि सहज हुन्छ,’ आईजीपी खनालले भने ।

आईजीपी खनालले कान्तिपुर हाफ म्याराथनलाई ‘एन्टी पोलुसन रन’ को अभियान बनाएकाले विकराल बन्दै गएको प्रदूषणबारे जनचेतना जगाउन सबैभन्दा प्रभावकारी हुने धारणा राखे ।

‘प्रदूषणको असर दीर्घकालीन हुने भएकाले मानिसहरू यसबारे कम चिन्तित देखिन्छन्, खेलकुद प्रतियोगिताको माध्यमबाट आममानिसलाई सहज रूपमा बुझ्ने र देखाउने कुरामा प्रभावकारी हुनेछ,’ उनले भने, ‘यस्तो अन्तर्राष्ट्रिय अभ्यास पनि छ । यसले सन्देश राम्रो जानेछ र सबैमा सहज रुपमा पुग्छ भन्ने लाग्छ ।’

मुख्यतः अपराध न्यूनीकरणका लागि नेपाल प्रहरीले ‘समुदाय–प्रहरी साझेदारी’ अभियान सञ्चालन गरिरहेको छ । विकासोन्मुख देशमा पुराना सवारी र निर्माणकार्य प्रदूषणका मुख्य कारक हुन् । प्रहरीको अभियानलाई प्रदूषण नियन्त्रणका लागि पनि उपयोग गर्नेबारे योजना बनिरहेको आईजीपी खनालले जानकारी दिए ।

‘पुराना सवारी नियन्त्रण, फुटपाथ खाली गर्ने, सडकमा निर्माण सामग्री राख्न बन्द गर्ने लगायतका कामहरू अहिले भइरहेकै छन्, त्यसबाहेक वैकल्पिक मार्गको विस्तार, करिडोर निर्माणले पनि प्रदूषण र यातायात व्यवस्थापनमा सहयोग पुग्छ । प्रहरीले जनतासँगको सहकार्यमा धेरै काम गरिरहेको छ र गरिरहने छ,’ उनले भने ।

प्रदूषणको दीर्घकालीन असर कम गर्न नागरिककै भूमिका निर्णायक हुने आईजीपी खनालको धारणा छ । उनले भने, ‘मानिसलाई आज आफूले गरेको लापरबाहीको असर अर्को पुस्ताले किन बेहोर्ने ? भन्नेबारे बुझाउनु अहिलेको आवश्यकता हो । प्रदूषणले जलवायुमा नकारात्मक असर परिसकेको छ र यसले अझै विकराल रुप लिनेछ भनेर सबैलाई चेतनशील बनाउनु अत्यावश्यक भइसकेको छ ।’

प्रकाशित : जेष्ठ ११, २०७६ ०८:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT