रंगिए सामाजिक सञ्जाल

घनश्याम खड्का

काठमाडौं — ‘तपाईंको एक भोट देश बदल्न काफी छ,’ विवेकशील साझा पार्टीका संयोजक तथा काठमाडौं १ का उम्मेदवार रवीन्द्र मिश्रले ट्विट गरे । साताअघि मन्द मुस्कानयुक्त तस्बिरसहित लेखिएको यो पंक्ति २ सय ७१ ले रि–ट्विट गरिसकेका छन् भने ९ सय ९७ ले मन पराएका छन् । ४४ जनाले यसमाथि आफ्नो प्रतिक्रिया दिएका छन् ।

संयोजक मिश्र र विवेकशील साझाका अन्य उम्मेदवारले यी र यस्तै खालका दर्जनौं नारा बनाएर ट्विटर, फेसबुक, इन्स्टाग्रामलगायत सामाजिक सञ्चालमार्फत घण्टाघण्टामा पोस्ट गरिरहेका छन् ।

प्रचारका नाममा भित्ते लेखन र पम्प्लेट छाप्ने काम गरेर ‘दृश्य प्रदूषण’ नगर्ने औपचारिक घोषणा नै गरेको विवेकशीलले मिश्रको ‘साझा पार्टी’ सँग एकीकरणपछि पनि यो अभियान जारी छ । विवेकशील साझाले मात्रै होइन, यस पटकको निर्वाचनमा मूलधारका दल र पाका नेताहरूले पनि प्रचारप्रसारको पुरानो शैली अपनाएनन् । उनीहरूले भित्ते लेखन र पर्चा पम्प्लेट टाँस्ने/छर्ने काम करिब–करिब पूरै त्यागेका छन् । विकल्पमा सामाजिक सञ्जालको व्यापक उपयोग गरिएको देखिन्छ ।

भक्तपुर २ बाट प्रतिनिधिसभामा उम्मेदवारी दिएर प्रचारमा खटिएका कांग्रेस नेता तथा पूर्वसभामुख दमननाथ ढुंगानाले आइतबार ट्विटर एकाउन्ट खोले । उनले पहिलो ट्विट गरे, ‘नमस्कार, म नेपाली कांग्रेसका तर्फबाट भक्तपुर २ को उम्मेदवार, ट्विटर समाजमा यहाँहरूसँग सम्पर्कमा छु ।’ दुई दिनमा २३ ट्विट गरेका दमननाथले ४७ ट्विटेलाई फलो गरेका छन् भने उनलाई २ सय १६ ले फलो गरिसकेका छन् । वर्षौंदेखि ट्विटरमा सक्रिय बीबीसी नेपाली सेवाका पूर्वप्रमुख मिश्रले ९ हजार ४ सय १४ ट्विट गरिसकेका छन् र उनका फलोअर छन् ६ लाख ८ सय ६४ । एमाले नेता माधवकुमार नेपालले एक मिनेटको भिडियो नै बनाएर युट्युबमा राखेका छन्, जहाँ उनले आफू जनताको इच्छाअनुसार नै काठमाडौं २ बाट वाम गठबन्धनका तर्फबाट साझा उम्मेदवारी दिएको उल्लेख गरेका छन् । उनको यो भिडियो मंगलबार साँझसम्म २० हजारले हेरेको अभिलेख छ । यता, चुनाव प्रचारप्रसारमा निक्लिएका ढुंगानाका प्रत्याशी महेश बस्नेतले मंगलबार आफ्नो तस्बिर र नारासहितको रंगीन पोस्टर फेसबुक र ट्विटरको भित्तामा टाँसेका छन् ।

मत माग्न आफ्नो निर्वाचन क्षेत्र तनहुँ १ पुगेका कांग्रेसका वरिष्ठ नेता रामचन्द्र पौडेलले आफ्नोचुनावी अभियान दमौलीको प्रसिद्ध ‘छोले दाइको चिया पसल’ बाट चिया पिएर सुरु भएको ट्विट गर्दा धेरैले पसलेलाई आदरार्थी शब्द प्रयोग नगरेको भनी कमेन्ट गरेका थिए । दमौलीमा स्थानीयसँग हेलमेल भएपछि पौडेलले ‘छोले दाइको पसल’ भन्ने शब्द ख्यालै नगरी प्रयोग गरेकामा सन् २०१४ देखि ट्विट चलाउँदै आएका पौडेललाई सचेत भएर सन्देश प्रवाह गर्न झकझक्याएको हुनुपर्छ ।

युरोप/अमेरिकामा जस्तै नेपालमा पनि सामाजिक सञ्जालको प्रयोग चुनावी प्रचारमा बाक्लै रूपले भएको देखिन्छ । फेरिएको यो प्रचारशैलीले के संकेत गर्छ भने अघिल्ला चुनावमा देखिने भद्दा खालका भित्ते प्रचार र नारा अब इतिहास बन्दै छन् ।

प्रविधिको विकास र तुल/ब्यानरलगायत प्रयोग गर्न नपाइने सरकारी नियमले उम्मेदवार सामाजिक सञ्जालतिर आकर्षित भएको मानवशास्त्री सुरेश ढकाल बताउँछन् । ‘यस खालको प्रचार सहरमा बढी छ, किनभने यसका प्रयोगकर्ता यतै बढी छन्,’ ढकालले भने ।

प्रकाशित : कार्तिक २२, २०७४ ०७:१६
प्रतिक्रिया
पठाउनुहोस्

नेपालमा चिनियाँ रेल : सम्भाव्यता अध्ययन सुरु

चन्द्रशेखर अधिकारी

काठमाडौं — चिनियाँ उच्च प्राविधिकसहितको सरकारी टोलीले नेपालमा रेलको सम्भावनाबारे फेरि अध्ययन थालेको छ । केही रेलवे कम्पनीका अधिकारी र प्राविधिकसहित आएको टोलीले दुईपक्षीय प्राविधिक वार्ता र प्रस्तुतिसँगै स्थलगत अध्ययन गरिरहेको छ । पाँच दिने भ्रमणमा आएको उक्त टोली थप अध्ययनका लागि केही प्राविधिकलाई यतै छोडेर चीन फर्कनेछ ।

चिनियाँ राष्ट्रिय रेलवे प्रशासनका उपप्रमुख चेङ चियन नेतृत्व टोलीले नेपालमा चीनबाट ल्याउने भनिएको रेलबारे अध्ययन थालेको हो । टोलीले केरुङसम्म चीनले ल्याउने रेललाई काठमाडौं र पोखरा पुर्‍याउँदै लुम्बिनी जोड्ने विषयमा अध्ययन थालेको हो । सोमबार यसबारे नेपाली पक्षसमक्ष प्रस्तुति दिएको टोली मंगलबार काठमाडौंबाट रसुवाको स्याफ्रुबेंसी पुगेको थियो । स्याफ्रुबेंसीबाट मंगलबारै साँझ काठमाडौं फर्केको टोली बुधबार पोखरा र बिहीबार लुम्बिनी जानेछ ।

टोलीमा रेलमार्गमा लगानी गर्ने व्यवसायी पनि छन् । पाँच भिन्न कम्पनीका प्राविधिक र व्यवसायीसहित टोलीमा १६ जना छन् । टोलीमा चीनको परराष्ट्र, यातायात मन्त्रालयका प्रतिनिधि, राष्ट्रिय विकास आयोगका अधिकारी, परामर्शदाता, निर्माण व्यवसायी, बैंकका प्रतिनिधि र दूतावासका अधिकारी रहेको रेल विभागका सिनियर डिभिजनल इन्जिनियर तथा प्रवक्ता प्रकाश उपाध्यायले कान्तिपुरलाई बताए । ‘हामीले हाम्रो अवस्था र अहिलेसम्मको अध्ययनबारे बतायौं । उनीहरूले पनि लगानी गर्न सक्नेबारे जानकारी दिँदै आफ्नो प्रविधिको बारेमा जानकारी दिए,’ उनले भने ।

तत्कालीन प्रधानमन्त्री पुष्पकमल दाहालको चीन भ्रमणको समयमा रेल विभागले प्रस्तुत गरेको प्रतिवेदनका अधारमा नै चिनियाँ पक्षले अध्ययन थालेको रेल विभागका अधिकारीले बताए । ‘हाम्रा इन्जिनियरलाई चीनले प्रशिक्षण दिने भएको छ । यसबाट पनि चिनियाँहरू नेपालमा रेल जोड्न चाहन्छन् भन्ने देखिन्छ,’ उपाध्यायले भने, ‘रेलको दुई देशीय मात्र होइन, आन्तरिक तथा मेट्रोरेल मोडलबारे पनि छलफल भएको छ ।’ नेपालमा केही स्थानमा रेलमार्ग बनिरहेको छ । केही दिगो परियोजनाका लागि विस्तृत अध्ययन भइरहेका छन् । तर रेल नै हेर्ने विशेष प्राविधिक छैनन् । यस्तो अवस्थामा चीनले नेपालका इन्जिनियरलाई रेल इन्जिनियर बनाउन सहयोग गर्ने बताएको छ ।

सरकारले यसअघि नै काठमाडौं र पोखरालाई रेलमार्गले जोड्न खोजेकाले पनि यो प्रक्रियामा चिनियाँ पक्षलाई सहज हुनेछ । नेपालले प्रस्तुत गरेको योजनामा काठमाडौं–केरुङभन्दा पनि काठमाडौं–पोखरा रेलमार्गको विवरण रहेको छ । तर चीनले सबै पक्षलाई उत्तिकै ध्यान दिँदै केरुङलाई लुम्बिनीसम्म जोड्न जोड दिएको टोलीका एक सहभागीले बताए । चिनियाँ चासो काठमाडौंमा बनाउने भनिएको मोनोरेल तथा मेट्रो रेलमा पनि छ । चीनको ल्हासाबाट सिगात्से आइपुगेको रेलमार्ग सन् २०२० मा केरुङ आइपुग्ने भएपछि त्यहाँबाट नेपाल जोड्न खोजिएको हो ।

प्रकाशित : कार्तिक २२, २०७४ ०७:१६
पूरा पढ्नुहोस्
प्रतिक्रिया
पठाउनुहोस्