दुर्लभ फाइनलमा इंग्ल्यान्ड विश्वकप च्याम्पियन

(एएफपी)

लन्डन — इंग्ल्यान्डले नाटकीय फाइनलमा न्युजिल्यान्डलाई पराजित गरी विश्वकप क्रिकेटको उपाधि जितेको छ । आइतबार लर्डसमा भएको फाइनलमा इंग्ल्यान्डले दुर्लभ जित निकाल्दै पहिलो पटक विश्व च्याम्पियन भएको हो ।

२ सय ४२ रनको लक्ष्य लिएर आएको इंग्ल्यान्ड पुरा ओभर खेलेर २ सय ४१ रनमा अलआउट भए पछि खेल सुपर ओभरमा लम्बियो । सुपर ओभरमा इंग्ल्यान्डले विना क्षति १५ रन बनायो । जबाफमा आएको न्युजिल्यान्डले पनि सुपर ओभरमा १५ रन नै बनाए पछि इंग्ल्यान्ड धेरै बाउन्ड्रि प्रहार गरेको आधारमा विजेता बनेको हो ।

न्युजिल्यान्डले पुरा ५० ओभरमा १६ र इंग्ल्यान्डले २४ तथा सुपर ओभरमा न्युजिल्यान्डले १ र इंग्ल्यान्डले २ बाउन्ड्रि प्रहार गरेको थियो । इंग्ल्यान्ड सन् १९७९, १९८७ र १९९२ को फाइनलमा पराजित भएको थियो । न्युजिल्यान्ड लगातार दोस्रो पटक फाइनल पुगेको हो । २०१५ को पछिल्लो संस्करणमा टोली अस्ट्रेलियासँग पराजित भएको थियो ।

बेन स्टोक्सले ९८ बलमा ८४ रन बनाई इंग्ल्यान्डलाई निर्धारित ओभरमा जोगाएका थिए । उनले अन्तिम ओभरमा एक्लै दुई छक्कासहित १४ रन प्रहार गरेका थिए । उनले कुल ५ चौका र २ छक्का प्रहार गरे । न्युजिल्यान्डका जेम्स निशम र कोलिन डी ग्रान्ड होमले ३–३ विकेट लिए ।

लिएम प्लुन्केटले तीन महत्वपूर्ण विकेट लिएपछि लर्ड्समा इंग्ल्यान्डले न्युजिल्याण्डलाई २४२–८ को योगफलमा रोकेको थियो । तीव्र बलर प्लुंकेटले न्युजिल्याण्डका कप्तान तथा सुपरस्टार ब्याट्सम्यान केन विलियमसनलाई ३० रनको व्यक्तिगत स्कोरमा आउट गरेका थिए । न्युजिल्यान्डका लागि सर्वाधिक ५५ रनको इनिङ्स खेलेका हेनरी निकोल्सलाई पनि उनले आउट गरे । १० ओभरमा प्लुन्केटले ४२ रन खर्चेर ३ विकेट लिएका हुन् । क्रिश वोक्सले पनि ३–३७ को उत्कृष्ट बलिङ प्रदर्शन गरे ।

न्युजिल्यान्डले विश्वकै सबैभन्दा शक्तिशाली व्यटिङपंक्ति भएको भारतबिरुद्ध २ सय ३९ रनको योगफल रक्षा गर्दै फाइनलमा स्थान बनाएको थियो ।

‘आफ्नो प्रदर्शनमा विश्वास नै लागिरहेको छैन । यस्तो अवसरमा आफ्नो महत्वपूर्ण योगदान हुँदा राम्रो लाग्छ,’ प्लुन्केटले भने, ‘पीच पनि उत्कृष्ट थियो ।’

विलियमसनले सेमिफाइनलमा भारतबिरुद्ध जस्तै फाइनलमा पनि टस जिते र लर्ड्सको घाँसे पीचमा पहिला ब्याटिङको निर्णय गरे । क्रिश वोक्सको बलिङमा हेनरी निकोल्सलाई अम्पायर कुमार धर्मसेनाले एलबीडब्लु आउट दिए पनि न्युजिल्यान्डले रिभ्युमार्फत नतिजा उल्टाएको थियो । सन् २०१५ को संस्करणमा न्युजिल्यान्डका शीर्ष रन स्कोरर मार्टिन गुप्टिलले तीव्र बलर जोफ्रा आर्चरको बलमा २ चौका प्रहार गरे । गुप्टिल यस विश्वकपमा रन बनाउन संघर्षरत रहे । १९ रनको स्कोरमा उनी वोक्सको बलमा एलबीडब्ल्यूको सिकार बने । भिडियो रिप्लेमा पनि आउट देखिएपछि उनी पेविलियन फर्कन बाध्य रहे ।

विश्वकपमा ९१.३३ को औषतमा ५ सय ४८ रन प्रहार गरेका कप्तान केन विलियमनसनले तेस्रो नम्बरमा ब्याटिङ सुरु गरे । तर निकोल्ससँग दोस्रो विकेटका लागि ७४ रनको साझेदारी गरेपछि उनी आउट भए । प्लुन्केटको बलमा एज लागेको बल समाउन विकेटकिपर जस बटलरले कुनै गल्ती गरेनन् । अम्पायर धर्मसेनाले आउट दिएका थिएनन्, तर इंग्ल्यान्डले रिभ्यु लिएर विलियमसनको बहिर्गमन निश्चित गरेको थियो । ५३ बलको इनिङ्समा उनले २ चौका प्रहार गरे ।

प्लुन्केटले १४ बलपछि अर्को विकेट लिएसँगै न्युजिल्याण्ड ११८–३ को स्थितिमा पुग्यो । निकोल्सले ७१ बलमा अर्धशतक पूरा गरे । ५५ रनको स्कोरमा उनी आउट भएका हुन् । न्युजिल्यान्ड अनुभवी ब्याट्सम्यान रस टेलरको आशामा थियो, जसले उनीहरुलाई अप्ठेरोबाट पार लगाउन सकुन् । मार्क उडको एलबीडब्ल्यू आउट गर्नुअघि उनले १५ रनमात्र बनाउन सके ।

जिम्मी निसमलाई १९ रनको स्कोरमा प्लुन्केटले मिड अन क्षेत्रमा जो रुटबाट क्याटआउट गराएपछि न्युजिल्यान्ड १७३–५ को अवस्थामा पुग्यो । कोलिन डी ग्रान्डहोमले २८ बलमा १६ रन बनाएर आउट भए । लाथामले ४७ रन जोड्न ५६ बलको सामना गरे ।

प्रकाशित : असार ३०, २०७६ ००:३२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

मनसुन सक्रिय तर ठूलो वर्षा नहुने

लो प्रेसर हटयो, न्यूनचापीय रेखा नेपालमै
अब्दुल्लाह मियाँ

काठमाडौँ — धेरैको मनमा अहिले एउटै प्रश्न छ, अब फेरि भारी मनसुनी वर्षा अब होला कि नहोला ? जल तथा मौसम पूर्वानुमान महाशाखाका वरिष्ठ मौसमविद् राजु प्रधानांग भन्छन्, ‘तत्काल त्यति ठूलो र लगातार वर्षाको संकेत छैन तर मनसुन सक्रिय छ ।’ 

प्रधानांगका अनुसार मनसुनको न्यूनचापीय रेखा (मनसुन ट्रफ) तराईको भूभागमै छ । गत साता उक्त रेखा भारतबाट नेपालतिर सरेको थियो । न्यूनचापीय रेखा जहाँ बनेको हुन्छ, त्यसवरपर पानी पार्ने प्रणाली शक्तिशाली बनेको हुन्छ र वर्षा बढी हुन्छ ।

‘गत साता न्यूनचापीय रेखासँगै न्यूनचापीय प्रणाली (लो प्रेसर) विकसित भएपछि देशैभरि लगातार भारी वर्षा भएको थियो,’ प्रधानांगले भने, ‘अहिले लो प्रेसर नेपालको भूभागबाट विलिन भइसकेकाले त्यति ठूलो प्रभाव पर्ने देखिँदैन ।’ न्यूनचापीय रेखा मात्र रहेकाले लगातार वर्षाको संकेत नरहेको उनले बताए ।

न्यूनचापीय रेखा नेपालतिर सर्नुका साथै भारतको बिहार, उत्तरप्रदेश हुँदै नेपालको मध्यभागसम्म लो प्रेसरसमेत विकसित भएपछि झन्डै तीन दिन लगातार वर्षा भएको थियो । तीन दिनमा मुलुकका धेरै स्थानमा एक महिनामा पर्ने औसत वर्षाभन्दा बढी पानी परेको छ ।

एकै पटक धेरै वर्षा भएकाले असरसमेत निम्तिएको छ । लो प्रेसर बंगालको खाडीमै बन्छ र पश्चिम सर्दै आउँछ । प्रधानांगका अनुसार न्यूनचापीय रेखा जहाँ हुन्छ, त्यसैलाई पछ्याउँदै लो प्रेसर आउँछ ।

के हो न्यूनचापीय रेखा ?
न्यूनचापीय रेखाले पानी पार्ने प्रणाली विकास गर्छ । ठूलो क्षेत्रफल बनाएर फैलिने यो रेखा भारतको उत्तराखण्ड हुँदै भुटानसम्मै फैलिएको हुन्छ । यो रेखा सतहमा प्रभाव जमाएर फैलिएको हुन्छ । ‘मनसुनका बेला यो रेखा तलमाथि (उत्तर र दक्षिण) सरिरहन्छ,’ प्रधानांगले आइतबार कान्तिपुरसित भने, ‘ठ्याक्कै यति दिनमा सर्छ भनेर भन्न नसकिए पनि औसतमा एक सातामा तलमाथि गरिरहन्छ ।’

न्यूनचापीय रेखा तलतिर सर्‍यो भने नेपालमा मनसुन कमजोर हुन्छ र वर्षा कम हुन्छ । धेरै समय दक्षिण (भारत) तिर बसिरह्यो भने सुक्खा पनि हुन सक्छ । न्यूनचापीय रेखा माथि (उत्तर) तिर सर्‍यो भने मनसुन सक्रिय हुन्छ र वर्षा धेरै हुन्छ ।

जल तथा मौसम पूर्वानुमान महाशाखाका अनुसार केही दिन नेपालमा मनसुन सक्रिय हुने देखिन्छ । सरदर हिसाबले जेठ अन्तिममै मनसुन भित्रिनुपर्ने भए पनि नेपालमा १० दिन ढिलो गरी असार ५ गते पूर्वी भागबाट मनसुन प्रवेश भएको थियो । कमजोर अवस्थामा प्रवेश भएको मनसुन नेपालभरि फैलिन भने करिब एक साता लाग्यो ।

मध्य जुनदेखि सेप्टेम्बरसम्म करिब एक सय ५ दिन नेपालमा मनसुनी वर्षा हुन्छ । तीमध्ये जुलाईमा बढी वर्षा हुन्छ । मनसुनमा वार्षिकको ८० प्रतिशतसम्म (सरदर १४ सय मिलिमिटरभन्दा बढी) वर्षा हुन्छ ।

चौधौं दक्षिण एसियाली जलवायु दृष्टिकोण मञ्च (सास्कोफ) को वैशाखमा भएको दक्षिण एसियाली मौसम विज्ञहरूको भेलाले यो वर्षको मनसुनमा प्रदेश १, २ र ३ को अधिंकाश भूभागसहित प्रदेश ५ को पश्चिमी भूभागमा औसतभन्दा कम वर्षा हुने आकलन गरेको छ । अन्य भागमा भने औसत र औसत नजिक वर्षा हुने उनीहरूको अनुमान थियो ।

जल तथा मौसम विज्ञान विभागका महनिर्देशक सरजुकुमार वैद्यले अहिले पूर्वी र मध्य भागमा बढी मनसुनी वर्षा भएको देखिए पनि चार महिनासम्मको अवधिलाई आधार मानेर पूर्वानुमान गरिएको बताए । ‘मनसुनको सुरुवाती चरणमा प्रायःजसो पूर्वी भागमा बढी वर्षा भएको देखिन्छ,’ वैद्यले भने, ‘अझै करिब तीन महिना मनसुन बाँकी भएकाले अहिले नै मनसुनी वर्षाको विश्लेषण गर्नु उपयुक्त हुँदैन ।’

महाशाखाका अनुसार न्यूनचापीय रेखा तराईमै रहेकाले पूर्वदेखि पश्चिमसम्मै वर्षाको संकेत देखिएको छ । सोमबार र मंगलबार देशभर सामान्यदेखि पूर्णतया बदली रही देशका धेरै स्थानमा वर्षा हुने सम्भावना छ । देशको पश्चिम तथा मध्यक्षेत्रका थोरै स्थान र पूर्वका एक वा दुई स्थानमा भारी वर्षा हुने सम्भावना रहेको महाशाखाले मनसुन बुलेटिनमा उल्लेख गरेको छ ।

प्रकाशित : असार २९, २०७६ २१:५१
पूरा पढ्नुहोस्
प्रतिक्रिया
पठाउनुहोस्
ADVERTISEMENT