सिमोनालाई उच्च सम्मान

(एएफपी)

बुखारेस्ट — ग्रान्ड स्लाम टेनिस विम्बल्डन च्याम्पियन सिमोना हालेपलाई उनको देश रोमानियाको राष्ट्रपति कार्यालय तथा अर्थोडक्स चर्चले उच्च सम्मान प्रदान गरेको छ । अमेरिकी सेरेना विलियम्सलाई पराजित गरी पहिलोपल्ट विम्बल्डनको उपाधि जितेकी उनलाई स्वदेशमा सयौं समर्थकले स्वागत गरेका थिए । 

२७ वर्षीया हालेप विम्बल्डनमा एकलतर्फ उपाधि जित्ने पहिलो रोमानियानी नागरिक हुन् । शनिबार उनले सातपल्टकी च्याम्पियन सेरेनालाई ६–२, ६–२ को सहज सेटमा ५६ मिनेटभित्रै पराजित गरेकी थिइन् ।

‘मैले अवसरको उपयोग गरें । मैले जति गर्नसक्थे त्यति गरें, त्यसैले मैले खेल जितेँ,’ हातमा ट्रफी र पुष्पगुच्छा लिएकी हालेपले रोमानियाको राजधानीमा अवस्थित बुखारेस्ट अन्तर्राष्ट्रिय विमानस्थलमा पत्रकारसँग भनिन्, ‘म आफ्नो रणनीतिमा केन्द्रित छु । सेरेना इतिहासकै सर्वश्रेष्ठ खेलाडी हुन् ।’ उनको स्वागतमा जम्मा भएका समर्थकले ‘ब्राभो सिमोना’ भन्दै उत्साह मनाएका थिए ।

हालेपको यो समग्रमा दोस्रो ग्रान्ड स्लाम उपाधि हो । यसअघि गत वर्ष उनले रोनाल्ड ग्यारोसमा फ्रेन्च ओपनको उपाधि जितेकी थिइन् ।

राष्ट्रपतिले उनलाई ‘स्टार अफ रोमानिया’ सम्मान प्रदान गरेकी हुन् । चर्चले उनलाई प्याट्रियार्कल क्रस चिन्ह दिएको छ । गत वर्ष फ्रेन्च ओपनको उपाधि जितेपछि हालेपले भनेकी थिइन्, ‘म सधैं क्रसको संकेत गर्छु । किनभने म भगवान्लाई विश्वास गर्छु । यो जे भइरहेको छ त्यो सबै भगवान्कै देन हो ।’

प्रकाशित : श्रावण १, २०७६ १०:१४
ADVERTISEMENT
ADVERTISEMENT
प्रतिक्रिया
पठाउनुहोस्

प्रदेश ५ लाई राष्ट्रपति सिल्ड

कान्तिपुर संवाददाता

काठमाडौँ — ११ औं राष्ट्रपति रनिङ सिल्डमा मंगलबार प्रदेश ५ टिम च्याम्पियन बनेको छ । विभिन्न ६ खेल समावेश प्रतियोगितामा प्रदेश ५ ले २० स्वर्ण, २० रजत र १० कांस्य पदक जितेको थियो । 

राष्ट्रिय खेलकुद परिषद् (राखेप) द्वारा आयोजित प्रतियोगितामा १३ स्वर्णसाथ प्रदेश १ दोस्रो तथा १२ स्वर्णसाथ सुदूरपश्चिम तेस्रो भए । प्रतियोगितामा चार नयाँ जुनियर राष्ट्रिय कीर्तिमान बन्यो । त्यसमा पनि प्रदेशकै वर्चस्व रह्यो । चारै कीर्तिमान प्रदेश ५ का खेलाडीले बनाए ।

छात्र ४ गुणा ४ सय मिटर रिलेमा सिमान पाण्डे, लेखनाथ महर, वेदबहादुर ओली र श्रवण केवटले कीर्तिमान बनाए । सोही स्पर्धाको छात्रामा अरुणा रिजाल, पूर्णिमा खड्का, पूजा चौधरी र करुणा रिजालले कीर्तिमान रचे । छात्रा सटपुटमा संगीता अधिकारी र ४ सय मिटर दौडमा अरुणा रिजालले कीर्तिमान बनाएका थिए । प्रत्येक कीर्तिमानका लागि १० हजार रुपैयाँ पुरस्कार प्रदान गरियो ।

एथलेटिक्स, भलिबल, कराँते, तेक्वान्दो, उसु र कबड्डी समावेश प्रतियोगितामा व्यक्तिगत स्पर्धामा शीर्ष तीन स्थान हात पार्ने खेलाडीले क्रमश: ५ हजार, ४ हजार र ३ हजार रुपैयाँ पुरस्कार पाए । टिममा पहिलो हुनेले २ हजार ५ सय, दोस्रोले २ हजार र तेस्रोले १ हजार ५ सय पुरस्कार हात पारे ।

प्रकाशित : श्रावण १, २०७६ १०:११
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT