भारतले खतरा टार्‍यो

एपी

साउथह्याम्पटन — मोहम्मद सामीले अन्तिम ओभरमा ह्याट्रिक विकेट लिएपछि भारतले विश्वकपमा शनिबार अफगानिस्तानलाई ११ रनले पराजित गरेको छ । विश्वकप इतिहासमै अप्रत्यासित नतिजाको नजिक पुगेर अफगानिस्तान चुक्यो ।

२ सय २५ रनको मध्यम लक्ष्य पाएको अफगानिस्तान ४९.५ ओभरमा २ सय १३ रनमै अलआउट भयो । विश्वकप इतिहासमा भारतको यो ५० औं जित हो ।

अफगानिस्तानलाई अन्तिम ओभरमा जितनिम्ति १६ रन चाहिन्थ्यो । मोहम्मद नाबीले सामीको पहिलो बलमै चौका प्रहार गरेर खेललाई अझ रोमाञ्चक बनाए । दोस्रोमा कुनै रन बनाउन नसकेका नाबी तेस्रो बलमा क्याच दिन पुगे । चौथो र पाँचो बलमा सामीले अफ्ताब आलम र मुजिब उर रहमानलाई बोल्ड गरे । विश्वकपमा ह्याट्रिक गर्ने सामी भारतका दोस्रो र विश्वका नवौं खेलाडी हुन् ।

सामीले ९.५ ओभरमा १ मेडन राख्दै ४० रन खर्चेर ४ विकेट लिए । म्यान अफ द म्याचमा भने जसप्रित बुमराह चुनिए । उनले १० ओभरमा १ मेडन राख्दै ३९ रन खर्चेका थिए । युजभेन्दर चाहल र हार्दिक पाण्ड्येले पनि २–२ विकेट लिए । नाबीले अफगानिस्तानबाट सर्वाधिक ५२ रन बनाए । उनले ५५ बल खेल्दै ४ चौका र १ छक्का प्रहार गरे । रहमत शाहले ३६ र गुलबदिन नैबले २७ रन बनाए ।

अफगानिस्तानले चार दिनअघिमात्र इंग्ल्यान्डलाई विश्वकपकै सर्वाधिक ३ सय ९७ रन बनाउन दिएको थियो । त्यही अफगानी बलरहरूले उत्कृष्ट प्रदर्शन गर्दै भारतलाई शनिबार २२४–८ को स्कोरमा रोके । इंग्ल्यान्डसँग रशिद खानले नचाहेको कीर्तिमानी बलिङ गरे ।

उनले ९ ओभरमा १ सय १० रन खर्चंदै कुनै विकेट लिन सकेका थिएनन् । तिनै रशिदले १० ओभरमा ३८ रनमात्र खर्चेर १ विकेट लिएपछि भारतले खुलेर खेल्न सकेन । अफगानिस्तानका स्पिनरले कुल ५ विकेट लिएपछि कठिन पिचमा लय समात्न नसकेको भारतले ठूलो स्कोर बनाउन सकेन ।

भारतीय कप्तान विराट कोहलीले ६३ बलमा ६७ रन बनाए । त्यसमा ५ चौका समावेश छ । उनले ४४ बलमै अर्धशतक पूरा गरे । यो उनको ५१ औं अर्धशतक हो । कोहलीलाई नाबीले ३१ औं ओभरमा शर्ट थर्डम्यानमा क्याच गराए । मुजिब उरले ओपनर रोहित शर्मालाई पाँचौं ओभरमा १ रनमै आउट गरेपछि भारतको सुरुआत राम्रो हुन सकेन । शर्माले प्रतियोगितामा यसअघि दुई शतक बनाइसकेका थिए ।

लोकेश राहुलले ३० रन बनाउँदै कोहलीसँग दोस्रो विकेटमा ५७ रन जोडे । तर भारतको समस्या तब सुरु भयो, जब राहुल अनावश्यक रिभर्स स्वीप गर्नेक्रममा क्याच हुन पुगे । अफगानका बलरले त्यसपछि नियमित रनमा अंकुश लगाउँदै विकेट लिइरहे । शाहले विजय शंकरलाई २७ औं ओभरमा एलबीडब्लू आउट गरे ।

महेन्द्रसिंह धोनी र केदार जाधबले पाँचौं विकेटमा ५७ रन जोडे । धोनीले ५२ बलमा २८ रन बनाए । उनी सन् २०११ यता पहिलो पटक एकदिवसीयमा स्टम्पआउट भए । जाधबले ६८ बल खेली ३ चौका र १ चौका प्रहार गरी ५२ रन बनाए । मुजिब उरले १० ओभरमा २६ रनमात्र खर्चेका थिए भने नाबीले ९ ओभरमा ३३ रन खर्चेर २ विकेट लिए ।

स्कोर कार्ड
भारत
११ रनले विजयी

भारत
५० ओभर २२४/८
विराट कोहली–६७
केदार जाधव–५२
लोकेश राहुल–३०

मोहम्मद नाबी २/३३
गुलवदिन नैब २/५१

अफगानिस्तान
४९.५ ओभर २१३
मोहम्मद नाबी–५२
रहमत शाह–३६
गुलवदिन नैब–२७

मोहम्मद सामी ४/४०
युजभेन्द्र चाहल २/३६

प्रकाशित : असार ८, २०७६ ०८:२३
प्रतिक्रिया
पठाउनुहोस्

लायनप्रति बोर्डरको विश्वास

रोयटर्स

लन्डन — अस्ट्रेलिया र इंग्ल्यान्ड मंगलबार विश्वकपमा आमने–सामने हुँदा बलिङ महत्त्वपूर्ण हुने र साबिक विजेता अस्ट्रेलियाले स्पिनर नाथन लायनलाई राउन्ड रोबिन लिगमा प्रयोग गर्नुपर्ने पूर्व कप्तान एलन बोर्डरले बताएका छन् ।

१० राष्ट्रसम्मिलित प्रतियोगितामा अस्ट्रेलिया अंकतालिकाको शीर्षस्थानमा छ । न्युजिल्यान्ड र इंग्ल्यान्ड क्रमशः दोस्रो र तेस्रो स्थानमा छन् । श्रीलंकाले शुक्रबार दाबेदार मानिएको इंग्ल्यान्डलाई २० रनले स्तब्ध पार्दा सदाबहार लासिथ मालिङ्गाले उत्कृष्ट तीव्र बलिङ प्रदर्शन गरेका थिए ।

बोर्डरकै कप्तानीमा अस्ट्रेलियाले इंग्ल्यान्डलाई पराजित गरी सन् १९८७ को विश्वकप जितेको थियो । आरोन फिन्चको अस्ट्रेलिया पनि यसपालि राम्रै लयमा देखिएको छ । लर्ड्समा हुने क्रिकेटको पुरानो प्रतिद्वन्द्वितालाई हेर्न आफू व्यग्र रहेको बोर्डरले जनाए । देव्रेहाते तीव्र गतिका बलर मिचेल र्स्टाक प्रतियोगिताको संयुक्त उच्च विकेट लिने खेलाडी हुन् ।

अस्ट्रेलियाबाट अहिलेसम्म प्रतियोगितामा नखेलाइएका एकमात्र खेलाडी अफ स्पिनर लायनलाई खेलाइएमा पाँचपल्टको विजेता टोलीको बलिङ अझ सन्तुलित हुने बोर्डरको विश्वास छ । ‘मैदानमा अझै शतप्रतिशत देखिएको छैन, त्यही भएर नाथन लायनलाई बाँकी यी केही खेलमा हेर्नुपर्छ,’ बोर्डरले आईसीसीको मिडियामा भनेका छन्, ‘उनी विकेट लिने खेलाडी हुन्, उनलाई ब्याट्सम्यान कसरी आउट गर्नुपर्छ भन्ने थाहा छ । निश्चय पनि टेस्ट बलिङ फरक हो । तर लायन आक्रामक बलर हुन् र उनमा विविधता छ ।’

लायनको स्थानमा अर्का स्पिनर एडम जाम्पालाई खेलाइएको थियो । उनले त्यसमा ६ ओभरमा ५० रन खर्चन पुगेका थिए । बंगलादेशसँग उनले ६ ओभरमा ६८ रन खर्चेर १ विकेट लिएका थिए । जाम्पा नखेलाउँदा अस्ट्रेलियाले ग्लेन म्याक्सवेललाई अलराउन्डको भूमिकामा उतारिरहेको छ ।

प्रकाशित : असार ८, २०७६ ०८:२२
पूरा पढ्नुहोस्
प्रतिक्रिया
पठाउनुहोस्