मोवाइलमै बजारको गहना छान्ने सुविधा

लीलानाथ घिमिरे

काठमाडौं — गहना छान्न अब बजार पुग्नु नपर्ने भएको छ ।

घरमै बसीबसी काठमाडौंका प्रतिष्ठित गहना पसलका सुन, चाँदी र हिराका गहना छान्न सकिने मोवाइल एप गहना बजार सोमबार राजधानीमा सार्बजनिक भएको छ । एन्ड्रोइड अपरेटिङ सिस्टममा उपलब्ध यस एपमा गहनाका विभिन्न डिजाइन तस्बिर हेर्दै गहना छान्न सकिने छ । त्यस्तै ग्राहकले आफ्नो क्षमता अनुसारको मूल्यका औंठी, नेकलेस, इयररिङ, पेन्डेन्ट, जन्तर, तिलहरी, टप, बेंगल, मंगलसूत्र, सिक्रीलगायतका गहना खोज्न सक्ने छन् । खोजेपछि त्यसलाई आफ्नो फेबरेट बनाएर सेभ गरेर सकिन्छ । फूर्सदमा बजार गएर त्यही डिजाइनको गहना किन्न सकिन्छ ।
आइटी कम्पनी विधिले नेपालमै पहिलो पटक गहनाबारे तस्बिरसहित सम्पूर्ण जानकारी गराउने मोवाइल एप गहना बजार सार्बजनिक गरेको हो । कम्पनीले एक सातामै आइओएसमा समेत एप उपलब्ध गराउने बताएको छ ।
'हामीलाई पसलेले कति तौलको गहना दिएको छ भन्ने जानकारी हुँदैन,' विधिका प्रमुख कार्यकारी अधिकृत सुवाश सापकोटाले भने,  'पसलेले जति तौल भन्यो, त्यतिमै विश्वास गर्नुपर्ने अवस्था छ । गहना बजार एपले त्यो गहनाको वास्तविक तौल, जर्ती र बनाउने ज्याला छुट्याएर हिसाव गर्ने तरिकासमेत सिकाउँछ ।' त्यसले गर्दा ग्राहक ठगिनबाट जोगिने उनको दावी छ ।
एप्समा दैनिक सुनको मूल्य आफै अपडेट हुन्छ । ग्राहकले ब्यवसायीले बताएको मूल्यमा भर पर्नु पर्दैन । त्यस्तै पसलको विश्वसनियताबारे बुझ्न सक्ने ब्यवस्था एपमा छ । दुई पसलका गहनाबीच तुलना गरेर गहना छान्नसकिन्छ । यस्तो सुविधा मोवाइलमा मात्र हैन, गहना बजारको वेवसाइटमा समेत उपलब्ध छ । 'गहना किन्दा ठगिने प्रबृत्ति रोक्न यस्तो एप्प विकास गरेका हौं,' विधिका प्राविधिक निर्देशक शंकर उप्रेतीले भने, 'यसलाई अन्तराष्ट्रिय बजारमा समेत विस्तार गर्ने योजना छ ।' विधिले ल्याएको एप सुरुमा गहना बजारका लागि भए पनि अन्य बस्तुसमेत खरिद विक्रीका लागि राख्न मिल्ने गरी डिजाइन गरिएको छ । यसले किनमेलको शैली परिवर्तन गर्ने उसको दावी छ  । ग्राहक पसलमा गएर गहनाका डिजाइन छानेर बस्न नभ्याउने अबस्थामा  मोवाइलमै सबै प्रकारका डिजाइन हेरेर पाइने पसलमा किन्न सक्छ ।
कम्पनीले आफ्नो मोवाइलमा गहना बजार एप डाउनलोड गरेको देखाएमा पसलबाट १५ देखि ३० प्रतिशतसम्म छुट पाउने ब्यवस्था मिलाएको जनाएको छ । 
 

प्रकाशित : पुस १४, २०७१ १९:०३
प्रतिक्रिया
पठाउनुहोस्

उत्तर र दक्षिण रहने गरी प्रदेश बनाऊः चुरेभावर

काठमाडौं — चुरेभावर राष्ट्रिय एकता पार्टी नेपालले राज्यपुनर्संरचना गर्दा राष्ट्रिय अखण्डता, सार्वभौमसत्ता, जातीय सद्भावलाई अक्षुण राखेर गर्नुपर्ने माग गरेको छ ।


प्रदेशको संख्या प्रस्ताव गर्दै चुरेभावर पार्टीले भनेको छ, ‘राज्यपुनर्संरचनाले मुलुकलाई विभाजन होइन की एकतावद्ध गर्नसक्नुपर्छ ।’
राष्ट्रिय एकतालाई ध्यानमा राखेर चुरेभावर पार्टीले मुलुकमा ‘छ प्रदेश’को अवधारणा आफ्नो घोषणापत्रमार्फत सार्वजनिक गरिसकेको उल्लेख गरेको छ ।
उसले सबै संघीय राज्य उत्तरदक्षिण हुनुपर्ने जनाएको छ । कोसी नदीपूर्व–बराह क्षेत्र प्रदेश, कमला नदीपूर्व – हलेसी प्रदेश, कमला नदी पश्चिम–जानकी प्रदेश, नारायणी नदीपारि–लुम्बिनी प्रदेश, कर्णली नदीपारि खप्तड प्रदेश तथा काठमाडौं उपत्यकालाई बागमती वा केन्द्र शासित प्रदेश बनाइनुपर्ने उल्लेख गरेको छ ।
धर्मका सम्बन्धमा मुलुकलाई धर्म निरपेक्षता वा सापेक्षता अर्थात ‘नेपाल हिन्दू राज्य रहने’ वा ‘नरहने’मा जनमतसंग्रहबाट टुङ्ग्याउनुपर्ने चुरेभावरले जनाएको छ ।
शासकीय स्वरुपमा नेपालको कार्यकारिणी अधिकार संसदबाट निर्वाचित प्रधानमन्त्रीमा निहीत रहने र संसदबाट नै निर्वाचित सेरिमोनियल राष्ट्रपति रहने आफूहरूको अवधारणा रहेको अध्यक्ष बद्रिप्रसाद न्यौपानले जानकारी दिए ।
निर्वाचन प्रणालीमा स्थानीय तह, प्रादेशिक तह र केन्द्रीय तहमा गरिने सम्पूर्ण निर्वाचन प्रणाली मिश्रित निर्वाचन प्रणाली हुनुपर्ने चुरेभावरको अवधारणा रहेको छ ।

प्रकाशित : पुस १४, २०७१ १८:५३
पूरा पढ्नुहोस्
प्रतिक्रिया
पठाउनुहोस्