विश्वकप एसियाली छनाेट : नेपालले अस्ट्रेलियासँग खेल्ने

कान्तिपुर संवाददाता

काठमाडौँ — नेपाली राष्ट्रिय फुटबल टिमले एसियाली फुटबलको शक्तिशाली टिम अस्ट्रेलियाविरुद्ध पहिलोपल्ट प्रतिस्पर्धा गर्ने भएको छ ।

एसियाली फुटबल महासंघ (एएफसी) को क्वाललम्पुरस्थित मुख्यालयमा बुधबार भएको विश्वकप २०२२ को एसियाली छनोटको ‘ड्र’ अनुसार नेपालले नयाँ प्रतिद्वन्द्वीको रूपमा अस्ट्रेलियालाई पाएको हो ।

‘होम एन्ड अवे’ का आधारमा हुने छनोटमा नेपालले अक्टोबर १०, २०१९ मा अस्ट्रेलियाको यात्रा गर्नेछ । नेपालले फिफा वरीयतामा ११८ स्थान माथिको टिमलाई मार्च ३१, २०२० मा काठमाडौंमा निम्त्याउने छ ।

पछिल्लोपल्ट रुसमा भएको विश्वकपमा समूह चरणबाटै बाहिरिएको अस्ट्रेलिया वरीयतामा ४३ औं स्थानमा छ भने नेपाल १ सय ६५ औंमा । पाँचपल्ट विश्वकप खेलेको अस्ट्रेलिया सन् २०१५ को एसियन कप च्याम्पियन पनि हो । उसको टिम युरोपेली लिगमा व्यस्त खेलाडीले भरिएको हुने गर्छ । नेपाल भने दक्षिण एसियाली च्याम्पियनसिपमा पनि सेमिफाइनलमाथि उक्लिन सकेको छैन ।

अस्ट्रेलिया, जोर्डन, चाइनिज ताइपेई र कुवेतसँगै छनोटको समूह ‘बी’ मा रहेको नेपालले कुवेतविरुद्ध घरेलु भूमिमा प्रतिस्पर्धा गर्दै सेप्टेम्बर ५, २०१९ मा छनोट यात्रा थाल्नेछ । अघिल्लो महिनाको वरीयतामा एसियाको शीर्ष ३४ स्थानमा रहेपछि सिधै छनोटको समूह चरणमा प्रवेश पाएको नेपाल समूहमा सबैभन्दा कमजोर टिम हो । त्यसैले नेपालले छनोटका प्रतिद्वन्द्वीहरू हेरेर अरुको खेलभन्दा पनि आफ्नै खेलमा ध्यान दिएर स्तर बृद्धिका लागि प्रतिस्पर्धा गर्नुपर्ने प्रशिक्षक योहान कालिनले प्रतिक्रिया दिएका छन् ।

स्वीडिस प्रशिक्षक कालिनको मार्चमा टिम सम्हालेयता नेपालले मैत्रीपूर्ण चार खेल खेल खेलेको छ । त्यसमा कुवेतविरुद्ध एक बराबरी र एक हारको नतिजा बेहोरेको थियो भने मलेसियामा पराजित भएको थियो । नेपालले चाइनिज ताइपेईविरुद्ध ताइवानमा १–१ को बराबरी गरेको थियो ।

कुवेत र चाइनिज ताइपेईविरुद्ध विपक्षी मैदानमा खेलेको बराबरी नतिजलाई उपलब्धिमूलक मानिएको छ । यही विश्वकप छनोटको तयारीमा नेपाली टिमले दुई सातायता निरन्तर अभ्यास गरिरहेको छ ।

विश्वकप छनोटको यो दोस्रो चरणको प्रतिस्पर्धा एसियन कप २०२३ को छनोटको रूपमा पनि रहेको छ । आठ समूहका विजेता र उपविजेतामध्ये उत्कृष्ट चार टिम विश्वकप छनोटको अन्तिम चरणमा प्रवेश गर्नेछन् र त्यससँगै ती १२ टिम चीनमा २०२३ मा हुने एसियन कपमा पनि छनोट हुनेछन् । अरु टिमले एसियन कपमा बाँकी रहेको १२ स्थानको लागि प्रतिस्पर्धा गर्नेछन् ।

नेपालको खेल
नेपालविरुद्ध कुवेत (होम)५ सेप्टेम्बर, २०१९
नेपालविरुद्ध चाइनिज ताइपेई (होम)१० सेप्टेम्बर, २०१९
अस्ट्रेलियाविरुद्ध नेपाल (अवे)१० अक्टोबर, २०१९
नेपालविरुद्ध जोर्डन (होम)१५ अक्टोबर, २०१९
कुवेतविरुद्ध नेपाल (अवे)१९ नोभेम्बर, २०१९
चाइनिज ताइपेईविरुद्ध नेपाल (अवे)२६ मार्च, २०२०
नेपालविरुद्ध अस्ट्रेलिया (होम)३१ मार्च, २०२०
जोर्डनविरुद्ध नेपाल (अवे)४ जुन, २०२०

प्रकाशित : श्रावण २, २०७६ ०८:१२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

दक्षिण एसियाली शारीरिक सुगठन : १२ औं संस्करण भोलिदेखि

कान्तिपुर संवाददाता

काठमाडौँ — नेपालमा हुने १२ औं दक्षिण एसियाली शारीरिक सुगठन प्रतियोगिताको तयारी पूरा भएको छ । नेपाल शारीरिक सुगठन तथा फिटनेस संघको आयोजना हुने कार्यक्रममा सार्कका ७ र अफगानिस्तान गरी ८ राष्ट्रका खेलाडीले भाग लिने छन् । प्रतियोगिता साउन ३ र ४ गत प्रज्ञा भवन कमलादीमा हुनेछ ।

बुधबार पत्रकार सम्मेलनमा महिला र पुरुषको गरी १८ विधामा प्रतिस्पर्धा हुने संघले जानकारी दिएको छ । प्रतियोगितामा शारीरिक सुगठनतर्फ ५५, ६०, ६५, ७०, ७५, ८०, ८५, ९० केजी र त्यो भन्दा माथि तौल समूहमा प्रतिस्पर्धा हुनेछ ।

जुनियर पुरुष शारीरिक सुगठन, पुरुष फिटनेस फिजिक्स, पुरुष एथलेटिक्स फिजिक्स, पुरुष स्पोर्टस् फिजिक्स, महिला एथलेटिक्स फिजिक्स र महिला मोडल फिजिक्स विधा पनि पहिलोपल्ट थप गरी प्रतिस्पर्धाको तयारी गरिएको आयोजक संघका उपाध्यक्ष दिनेश राजभण्डारीले जानकारी दिए ।

साउन ३ मा प्रि–जजिङ चरण र ४ मा फाइनल चरणको तालिका तय गरिएको छ । शारीरिक सुगठनतर्फ ओभरअल विजेतालाई मिस्टर साउथ एसिया घोषणा गरिनेछ भने टिम च्याम्पियनको पनि घोषणा गरिनेछ । प्रतियोगिताका लागि ८ देशका १ सय ३० खेलाडीले भाग लिने छन् । घरेलु टोली नेपालबाट १८ पुरुष र ५ महिला खेलाडीको सहभागिता रहने जनाइएको छ ।

प्रतियोगिताका लागि १ करोड ३९ लाख बजेट अनुमान गरिएकोमा निजी क्षेत्र र प्रायोजकबाट संकलन गरिने अध्यक्ष राजेशबाबु श्रेष्ठले बताए । प्रतियोगिताका लागि राष्ट्रिय खेलकुद परिषद्ले १० लाख विनियोजन गरेको छ । सन् २०२० लाई नेपाल भ्रमण वर्षको रूपमा मनाउन लागिएकोमा त्यसैको तयारीस्वरुप अन्तर्राष्ट्रिय शारीरिक सुगठन प्रतियोगिता गरिएको उनले बताए ।

विश्व शारीरिक सुगठन तथा फिजिक्स स्पोर्टस महासंघका अध्यक्ष दातुक पाउल चुआ, महासचिव चेतन पठारे, कायकारी निर्देशक क्रिस्टिना क्याम, दक्षिण एसियाली शारीरिक सुगठनका प्रशान्त आप्के पनि नेपाल आएका छन् ।
यस प्रतियोगिताका लागि दक्षिण एसियाली अध्यक्ष आप्केले नेपालका अध्यक्ष श्रेष्ठलाई भारु ७ लाखको चेक हस्तान्तरण गरेका छन् ।

नेपालका प्रतिस्पर्धी खेलाडी
किसनदास दिवाकार (५० केजी), डेविड बलामी (६०केजी), कमल भण्डारी (६० केजी), प्रज्वलमान शाक्य (६५ केजी), रमेश कार्की (७० केजी), समिर श्रेष्ठ (७० केजी), अशोक महर्जन (७५ केजी), मिलन सिजापती (८५ केजी)

मेन्स फिजिक्सतर्फ : नरेश मालाकार, कृष्ण महर्जन, सविन कार्की, राजु राई, विष्णुराम केसी, निशान्तमान प्रधान, डम्बर मार्कन्ड, राजीव थापा, प्रमोद राई, सन्तोष बिक ।

महिला फिजिक्सतर्फ : रजनी श्रेष्ठ, सुजिता मानन्धर, पूजा श्रेष्ठ, मल्लिका शाक्य, तारा डंगोल ।

प्रकाशित : श्रावण २, २०७६ ०८:१०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT