सामसङ ग्यालेक्सी एस ८ र एस ८ प्लस बजारमा

कान्तिपुर संवाददाता

काठमाडौं — सामसङ इलेक्ट्रोनिक्सले ग्यालेक्सी एस ८ र एस ८ प्लस नेपाली बजारमा सार्वजनिक गरेको छ । बुधबार राजधानीमा एक कार्यक्रममार्फत यी दुई स्मार्टफोन सार्वजनिक गरिएका हुन् । उक्त स्मार्टफोन सर्वसाधारणले वैशाख २२ गते खरिद गर्न सक्ने कम्पनीले जनाएको छ ।

बुकिङका लागि भने बुधबारदेखि नै खुला गरेको सामसङ नेपालका आईएम बिज प्रमुख प्रणयरत्न स्थापितले बताए ।

नेपाली बजारमा एस ८ को मूल्य ८८ हजार ९ सय रुपैयाँ र एस ८ प्लसको ९८ हजार ९ सय रुपैयाँ तोकिएको छ । ग्यालेक्सी एस ८ को स्क्रिन ५.८ को रहेको छ भने ग्यालेक्सी एस ८ प्लसमा ६.२ इन्चको ‘इन्फिनिटी डिस्प्ले’ रहेको छ ।

दुवै स्मार्टफोनमा डिस्प्ले आकर्षक बनाउन गोरिल्ला ग्लासको प्रयोग गरिएको छ । पानी र धूलो छिर्न नसक्ने गरी तयार गरिएको एस ८ मा तीन हजार एमएएच र एस ८ प्लसमा ३५ सय एमएएच क्षमताको ब्याट्री प्रयोग गरिएको कम्पनीले जनाएको छ ।

फोनमा फ्रन्ट क्यामरा ८ मेगापिक्सल र पछाडिको क्यामेरा १२ मेगापिक्सल रहेको कम्पनीले जनाएको छ । कम्पनीका अनुसार यसले खिचेको फोटोको सार्पनेस र कन्ट्रास्ट अझै राम्रो हुनेछ । यी दुवै फोनको सेन्ट्रल प्रोसेसिङ युनिट (सीपीयू) १२ प्रतिशत र ग्राफिपिक प्रोसेसिङ युनिट (जीपीयू) २१ प्रतिशत रहेको जनाएको छ । दुवै फोनले हाई डाइनामिक रेन्ड (एचडीआर) लाई सपोर्ट गर्छ । यसमा भिडियोको गुणस्तर राम्रो छ । यी दुवै फोनलाई एकै हातले चलाउन सकिने कम्पनीले जनाएको छ । स्मार्टफोन खरिदमा आठ महिनाको लागि ८ जीबीको डाटा प्याकको पनि सुविधा दिइएको छ ।

एनसेलसँगको सहकार्यमा प्रत्येक महिना १ जीबीका दरले आठ महिनासम्म ८ जीबी डाटा उपलब्ध गराउन लागिएको स्थापितले बताए । ६ महिनासम्मका लागि बिमाको पनि व्यवस्था गरेको छ । ‘शिखर इन्सुरेन्सको साझेदारीमा ६ महिनाको ब्रेकेज इन्सुरेन्स र विभिन्न बैंकको सहकार्यमा ६ महिने ईएमआई प्रदान गरिन्छ,’ स्थापितले भने ।

प्रकाशित : वैशाख ७, २०७४ ०८:३७
प्रतिक्रिया
पठाउनुहोस्
ADVERTISEMENT

राजस्व संकलन ३२ प्रतिशतले बढ्यो

कान्तिपुर संवाददाता

काठमाडौं — गत आर्थिक वर्षको तुलनामा चालु आर्थिक वर्षको चैत मसान्तसम्म राजस्व संकलन ३२ प्रतिशतले बढ्यो । यो चालु आर्थिक वर्षको लक्ष्यको तुलनामा १ सय ४ प्रतिशतले प्रगति भएको आन्तरिक राजस्व विभागले जनाएको छ । बिहीबार विभागद्वारा जारी विज्ञप्तिमा यस्तो उल्लेख छ ।

विभागको तथ्यांकअनुसार ०७३ चैतसम्म १ खर्ब ७२ अर्व १७ करोड ४ लाख ५९ हजार रुपैयाँ राजस्व संकलन भएको छ । उक्त अवधिमा सरकारले १ खर्व ६५ अर्ब १६ करोड ४ लाख २५ हजार रुपैयाँ राजस्व संकलन गर्ने लक्ष्य राखेको थियो । 

क्षेत्रगत (शीर्षकगत) रूपमा पनि राजस्व संकलन बढेको विभागले जनाएको छ । जसमध्ये आयकरमा ९५ अर्व ३९ करोड ५६ लाख, मूल्य अभिवृद्धि करमा ४३ अर्ब ५ करोड ४६ लाख र अन्त:शुल्कमा ३२ अर्व ३६ करोड ४५ लाख रुपैयाँ संकलन भएको विज्ञप्तिमा उल्लेख छ । ‘ती शीर्षकहरूमा भएको वृद्धि रकम लक्ष्यको तुलनामा आयकरतर्फ (आयकर, बहालकर, ब्याजकर गरी) १ सय ७ प्रतिशत, मूल्य अभिवृद्धि करतर्फ ९९ प्रतिशत र अन्त:शुल्कतर्फ १ सय ४ प्रतिशत छ,’ विज्ञप्तिमा भनिएको छ । 

उक्त अवधिमा शिक्षा सेवा शुल्क र स्वास्थ्य सेवा करमा क्रमश: ५९ करोड ४४ लाख र ७६ करोड ११ लाख रुपैयाँ संकलन भएको छ । शिक्षा सेवा शुल्कतर्फ लक्ष्यको तुलनामा ९५ प्रतिशत र स्वास्थ्य सेवा करतर्फ लक्ष्यको तुलनामा ८६ प्रतिशत संकलन भएको छ । गत वर्षको तुलनामा आयकर वृद्धिदर ३२ प्रतिशत, मूल्य अभिवृद्धि कर वृद्धिदर २६ प्रतिशत, अन्त:शुल्कको वृद्धिदर ३९ प्रतिशत, स्वास्थ्य सेवा कर वृद्धिदर २५ प्रतिशत र शिक्षा सेवा शुल्क वृद्धिदर ३१ प्रतिशत रहेको विभागले बताएको छ । चैतसम्मको उपलब्धिका आधारमा चालु आर्थिक वर्ष राजस्वको वार्षिक लक्ष्य पूरा हुने विभागले जनाएको छ ।

सरकारले चालु आर्थिक वर्षमा २ खर्ब ३३ अर्व ६० करोड १५ लाख १७ हजार रुपैयाँ राजस्व संकलन गर्ने लक्ष्य तय गरेको थियो ।

प्रकाशित : वैशाख ७, २०७४ ०८:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT