सोमपालको बिर्सनलायक ‘डेब्यु’

कान्तिपुर संवाददाता

काठमाडौँ — नेपाली राष्ट्रिय टोलीका तीव्र बलर सोमपाल कामीले अन्तर्राष्ट्रिय फ्रेन्चाइज क्रिकेटमा बिर्सनलायक डेब्यु गरेका छन् । क्यानडामा जारी ग्लोबल ट्वान्टी–२० लिग टिम विन्नीपेग हक्सका लागि पहिलो खेलमा उनको प्रदर्शन बिर्सनलायक रह्यो ।

बलिङ र ब्याटिङ दुवैमा असफल देखिएका उनीपहिलो खेलको दबाबबाट मुक्त हुन सकेनन् । उनी ३ हजार डलरमा अनुबन्ध भएका थिए ।

आइतबार बिहान सोमपाल आबद्ध टिम हक्सले एडमोन्टन रोएल्ससँग ८ विकेटको पराजय बेहोरेको हो । टस हारेर पहिले ब्याटिङ गरेको विन्नीपेगले निर्धारित ओभरमा ६ विकेट गुमाएर १९५ रनको योगफल खडा गरेको थियो । ओपनर साइमन अनवारले ३५ बलमा ६२ र क्रिश लिनले १९ बलमा ३३ रन प्रहार गरेपछि विन्नीपेगले सानदार सुरुआत गरेको थियो । यी दुईले पहिलो विकेटका लागि एक सय रनको साझेदारी गरेका थिए ।

विन्नीपेगका कप्तान जेपी डुमिनीले पनि ३१ बलमा ४८ रन जोडे । आठौं नम्बरमा ब्याटिङमा आएका सोमपालले अपेक्षाकृत प्रदर्शन गर्न सकेनन् । उनले ५ बल खेलेर १ रन मात्र बनाउन सके । १८ औं ओभरको अन्तिम बलमा कालिम साना आउट भएपछि आएका सोमपालले आफ्नो प्रदर्शनमा भन्दा सेट ब्याट्सम्यान डुमिनीलाई स्ट्राइक दिने चक्करमा लागे ।

हङकङ राष्ट्रिय टोलीका ओपनर अंशुमन रथले ५० बलमा ९ चौका र ४ छक्कासहित नटआउट ८७ रनको विस्फोटक इनिङ्स खेलेपछि एडमोन्टनले १७.४ ओभरमै लक्ष्य भेट्टायो । एडमोन्टनका कप्तान मोहम्मद हफिजले ३० बलमा ५५ रनको अर्धशतकीय योगदान गरे । जिम्मी निसम ११ बलमा २८ रन बनाउँदै नटआउट रहे ।

बलिङतर्फ सोमपालले २ ओभर मात्र अवसर पाए । तर उनले ३३ रन खर्चिए । इनिङ्सको दसौं ओभरमा बलिङमा आएका सोमपाललाई मोहम्मद अफिजले दोस्रो बलमै छक्का प्रहार गरे । पहिलो ओभरमा १५ रन खर्चने क्रममा उनले ३ वाइड बल फालेका थिए ।

१६औं ओभरमा बलिङमा फर्किएका सोमपालका लागि यो ओभर झनै महँगो पर्‍यो । यस ओभरमा उनले २ छक्का र १ चौकासहित १८ रन खर्चिए । ओभरको दोस्रो बलमा जिम्मी निसमले छक्का प्रहार गरे । चौथो र पाँचौं बलमा अंशुमन रथले क्रमसः चौका र छक्का प्रहार गरी सोमपालको डेब्यु बिर्सनलायक बनाइदिए ।

सन्दीप फेरि खर्चालु
युवा लेग स्पिनर सन्दीप लामिछानेले पनि शनिबार नै प्रतियोगितामा पहिलो खेल खेले । अघिल्लो सिजनमै डेब्यु गरेका सन्दीपका लागि यो सिजनको पहिलो खेल महँगो पर्‍यो । ६० हजार डलर मूल्यमा टोरन्टोमा आबद्ध सन्दीपले ४ ओभरको स्पेलमा ४४ रन खर्चिएर १ विकेट लिए । त्यसमध्ये आफ्नो पहिलो ओभरमै उनले २४ रन खर्चिएका थिए ।

सन्दीप आबद्ध टोली टोरन्टो नेसनल्सले लिगको शीर्ष स्थानमा रहेको ब्राम्प्टन वोल्भ्ससँग ११ रनले पराजित भएको हो । टोरन्टोका लागि प्रतियोगिताको चौथो खेलमा तेस्रो हार हो । ब्राम्प्टनले दिएको २ सय २३ रनको लक्ष्य पछ्याएको टोरन्टोले २ सय ११ रन मात्र बनाउन सक्यो ।

टस हारेर पहिले ब्याटिङ गरेको ब्राम्प्टनले निर्धारित ओभरमा ६ विकेट गुमाएर २ सय २२ रन बनाएको थियो । स्कटल्यान्डका ओपनर जर्ज मुन्सीले ३६ बलमा ६६ रनको विस्फोटक इनिङ्स खेलेका थिए । पाँचौं ओभरमा बलिङमा आएका सन्दीपलाई सो ओभरमा मुन्सीले ३ चौका र २ छक्का प्रहार गरेका थिए ।

आठौं ओभरमा उनले उत्कृष्ट पुनरागमन गरे । यस ओभरमा ३ रन खर्चेका उनले १ विकेट पनि लिए । ७.४ ओभरमा उनले १६ बलमा २८ रन बनाएर खेलिरहेका न्युजिल्यान्डका कोलिन मुनरोलाई मिचेल म्याक्लाङ्घानको हातबाट क्याच आउट गराए । मुनरो इन्डियन प्रिमियर लिग (आईपीएल) मा सन्दीपसँगैं दिल्ली क्यापिटल्सबाट खेल्छन् ।

दसौं ओभरमा सन्दीपले १ चौकासहित ७ रन खर्चिए । चौथो तथा अन्तिम ओभरमा उनले ११ रन खर्चिए । १४औं ओभरमा सन्दीपको बलमा नीतीशकुमार र सहिद अफ्रिदीले १–१ चौका प्रहार गरे । ब्राम्प्टनका लागि हङकङका कप्तान बाबर हायतले विस्फोटक ब्याटिङसहित ठूलो स्कोरको योगफलका लागि सहयोग गरे । उनले १८ बलमा ५ छक्का र २ चौकासहित नटआउट ४८ रन जोडे । बाबरले १९ औं ओभरमा जेरेमी गोर्डोनको बलमा लगातार ४ छक्का प्रहार गरे ।

विशाल लक्ष्य पछ्याएको टोरन्टोले निर्धारित ओभरमा ७ विकेट गुमाएर २ सय ११ रनमात्र जोड्न सक्यो । कप्तान युवराज सिंहले २२ बलमा ३ चौका र ५ छक्कासहित ५१ रनको सानदार इनिङ्स खेले पनि टिमलाई जिताउन सकेनन् । ब्रेन्डन म्याकुलमले ३६, हेनरिच क्लासेनले ३५ र रोड्रिगो थोमसले टोरन्टोबाट २८ रन जोडे । ब्राम्प्टनका नवाब सिंहले २ विकेट लिए ।

प्रकाशित : श्रावण २०, २०७६ ०७:५७
ADVERTISEMENT
प्रतिक्रिया
पठाउनुहोस्
ADVERTISEMENT

सिटीलाई कम्युनिटी शिल्ड

एएफपी

लन्डन — वेम्बली रंगशालामा भरिभराउ समर्थकका बीच लिभरपुललाई पेनाल्टी सुटआउटमा पराजित गरी म्यान्चेस्टर सिटीले कम्युनिटी शिल्डको उपाधि जितेको छ । सिटीले छैटौं पटक यो उपाधि जितेको हो र २०१५ मा आर्सनलपछि उपाधि रक्षा गर्ने पहिलो टोली बनेको छ । 

नियमित समयमा १–१ गोलको बराबरी भएपछि खेल पेनाल्टीमा पुगेको हो । सिटीले ५–४ गोलअन्तरको विजयसहित उपाधि उचालेको हो । सिटीका गोलरक्षक क्लाउडियो ब्राभोले जर्जिनियो वाइनल्डमको पेनाल्टी बचाए भने सिटीका गाव्रियल जेससले विजयी पेनाल्टी गोल गरेका थिए ।

अघिल्लो सिजनमा इंग्लिस प्रिमियर लिग र एफए कप जितेर कम्युनिटी सिल्डको उपाधि उचाल्ने सिटी पहिलो टोली हो । २००२ मा आर्सनलले पछिल्लो पटक यस्तो सफलता पाउँदा कम्युनिटी शिल्डमा लिभरपुललाई नै १–० ले पराजित गरेको थियो । परमपरागत रूपमा गत सिजनको प्रिमियर लिग र एफए कप विजेताबीच नयाँ सिजनको सुरुआतमा कम्युनिटी शिल्डमा खेल्ने गर्दछन् । सिटीले गत सिजन दुवै उपाधि जितेकाले लिभरपुललाई प्रिमियर लिगमा दोस्रो भएको हिसाबमा सिटीसँग खेल्ने मौका मिलेको थियो ।

१२ औं मिनेटमै रहिम स्टर्लिङले गोल गरी अग्रता दिलाएका थिए । डेभिड सिल्भाको फ्लिकमा उनले नजिकको दूरीबाट गोल गरेका हुन् । सन् २०१५ मा म्यानचेस्टर सिटीमा अनुबन्ध भएयता स्टर्लिङले आफ्नो पूर्व क्लबविरुद्ध पहिलो गोल गरेका हुन् । यसअघिका १० खेलमा स्टर्लिङ लिभरपुलविरुद्ध गोल गर्न असमर्थ रहेका थिए ।

इंग्लिस फुटबलका दुई उत्कृष्ट टिमबीचको प्रतिस्पर्धा निकै रोमान्चक थियो । दोस्रो हाफमा तीनपल्ट बल पोस्टमा लागेर बाहिरिएको थियो । स्टर्लिङले वान भर्सेस वानमा प्रहार गरेको बल पोस्टमा लागेको थियो । लिभरपुलका भर्जिल भान डाइकको हेड बारमा लाग्यो भने मोहम्मद सलाहले पनि पोस्टमाप्रहार गरे ।

गोल गर्न नसकेपछि निराश लिभरपुलका मोहम्मद सलाह  ।
७७ औं मिनेटमा भान डाइकको चलाखीपूर्ण क्रसमा जोइल माटिपले हेडमार्फत गोल गरी युरोपियन च्याम्पियन्स लिभरपुललाई बराबरीमा ल्याए । त्यसपछि खेलमा लिभरपुलले प्रभुत्व कायम राखेको थियो । मोहम्मद सलाह ३ अवसरमा चुक्न पुगेका थिए । त्यसमध्ये अन्तिम मिनेटमा उनको हेडर सिटीका डिफेन्डर केल वाल्करले बाइसाइकल किकमार्फत गोललाइनबाट क्लियर गर्नु उल्लेखनीय थियो ।

नियमित ९० मिनेटको समयमा बराबरी भएपछि सिधै पेनाल्टीमा पुगेको थियो । सिटीका पाँचै खेलाडीले गोल गरेका थिए । सिटीका गुन्डोगान, बर्नान्डो सिल्भा, फिलिप फोडेन, ओलेक्जान्दर जिन्चेन्को र गाव्रियल जेससले गोल गरे । लिभरपुलका जदरान साकिरी, एडम ललाना, एलेक्जान्डर च्याम्बरलिन र सलाहले मात्र गोल गरे ।

प्रकाशित : श्रावण २०, २०७६ ०७:५५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT