फेरि स्वर्णकै लक्ष्य
काठमाडौँ — नेपाली राष्ट्रिय महिला टिमका मुख्य प्रशिक्षक हरि खड्का महिला फुटबल प्रमुखमा पनि नियुक्ति पाएपछि दोहोरो जिम्मेवारीमा छन् । अबको चार महिना भने १३ औं दक्षिण एसियाली खेलकुद (साग) मै केन्द्रित हुने उनी बताउँछन् ।
‘दोहोरो जिम्मेवारीले मलाई प्रभाव पार्दैन,’ प्रशिक्षक खड्काले भने, ‘अहिले पूर्णतः सागमा केन्द्रित छु ।’ एसियाली फुटबल महासंघ (एएफसी) को निर्देशनअनुसार अखिल नेपाल फुटबल संघ (एन्फा) ले दरखास्त खोलेको थियो र त्यसमा अन्तर्वार्ता दिने एक्लो आवेदनकर्ता उनी नै थिए । त्यसपछि मंगलबार महिला फुटबल प्रमुखमा नियुक्ति पाएका उनले भने, ‘एएफसीको प्रावधानमा महिला फुटबल प्रमुखले कोचिङ गर्न नपाउने भन्ने छैन । दोहोरो भूमिकालाई व्यवस्थापन गर्नेछु ।’
नेपाली पुरुष टिमका पूर्वकप्तान खड्का एन्फाको नेतृत्व परिवर्तनसँगै गत वर्ष जेठमा महिला राष्ट्रिय टिमको मुख्य प्रशिक्षक नियुक्त भएका थिए । महिला फुटबलमै अर्को जिम्मेवारी थपिएपछि उनले भने, ‘महिला फुटबल प्रमुखका रूपमा मेरो काम योजना बनाउने हो, त्यसलाई एन्फाले कार्यान्वयन गर्ने हो । महिला खेलाडी उत्पादन हुने सम्भावित जिल्लाहरूमा ग्रासरुट कार्यक्रम, स्कुल–कलेजमा महिला फुटबलका कार्यक्रम चलाउने, लिगको संरचना राम्रो बनाउने, युवा स्तरका प्रतियोगितामा ध्यान दिने र अन्तर्राष्ट्रिय सहभागितालाई बढाउने काम गर्न चाहन्छु ।’
फिटनेसमा मिहिनेत
उनले ४२ खेलाडीको सूची निकाल्दै १२ साउनदेखि १३ औं सागलाई लक्षित गरी एन्फा कम्प्लेक्समा प्रशिक्षण दिइरहेका छन् । ‘१३ औं साग हाम्रो घरेलु मैदानमा हुँदै छ । हाम्रो लक्ष्य पक्कै पनि स्वर्ण पदक नै हो,’ उनले भने, ‘पाँचौं साफको फाइनलमा भारतविरुद्ध दोस्रो हाफमा गरेको कमी–कमजोरीबारे प्रतिवेदन एन्फालाई बुझाइसकेको छु । अब ती कमजोरीलाई सुधार गर्नेमा केन्द्रित छु ।’
नेपालले महिला साफमा पहिलोपल्ट च्याम्पियन बन्ने लक्ष्य बनाएको थियो । चैतमा विराटनगरस्थित सहिद मैदानमा भएको फाइनल ३–१ ले कब्जा गर्दै भारत लगातार पाँचौंपल्ट च्याम्पियन भयो । उनले सम्हालेयता नेपाली टिमले १४ खेल खेलेको छ, जसमा ६ जित, ३ बराबर र ५ हारको नतिजा निस्किएको थियो । नेपाली महिला टिम अन्तर्राष्ट्रिय फुटबलमा सबभन्दा व्यस्त रहेको यही अवधि हो ।
चिनियाँ सुपर लिगको टिम बेइजिङ बीजी फोनिक्ससहितको टिमविरुद्ध तीन मैत्रीपूर्ण खेलसँगै बेइजिङमा दस दिनको तयारी गरेपछि खड्काले सम्हालेको टिम पहिलोपल्ट प्रतिस्पर्धामा उत्रिएको थियो । त्यो म्यान्मार यात्राको प्रतियोगिता थियो– ओलम्पिक छनोटको पहिलो चरण ।
पहिलोपल्ट सहभागी हुँदै ओलम्पिक छनोटको दोस्रो चरणमा पुग्यो र यो नेपाली महिला फुटबलमा ठूलै उपलब्धि मानिन्छ । साफलगत्तै चैतमै म्यान्मारको मन्डलयमा ओलम्पिक २०२० छनोटको दोस्रो चरण भएको थियो । त्यसयता नेपाली टिम मैदानमा ओर्लिएको छैन ।
‘साफमा केटीहरू जुन स्तरमा थिए, त्यसमा अहिले उनीहरूको अवस्था ३० प्रतिशत मात्रै छ । त्यसैलाई सुधार गर्न मिहिनेत गरिरहेको छु,’ ४५ वर्षीय खड्काले भने, ‘पहिला चार महिना ट्रेनिङ गराउने अवसर पाएको थिएँ । त्यस बेला खेलाडीहरूको स्तर, टेक्निक, इन्डुरेन्सलगायत सबै पक्ष राम्रो थियो । ओलम्पिक छनोटको दोस्रो चरणपछि खेलाडीहरू आ–आफ्नो क्लबमा फर्किएका थिए । अहिले सबैमा कमी देखेको छु । सुरुमा फिटनेसमै मिहिनेत गरिरहेको छु । स्ट्रेन्थ र इन्डुरेन्ससहित खेलाडीलाई पुरानै लयमा फर्काउन डेढ महिनासम्म लाग्छ । त्यसपछि ट्याक्टिसमा ध्यान दिनेछौं ।’
सागको प्रारम्भिक छनोटमा बोलाइएका ४२ खेलाडीमा आठ सदस्य नयाँ हुन् । प्रिती राईलगायत नयाँ खेलाडी प्राविधिक रूपमा राम्रो रहेको पनि खड्काले बताए । ‘यू–१५ र यू–१९ स्तरमा राम्रो प्रदर्शन गरेका चेलीहरू छन् । अभ्यासमा उनीहरूको स्तर कस्तो हुन्छ भन्ने हेर्नेछु र त्यसमा सुधार गरेर लानेछौं,’ उनले भने । दोस्रो चरणमा ३० खेलाडीलाई छनोट गर्ने उनको योजना छ ।
मैत्रीपूर्ण खेलको माग
खड्काले १३ औं सागमा स्वर्ण पदक जित्ने अभियानलाई सफल बनाउन एन्फासँग तीन मैत्रीपूर्ण खेलको व्यवस्था गर्न माग गरेका छन् । ‘भारत वा त्योभन्दा राम्रो स्तरको टिमविरुद्ध खेल्न चाहन्छौं,’ उनले भने, ‘पहिला बेइजिङका तीन खेलले ठूलो प्रभाव पारेको थियो । यसपालि यही देश भनेर हामीले भनेका छैनौं । दस दिनमात्र होइन, एक महिना (भ्रमण) भयो भने धेरै राम्रो हुनेछ ।’
ओलम्पिक छनोटमा जानुअघि खडकाको टिमले बेइजिङ फोनिक्सविरुद्ध दुई र बेइजिङ स्पोर्ट युनिभर्सिटीविरुद्ध एक खेल खेलेको थियो । चिनियाँ सुपरलिग क्लब फोनिक्सविरुद्ध नेपालले दुवै खेल हारेको थियो । त्यसमा नेपाली खेलाडीको प्रदर्शन उत्कृष्ट रहेको उल्लेख गर्दै उनले भने, ‘त्यसैमा देखिएको कमजोरी सच्याएर हामी ओलम्पिक छनोटमा पुगेका थियौं । त्यही बेइजिङ यात्राले टिमलाई बलियो बनाएको थियो ।’
नेपालले भारत र म्यान्मारजस्ता माथिल्लो स्तरका टिमविरुद्ध बराबरी गरेको थियो । कमजोर मानिएको बंगलादेशविरुद्ध अन्तिम खेलमा बराबरीमा अड्काएर पनि नेपाल समूहमा तेस्रो हुनेहरूमध्ये उत्कृष्ट दुईमा रहेर ओलम्पिक छनोटको अर्को चरणमा पुगेको थियो ।
ढाकामा सन् २०१० मा भएको ११ औं संस्करणदेखि सागमा महिला फुटबललाई समावेश गरिएको हो । पछिल्ला दुवै संस्करणमा नेपालले रजत पदक हात पारेको थियो । यसमा पनि साफ च्याम्पियनसिपमा जस्तै स्वर्ण पदकको दुवै खेलमा नेपाललाई भारतले सिकार बनाएको थियो ।
दक्षिण एसियाली खेलकुदको कुम्भमा नेपाली टिमलाई पहिलो स्वर्ण जिताउने प्रयासमा मुख्य प्रशिक्षक खड्कासँगै प्रशिक्षक अरुणा गुरुङ र गोलकिपिङ प्रशिक्षक अस्मिता खवासले खेलाडीहरूलाई तयार गरिरहेका छन् । १३ औं सागमा महिला फुटबल पोखरा रंगशालामा सञ्चालन गर्ने तयारी भइरहेको छ ।
प्रकाशित : श्रावण १७, २०७६ ०७:२५