असारे झरीमा धमाधम खेलकुद

भवानी भट्ट

कञ्चनपुर — यति बेला असारे झरीबीच सडक कालोपत्रेदेखि अन्य पूर्वाधारको काम गर्न सम्बन्धित निकायलाई भ्याइनभ्याइ छ । असारे विकासजस्तै सुदूरपश्चिममा असारे खेलकुद पनि चलिरहेको छ । झरीबीच हतारहतारमा जिल्ला र प्रदेशस्तरीय राष्ट्रपति रनिङ सिल्ड खेलकुद सम्पन्न भएको छ । 

महेन्द्रनगरस्थित कभर्डहलको खेल मैदान जलमग्न छ । त्यही जलमग्न मैदानमा खेलाडीहरू दौडिरहेका छन् । कतिपय अभ्यास गरिरहेका छन् । ‘दौडिँदा चिप्लिने निकै डर भयो, पानीले दौडिन पनि गाह्रो भयो,’ प्रदेशस्तरीय राष्ट्रपति रनिङ सिल्डमा दार्चुलाबाट आएका एथलेटिक्सका मणि बोहराले भने, ‘यो खेलकुद प्रतियोगिताका लागि उपयुक्त मौसम होइन ।’

जिल्ला खेलकुद विकास समिति कञ्चनपुरले मंगलबार मात्रै झरीबीच राष्ट्रपति रनिङ सिल्ड सम्पन्न गरेको थियो । त्यसको दोस्रो दिन प्रदेशस्तरीय प्रतियोगिता सुरु भएको छ । बुधबार सुदूरपश्चिम प्रदेशका सामाजिक विकासमन्त्री कृष्णराज सुवेदीले प्रतियोगिताको उद्घाटन गरेका हुन् ।

‘राष्ट्रपति रनिङ सिल्ड समयमै गर्नुपर्छ भनेर हामीले पटकपटक आवाज उठायौं,’ दार्चुलाका टीम लिडर श्यामराज अवस्थीले भने, ‘यसपालि त झन झरीमै प्रतियोगिता भइरहेको छ ।’ उनका अनुसार सातौं क्षेत्रीय राष्ट्रपति रनिङ सिल्डसम्म फागुन–चैतमा जिल्ला र क्षेत्रका खेलहरू सकिन्थे ।

वैशाख–जेठमा राष्ट्रिय प्रतियोगिता आयोजना हुने गर्दथ्यो । आठौंदेखि खेलकुदको समय तालिका बिग्रिएर यस वर्ष वर्षातमै हतारहतारमा प्रतियोगिता भइरहेको हो ।

‘बिहीबार प्रदेशस्तरीय प्रतियोगिता सकिएपछि खेलाडीलाई काठमाडौं पुग्न दुई दिनमात्रै बाँकी छ,’ उनले भने, ‘यहाँ छनोट भएका खेलाडी लगत्तै काठमाडौंमा हुने राष्ट्रिय प्रतियोगितामा सहभागी हुन जानेछन् ।’ प्रतियोगितामा सुदूरपश्चिम प्रदेशका ९ वटै जिल्लाका साढे ८ सय बढी खेलाडी, प्रशिक्षक र अफिसियल सहभागी छन् ।
संघीय सरकारको शिक्षा मन्त्रालयअन्तर्गत प्रदेशस्तरीय प्रतियोगिता भएको हो । प्रतियोगिताका लागि २३ लाख बजेट निकासा भएको प्रदेश खेलकुद विकास समितिका अध्यक्ष लालबहादुर शाहीले बताए । उनले केन्द्रबाटै ढिलो गरी कार्यक्रम आएका कारण वर्षातमा प्रतियोगिता गराउनुपरेको प्रष्टीकरण दिए ।

‘राष्ट्रिय खेलकुदका कारण राष्ट्रपति रनिङ सिल्ड पछाडि धकेलिएको हो,’ शाहीले भने, ‘राष्ट्रिय खेलकुद परिषद्ले असार २९ देखि ३१ सम्म काठमाडौंमा केन्द्रस्तरको राष्ट्रिय प्रतियोगिता राखेकाले त्यसका लागि खेलाडी छनोट गर्न प्रतियोगिता गर्नैपर्ने बाध्यता छ ।’ उनका अनुसार यो प्रतियोगिता समयमै भएको भए वैशाखभित्रै सम्पन्न भइसक्नुपर्ने हो ।

राष्ट्रपति रनिङ सिल्डमात्रै होइन प्रधानमन्त्री महिला क्रिकेट प्रतियोगिता पनि झरीबीच सम्पन्न भएको हो । राष्ट्रिय खेलकुद परिषदको वार्षिक कार्यक्रमअनुसार असार ४ देखि ११ सम्म महेन्द्रनगरको कभर्डहल मैदानमै उक्त प्रतियोगिता भएको थियो ।

वर्षाका कारण सेमिफाइनल र फाइनलसँगै अन्य खेलसमेत प्रभावित भए । वर्षाका कारण खेल हुन नसक्दा सुदूरपश्चिम अंकका आधारमा फाइनल पुगेको थियो । यसअघि पनि अन्य टिमले खेल हुन नसक्दा अंक बाँडेका थिए । प्रतियोगिताका लागि राष्ट्रिय खेलकुद परिषद्ले ३५ लाख बजेट छुट्याएको थियो ।
‘यो सबै बजेट सक्ने योजना हो, खेलकुदका लागि त फागुन–चैत उपयुक्त सिजन हो,’ जिल्ला खेलकुद विकास समिति कञ्चनपुरका एक प्रशिक्षकले भने, ‘वर्षातमा न राम्ररी खेल्न सकिन्छ, न त मैदान नै राम्रो छ ।’ यस्तो अवस्थामा खेलाडीहरूमा चोटपटक लागेर घाइते हुने सम्भावना रहने उनले भनाइ थियो ।


प्रकाशित : असार २७, २०७६ १०:२६
प्रतिक्रिया
पठाउनुहोस्

प्रदेश ५ स्तरीय राष्ट्रपति रनिङ सिल्ड सुरु

कान्तिपुर संवाददाता

पाल्पा — प्रदेश ५ अन्तर जिल्ला प्रदेशस्तरीय राष्ट्रपति रनिङ सिल्ड बुधबार तानसेनमा सुरु भएको छ । तीनदिने प्रतियोगितामा छात्रछात्रा कबड्डी, कराँते, तेक्वान्दो, आईटीएफ तेक्वान्दो, उसु, एथलेटिक्समा प्रतिस्पर्धा हुनेछ ।

एथलेटिक्सको ट्रयाकतर्फ १०० मिटर, २०० मिटर, ४०० मिटर, ८०० मिटर, १५ सय मिटर, ३ हजार मिटर दौड हुनेछ । फिल्डतर्फ हाइजम्प, लङजम्प, ट्रिपलजम्प, ज्याभलिन थ्रो, सटपुट हुनेछ । ४ गुणा १०० मिटर र ४ गुणा ४०० मिटर रिलेमा प्रतिस्पर्धा हुनेछ ।

तानसेनको टुँडिखेल स्तरोन्नति गर्न लागेकाले रिले दौड लगायतका प्रतियोगिता तानसेनदेखि बाहिर गर्नुपर्ने भएको उनले बताए । तानसेनको सामुदायिक कभर्डहल, बाल मन्दिर, भुसालडाँडा लगायतका मैदानमा सञ्चालन गर्ने जिल्ला खेलकुद विकास समिति अध्यक्ष करुणा काफ्लेले बताए ।

प्रतियोगितामा बर्दिया, बाँके, दाङ, रुकुम पूर्व, प्युठान, कपिलवस्तु, नवलपरासी, रूपन्देही, अर्घाखाँची, गुल्मी र पाल्पाका झन्डै ११ सय खेलाडीले भाग लिएको प्रदेश सदस्य चन्द्रमणि गैरेले बताए ।

पानी परेका कारण टुँडिखेल मैदान हिलाम्मे छ । स्तरोन्नतिका क्रममा रहेकाले माटो थुपारेकाले हिलो भएको छ । वर्षायामको समय भएकाले खेलाडी तथा मैदान व्यवस्थापनमा केही कठिन भएको आयोजकले जनाएका छन् ।

तानसेन टुँडिखेल मैदानमा खेलको पूर्व उद्योगमन्त्री एवं प्रतिनिधि सभा सदस्य सोमप्रसाद पाण्ड्येले उद्घाटन गरे । प्रदेश ५ का प्रदेशसभा सदस्य नारायणप्रसाद आचार्यले खेलकुदले हरेक जीवनका गतिविधिलाई सबल र सशक्त बनाउने बताए ।

तानसेन नगरपालिकाका मेयर अशोककुमार शाहीले खेल पर्यटनको माध्यमबाट पाल्पालाई अगाडि बढाउन सकिने बताए । प्रदेश ५ का अध्यक्ष भीम ओलीले पर्यटकीय नगर तानसेनलाई खेलकुदको हब बनाउन पहल गरिने उद्घोष गरे ।

प्रकाशित : असार २७, २०७६ १०:२१
पूरा पढ्नुहोस्
प्रतिक्रिया
पठाउनुहोस्