महिला क्रिकेट असार ४ देखि

कान्तिपुर संवाददाता

काठमाडौँ — राष्ट्रिय खेलकुद परिषद् (राखेप) को आयोजनामा चौथो प्रधानमन्त्री कप महिला टी–२० क्रिकेट असार ४ देखि हुने भएको छ । प्रतियोगितामा सातै प्रदेश र एपीएफ क्लब गरी ८ टिमको सहभागिता रहने बुधबार पत्रकार सम्मेलनमा जानकारी गराइयो । 

सहभागीलाई दुई समूहमा विभाजन गरी लिगकम नकआउट आधारमा खेल खेलाइने छ । समूह ‘ए’ मा एपीएफ, सुदूरपश्चिम प्रदेश, प्रदेश ५ र गण्डकी प्रदेश तथा समूह ‘बी’ मा प्रदेश १, प्रदेश ३, प्रदेश २ र कर्णाली प्रदेश छन् ।

महाकाली स्पोर्ट्स सोसाइटीको व्यवस्थापनमा महेन्द्रनगरमा हुने प्रतियोगिता विजेताले ५ लाख र उपविजेताले ३ लाख रुपैयाँ पुरस्कार पाउने छन् । वुमन अफ द सिरिजले ३० हजार तथा उत्कृष्ट बलर र ब्याट्सवुमनले १५–१५ हजार पुरस्कार पाउने छन् ।

वुमन अफ द म्याचलाई २ हजार ५ सयबाट पुरस्कृत गरिने छ । प्रतियोगिता आयोजना गर्न करिब ८८ लाख रुपैयाँ खर्च हुने र त्यसमा राखेपले ३५ लाख उपलब्ध गराउने आयोजक क्लबले जनाएको छ ।

प्रकाशित : जेष्ठ ३०, २०७६ ०७:४९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

डल्फिन च्याम्पियन

कान्तिपुर संवाददाता

काठमाडौँ — नेक्सस क्रिकेट एकेडेमीको आयोजनामा मुलपानी क्रिकेट मैदानमा भएको ब्रम्हास्मी एसईई कप क्रिकेटमा कैलालीको डल्फिन च्याम्पियन भएको छ । बुधबार फाइनलमा डल्फिनले काठमाडौं रोयल्सलाई ७४ रनले हरायो ।

टस जितेर ब्याटिङ रोजेको डल्फिनले निर्धारित ३० ओभरमा २७.३ ओभर खेल्दै १ सय ६२ रन बनायो । सुदीप बस्नेतले ३६, साहिल पटेलले २९, डबल ऐरले २७ र शरद सुवेदीले १६ रन बनाए । काठमाडौंका बलर सुमित बुढाथोकीले २८ रन खर्चेर ३ विकेट लिए । अनुप नेपाल र रोशन शाहले २–२ तथा निकेश गुप्ता र साहियद मन्सुरीले १–१ विकट लिएका थिए ।

जवाफी ब्याटिङमा उत्रेको काठमाडौं १८.३ ओभरमा ८८ रनमै अलआउट भएको थियो । साहियदले २६, निकेश गुप्ताले १४, अनुप नेपालले १३ र सुनोज केसीले १२ रनमात्र बनाए । कैलालीका डबल ऐरले ह्याट्रिकसहित ६ विकेट लिए । उनले १५ रन दिए । रमेश बुढा र सुदीप बस्नेतले १–१ विकेट लिएका थिए । म्यान अफ द म्याच डबल ऐर भए ।

म्यान अफ द सिरिज साहियद मन्सुरी, उत्कृष्ट बलर निकेश गुप्ता र उत्कृष्ट ब्याट्सम्यान सुदीप बस्नेत घोषित भए ।ब्रम्हास्मी कलेजका अध्यक्ष क्षितिज उपाध्यायले उत्कृष्ट खेलाडीलाई कक्षा ११ र १२ मा अध्ययन गर्न छात्रवृत्ति प्रदान गर्ने घोषणा गरे । साथै अम्पायर टिमले छनोट गरेका अन्य तीन उत्कृष्ट खेलाडीलाई पनि निःशुल्क छात्रवृत्ति प्रदान गर्ने बताए ।

आयोजक नेक्सस एकेडेमीका अध्यक्ष भरतकुमार शाहीले उत्कृष्ट ६ खेलाडीलाई भारतको नोयडास्थित क्रिकेट एकेडेमीमा एक वर्षे निःशुल्क प्रशिक्षणको घोषणा गरेका थिए ।

एसईई कप २०७७ मा भने थपचार सामरिक महत्त्वका सहरको नामबाट टिम थप गरिने र अक्सनबाट खेलाडीको पारिश्रमिक निर्धारण गरिने एकेडेमीका प्रबन्ध निर्देशक विजय शर्माले जनाएका छन् ।

प्रकाशित : जेष्ठ ३०, २०७६ ०७:४८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT