मुख्यमन्त्री प्रदेश लिग विवादमा

पहिलो चरणमा म्याच फिक्सिङको आरोप
विनोद भण्डारी

विराटनगर — बजेट सिध्याउन मध्य असारमा भएको मुख्यमन्त्री कप प्रदेश लिग फुटबल प्रतियोगिता ‘म्याच फिक्सिङ’ को आशंका र लिग नियमावलीको अंक र स्थान निर्धारणअन्तर्गत नभएको भन्दै उजुरी परेपछि विवादमा तानिएको छ ।

समूह चरणमा धनकुटा र संखुवासभा तथा सुनसरी र भोजपुरबीचको खेलमा म्याच फिक्सिङ भएको, लिग नियमावली अंक र स्थान निर्धारणअनुसार आफू सुपर लिगमा पुग्नुपर्ने दाबी गर्दै तेह्रथुमले आयोजक समिति, अखिल नेपाल फुटबल संघ र प्रदेशको सामाजिक विकास मन्त्रालयमा उजुरी दिएपछि प्रतियोगिता विवादमा तानिएको हो ।

तेह्रथुमले धनकुटा र सुनसरीसँगको खेलमा २–२ गोलको बराबरी खेल्दै भोजपुर र संखुवासभालाई पराजित गरेर ८ अंक बटुलेर सुपर लिगको बाटो सुरक्षित गरेको थियो । तर सुनसरीले अन्तिम लिगमा भोजपुरलाई अप्रत्यासित ९–१ र धनकुटाले संखुवासभालाई ७–२ गोलले पराजित गर्दै तेह्रथुमसँग समान ८ अंक बनाएपछि आयोजकले तेह्रथुमलाई पन्छाउँदै धनकुटा र सुनसरीलाई सुपर लिगमा छनोट गरेको थियो ।

लिग नियमावलीको अंक र स्थान निर्धारणअन्तर्गत ५ को ‘ङ’ मा यदि दुई वा त्यसभन्दा बढी टीमबीच अंक बराबरी भएको खण्डमा बराबरी भएको टिमबीच बढी गोल गर्ने टोलीले अर्को चरणमा प्रवेश पाउने उल्लेख छ । यसअन्तर्गत तेह्रथुम, सुनसरी र धनकुटाबीच समान ८ अंक भए पनि तीन टिममध्ये तेह्रथुमले ४ गोल गर्दै ४ गोल खाएको भने धनकुटा र सुनसरीले समान ३ गोल गरेर ३ गोल खाएका छन् ।

यसकै आधारमा तेह्रथुम सुपर लिगमा पुग्नुपर्ने थियो । तर त्यो भएन । एन्फाका एक पदाधिकारीले भने जारी प्रतियोगिता एन्फाकै नियमावली मातहतमा रहेर तयारी गरिएको हो । प्रदेश लिग कमिटी अलग्गै भएका कारण नियमावली फरक बनाउन सकिने भए पनि यो प्रतियोगिता एन्फाकै नियमावलीभित्र छ ।

समूह चरण खेलमा तेह्रथुमले धनकुटा र सुनसरीसँग समान २–२ गोलको बराबरी खेल्दा सुनसरी र धनकुटाले १–१ को बराबरीमा खेल टुंग्याएका थिए । समूह चरणको यो विवादपछि आयोजक समितिले लिग नियमावलीको अंक र स्थान निर्धारणअन्तर्गत ५ को ‘ङ’ को प्रावधान नै परिवर्तन गरेर आफनो बचाउ गरेको स्रोतको दाबी छ ।

समूह चरणका ४ लिग खेलमा तेह्रथुमले १२ गोल गरेर ६ गोल बेहोरेको छ । धनकुटाले १४ गोल गरेर ६ गोल र सुनसरीले १५ गोल गरेर ४ गोल बेहोरेको छ । आयोजकले समूह चरणका लिग म्याच उदयपुर, धरान र इलाममा गरेका थिए । धनकुटामा गर्ने भनिएको लिग धरानमा गराइएको थियो । धरानमा सुनसरी, धनकुटा, तेह्रथुम, भोजपुर र संखुवासभाबीच प्रतिस्पर्धा भएको थियो ।

समूह चरणमा धनकुटा र संखुवासभा तथा सुनसरी र भोजपुरबीचको खेलमा म्याच फिक्सिङ भएको आशंका छ । त्यसको छानबिन गरिनुपर्ने र समान ८ अंक भएको तेह्रथुमलाई म्याच फिक्सिङ गरेर सुपर लिगबाट हटाइएको भन्दै जिल्ला खेलकुद विकास समिति तेह्रथुमले एन्फा, आयोजक समिति र प्रदेशको सामाजिक विकास मन्त्रालयमा बिहीवार उजुरी दिएको समितिका अध्यक्ष केशव भट्टराईले बताए ।

उनले भने लिगमा तीन टिमको समान अंक भए पनि आफ्नो टिम गोलअन्तरले दुई टिमभन्दा अगाडि भएकाले लिग नियमावलीअनुसार दोस्रो चरणमा पुग्नुपर्ने स्पष्ट हुँदाहुँदै पनि तेह्रथुमलाई हटाउनु आश्चर्यजनक भएको बताए । तेह्रथुम एन्फाको सदस्य टोली होइन ।

बुधबारसम्म कसैले पनि दाबी विरोध नगरेपछि टेक्निकल समितिले गरेको निर्णयका आधारमा शुक्रबारदेखि सुपर लिग गर्ने तयारी भएको छ । आयोजक समितिका अध्यक्ष तथा एन्फाका प्रवक्ता किरण राईले भने अब परेका दाबी र विरोधले सुपर लिग सुरु गर्नबाट आयोजक पछाडि हट्ने स्थिति नरहेको बताए । उनले तेह्रथुमले आफूलाई बिहीबार दाबी विरोधको उजुरी दिएको स्विकारे ।

आयोजकले सुपर लिगका म्याच विराटनगरमा गराउने तयारी गरेको थियो । तर विराटनगरको सहिद मैदानमा पानी जमेका कारण धरानमा सारेर शुक्रबारदेखि लिग गर्ने तयारी गरेको छ ।

यो प्रतियोगिताका लागि प्रदेश सरकारले १ करोड र एन्फाले ३३ लाख रुपैयाँ आयोजकलाई विनियोजन गरेको छ । आयोजकले यो रकम असार मसान्तपछि फ्रिज हुने भन्दा मध्यअसारमा भए पनि प्रतियोगिता आयोजना गरेको बताएको छ ।

प्रकाशित : असार २७, २०७६ १०:२८
प्रतिक्रिया
पठाउनुहोस्

असारे झरीमा धमाधम खेलकुद

भवानी भट्ट

कञ्चनपुर — यति बेला असारे झरीबीच सडक कालोपत्रेदेखि अन्य पूर्वाधारको काम गर्न सम्बन्धित निकायलाई भ्याइनभ्याइ छ । असारे विकासजस्तै सुदूरपश्चिममा असारे खेलकुद पनि चलिरहेको छ । झरीबीच हतारहतारमा जिल्ला र प्रदेशस्तरीय राष्ट्रपति रनिङ सिल्ड खेलकुद सम्पन्न भएको छ । 

महेन्द्रनगरस्थित कभर्डहलको खेल मैदान जलमग्न छ । त्यही जलमग्न मैदानमा खेलाडीहरू दौडिरहेका छन् । कतिपय अभ्यास गरिरहेका छन् । ‘दौडिँदा चिप्लिने निकै डर भयो, पानीले दौडिन पनि गाह्रो भयो,’ प्रदेशस्तरीय राष्ट्रपति रनिङ सिल्डमा दार्चुलाबाट आएका एथलेटिक्सका मणि बोहराले भने, ‘यो खेलकुद प्रतियोगिताका लागि उपयुक्त मौसम होइन ।’

जिल्ला खेलकुद विकास समिति कञ्चनपुरले मंगलबार मात्रै झरीबीच राष्ट्रपति रनिङ सिल्ड सम्पन्न गरेको थियो । त्यसको दोस्रो दिन प्रदेशस्तरीय प्रतियोगिता सुरु भएको छ । बुधबार सुदूरपश्चिम प्रदेशका सामाजिक विकासमन्त्री कृष्णराज सुवेदीले प्रतियोगिताको उद्घाटन गरेका हुन् ।

‘राष्ट्रपति रनिङ सिल्ड समयमै गर्नुपर्छ भनेर हामीले पटकपटक आवाज उठायौं,’ दार्चुलाका टीम लिडर श्यामराज अवस्थीले भने, ‘यसपालि त झन झरीमै प्रतियोगिता भइरहेको छ ।’ उनका अनुसार सातौं क्षेत्रीय राष्ट्रपति रनिङ सिल्डसम्म फागुन–चैतमा जिल्ला र क्षेत्रका खेलहरू सकिन्थे ।

वैशाख–जेठमा राष्ट्रिय प्रतियोगिता आयोजना हुने गर्दथ्यो । आठौंदेखि खेलकुदको समय तालिका बिग्रिएर यस वर्ष वर्षातमै हतारहतारमा प्रतियोगिता भइरहेको हो ।

‘बिहीबार प्रदेशस्तरीय प्रतियोगिता सकिएपछि खेलाडीलाई काठमाडौं पुग्न दुई दिनमात्रै बाँकी छ,’ उनले भने, ‘यहाँ छनोट भएका खेलाडी लगत्तै काठमाडौंमा हुने राष्ट्रिय प्रतियोगितामा सहभागी हुन जानेछन् ।’ प्रतियोगितामा सुदूरपश्चिम प्रदेशका ९ वटै जिल्लाका साढे ८ सय बढी खेलाडी, प्रशिक्षक र अफिसियल सहभागी छन् ।
संघीय सरकारको शिक्षा मन्त्रालयअन्तर्गत प्रदेशस्तरीय प्रतियोगिता भएको हो । प्रतियोगिताका लागि २३ लाख बजेट निकासा भएको प्रदेश खेलकुद विकास समितिका अध्यक्ष लालबहादुर शाहीले बताए । उनले केन्द्रबाटै ढिलो गरी कार्यक्रम आएका कारण वर्षातमा प्रतियोगिता गराउनुपरेको प्रष्टीकरण दिए ।

‘राष्ट्रिय खेलकुदका कारण राष्ट्रपति रनिङ सिल्ड पछाडि धकेलिएको हो,’ शाहीले भने, ‘राष्ट्रिय खेलकुद परिषद्ले असार २९ देखि ३१ सम्म काठमाडौंमा केन्द्रस्तरको राष्ट्रिय प्रतियोगिता राखेकाले त्यसका लागि खेलाडी छनोट गर्न प्रतियोगिता गर्नैपर्ने बाध्यता छ ।’ उनका अनुसार यो प्रतियोगिता समयमै भएको भए वैशाखभित्रै सम्पन्न भइसक्नुपर्ने हो ।

राष्ट्रपति रनिङ सिल्डमात्रै होइन प्रधानमन्त्री महिला क्रिकेट प्रतियोगिता पनि झरीबीच सम्पन्न भएको हो । राष्ट्रिय खेलकुद परिषदको वार्षिक कार्यक्रमअनुसार असार ४ देखि ११ सम्म महेन्द्रनगरको कभर्डहल मैदानमै उक्त प्रतियोगिता भएको थियो ।

वर्षाका कारण सेमिफाइनल र फाइनलसँगै अन्य खेलसमेत प्रभावित भए । वर्षाका कारण खेल हुन नसक्दा सुदूरपश्चिम अंकका आधारमा फाइनल पुगेको थियो । यसअघि पनि अन्य टिमले खेल हुन नसक्दा अंक बाँडेका थिए । प्रतियोगिताका लागि राष्ट्रिय खेलकुद परिषद्ले ३५ लाख बजेट छुट्याएको थियो ।
‘यो सबै बजेट सक्ने योजना हो, खेलकुदका लागि त फागुन–चैत उपयुक्त सिजन हो,’ जिल्ला खेलकुद विकास समिति कञ्चनपुरका एक प्रशिक्षकले भने, ‘वर्षातमा न राम्ररी खेल्न सकिन्छ, न त मैदान नै राम्रो छ ।’ यस्तो अवस्थामा खेलाडीहरूमा चोटपटक लागेर घाइते हुने सम्भावना रहने उनले भनाइ थियो ।


प्रकाशित : असार २७, २०७६ १०:२६
पूरा पढ्नुहोस्
प्रतिक्रिया
पठाउनुहोस्