'कनेक्ट टू नेपाल'ले थप्यो तीन सेवा 

कान्तिपुर संवाददाता

काठमाडौँ — अमेरिकामा कम्यूटर प्रविधि पढेका तीन विद्यार्थी युवाहरुले स्थापना गरेको ‘कनेक्ट टू नेपाल’ ले पछिल्लो समयमा तीन वटा नयाँ सेवा थप गरेको छ ।

अब ‘कनेक्ट टू नेपाल’ एपबाट घरबाटै विजुलीको बिल तिर्न, इन्टरनेट र स्मार्ट सेल सेवा लिन सकिने छ । यो एप आइफोन र एन्ड्रोइड मोबाइलमा उपलव्ध हुनेछ । सेवा थपसँगै पुरानो एन्ड्रोइड प्रयोगकर्ताले पुन: यो एप डाउनलोड गर्नुपर्ने छ ।

नेपालका सवै डेबिट कार्डको थ्रीडी सेक्युरिटी नभएका कारण यो सेवा हिमालयन बैंक, स्टान्डर्ड चार्टर्ड बैंक, नेपाल इनभेष्टमेन्ट बैंक, लक्ष्मी बैंक, ग्लोबल आईएमई बैंकको कार्ड चलाउनु पर्नेछ । यसका लागि कार्ड होल्डरले बैंकमा बिल पेमेन्टको सेवालाई सुचारु गराउनु पर्नेछ ।

अमेरिका पढ्न गएका विद्यार्थी राजिव श्रेष्ठ, गोपाल सापकोटा र प्रलयराज भण्डारीले दुई बर्ष अघिदेखि यो सेवा सुचारु गरेका हुन् । सुरुमा मोवाइलमा पैसा ट्रान्सफर गर्ने काममा यो एपको प्रयोग गरिएको थियो । अहिले विस्तार गरेर घरमै बसीबसी बिल भुक्तानी गर्न सकिने सेवा विस्तार गरेका हुन् ।

‘खासमा यो इकमर्शलाई विस्तार गर्ने लक्ष्य हो । यसका लागि बैंकहरुको ठूलो भूमिका हुन्छ,’ प्रलयराज भण्डारीले कान्तिपुरसँग भने,‘नेपालका सवै बैंकहरुले पेमेन्ट प्रणालीलाई सहज बनाइदिए अझ यसलाई विस्तार गर्न सहज हुन्थ्यो ।’ सबै बैंकहरुले यो सुविधालाई सहज नबनाएका कारण यस्तो प्रविधिलाई व्यापक बनाउन अझै कठिनाई परेको उनले बताए ।

अमेरिकामा भित्रिएको प्रविधिलाई नेपालमा प्रयोग गर्नका लागि आफूहरुले यो एपको प्रयोग गरेको बताए । नेपाल लगायत विश्वका दश भन्दा बढी देशहरुले यो एपको प्रयोग गर्ने गरेका छन् । ‘कतिपय घरमा बृद्धा आमा बाबु मात्रै छन । उनीहरुलाई बिजुलीको बिल तिर्न अब काउन्टरमा गइरहनु पर्दैन, विदेशमै रहेको छोराले पैसा तिरीदिन सक्छ,’ उनले भने,‘यसले नेपालको अर्थतन्त्रलाई टेवा मात्रै दिदैनन्, घरपरिवारलाई समेत सहज बनाइदिएको छ ।’


प्रकाशित : चैत्र १७, २०७४ १८:२८
प्रतिक्रिया
पठाउनुहोस्

विप्लवलाई प्रधानमन्त्रीले भने, ‘अलि बढ्ता भो क्या !’

अहिले प्रधानमन्त्री अग्नि परीक्षामा हुनुहुन्छ : दाहाल
कान्तिपुर संवाददाता

काठमाडौँ — प्रधानमन्त्री केपी शर्मा ओलीले नेत्रविक्रम चन्द ‘विप्लव’का गतिविधिप्रति असन्तुष्टि जनाउँदै हिंसात्मक गतिविधि नियन्त्रण गर्ने बताएका छन् ।रिपोर्टर्स क्लवको २० औं वार्षिकोत्सवलाई राजधानीमा शनिबार सम्बोधन गर्दै प्रधानमन्त्रीले मुलुक आर्थिक टाट पल्टिएका बेला सिद्धान्तवादी भएर विकास र समृद्धिविरुद्ध नलाग्न चेतावनी दिए ।

‘सिद्धान्तवादी भएर कोही क्रान्तिकारी पल्ट्यिाएका छन् । नचाहिने कामका पछाडि दौडिएका छन् । केपी ओलीलाई वारेन्ट । प्रचण्डलाई वारेन्ट,’ चन्दा उठाउनका लागि सिद्धान्तको नाटक गरिएको बताउँदै प्रधानमन्त्रीले भने, ‘राजनीतिक मजाक नगर्न म विप्लवलाई सुझाव दिन चाहन्छु । अलि बढ्ता भो क्या !’

राजनीतिक प्रहसन नै गर्न मन लागे मदनकृष्ण–हरिवंश र धुर्मुस–सुन्तलीलाई आफूले पनि भनिदिने प्रधानमन्त्रीको ब्यंग्य थियो । माओवादी द्वन्द्वको सिको गर्दै भएका हिंसात्मक गतिविधिमा रोक लगाइने उनले बताए । ‘माओवादी जनयुद्धमा च्यांखे थाप्नेहरु थिए, अहिले खेल नभपछि, खाल नभएपछि च्याँखेको काम छैन,’ उनले भने, ‘यो देशको एकता, यो देशमा शान्ति हुन नदिनेलाई र बिखण्डनमा देश टुक्र्याउछु भन्नेलाई रोकिन्छ ।’

यूरोपियन युनियनको नाम नलिई प्रधानमन्त्रीले नेपालमा साम्प्रदायिक एकता बिथोल्ने प्रयास नगर्न पुन: चेतावनी दिए । ‘सबैलाई भन्न चाहन्छौं, नेपालीलाई मिलेर बस्न दिनुस्, नेपाल एकताबद्ध र समृद्धितिर जान चाहन्छ,’ प्रधानमन्त्रीको भनाइ थियो, ‘नेपालको पासपोर्ट यसो देखेपछि जानुस् भनोस् न ।’

प्रधानमन्त्रीले नेपाल भारत र चीनसहित सबै मित्रराष्ट्रसँग मिलेर विकास र समृद्धिमा सहकार्य गर्ने उल्लेख गरे । ‘छिट्टै भारत भ्रमणमा जाँदैछु, भारतसँग मिलेर एकताबद्ध भएर विकासमा बाटोमा सहयात्रा गर्छौं,’ उनले भने, ‘नेपालको विकासमा भारत सहयोगी भूमिकामा रहन्छ, र त्यसका लागि अझ बढ्ता सम्बन्ध सुधार गर्न जाँदैछु, चीनसँग राम्रो छ, हामीलाई सहयोग गर्न तयार छ ।’


नेपालमा विकासका लागि अनुकूल वातावरण बनेको उल्लेख गर्दै प्रधानमन्त्रीले विकासमा व्यवधान खडा गर्न नहुने बताए । ‘कुनै एक क्षेत्रमात्र होइन समग्र मुलुकमा नै विकासको काम अगाडि बढ्छ । अहिले अनुकूल वातावरण बनेको छ । अब हामीलाई विकास गर्न व्यवधान गर्न कुनै पनि कुरा मान्य हुने छैन,’ विकासमा हुने भ्रष्टाचार कडाइसाथ रोक्ने बताउँदै उनले भने, ‘हामीलाई विकास चाहिन्छ । विकासमा बाधा गर्ने भ्रष्टाचार अब सहिँदैन । म भ्रष्टाचार गर्न दिन्न । भ्रष्टाचार सहन्न । नियन्त्रण गर्छु । निर्मूल गर्छु । यो मेरो प्रतिबद्धता हो ।’

वामपन्थी सरकार बनाउन ढिला भएछ भन्ने अनुभूति हुनेगरी काम गर्ने बताउँदै प्रधानमन्त्रीले अधिनायकवादको आशंका नगर्न आग्रह गरे । ‘लोकतन्त्रका लागि लडेका छौं । वकृत्वकला प्रतियोगिताबाट होइन, संघर्षको मैदानबाट आएका हौं । तानाशाहीलाई जितेर आएका हौं,’ उनले भने ।

मुलुकको अर्थतन्त्र नाजुक भए पनि मुलुकमा कसैलाई भौकै मर्न नदिने बताए । ‘जनता भोकै छ भन्दा मन पोल्ने सरकार छ,’ उनको भनाइ थियो, ‘अब जाडोले, शीतलहरले कठ्यांग्रिएर कसैले मर्नु पर्दैन ।’

विकट भए पनि पहाडी जिल्लामा साक्षरता दर उच्च रहेको उल्लेख गर्दै प्रधानमन्त्रीले वैशाख ५ गते तराईमा गएर बालबालिकालाई विद्यालय भर्ना गर्ने अभियान आफैंले सुरु गर्ने बताए । ‘पढाउन नसक्नेको बन्दोबस्त सरकारले गर्छ,’ उनले भने, ‘७६१ वटा सरकार छन् । ३६ हजार जनप्रतिनिधिले गर्नुपर्छ ।’

माओवादी केन्द्रका अध्यक्ष पुष्पकमल दाहालले संक्रमणकाल लम्बिंदा मुलुकमा विकास र समृद्धिका काम ढिला भएको भन्दै नयाँ सरकारले तीब्र विकासको काम गर्ने बताए । विकासको काम कुनै दल विशेषको नभएको बताउँदै उनले सबै मिलेर पूरा गर्नुपर्ने धारणा राखे । ‘अहिले प्रधानमन्त्री अग्नि परीक्षामा हुनुहुन्छ, हामी सबै अग्नि परीक्षामा छौं,’ उनको भनाइ थियो, ‘एकाध व्यक्ति र पार्टी विशेषलेमात्रै समृद्धिका काम पूरा गर्न सकिंदैन ।’ ठूलो क्षतिमा गुज्रिएपछिमात्रै देशले समृद्धि प्राप्त गरेको उदाहरण दिंदै नेपाल पनि ७० वर्षदेखिको अराजकता अशान्तिपछि समृद्धितिर लागेको बताए ।

दाहालले पनि विप्लवलाई फेरि पनि बिखण्डन, आन्दोलन र हिंसाको कुरा नगर्न सचेत गराए । ‘सुशासन र समृद्धिको यात्राभन्दा बाहिर गतिविधि गर्न चाह्यो भने नेपाली जनता निस्तेज पार्न आउछन्,’ उनले भने ।

जनताले भाषणभन्दा एक्सन हेर्न चाहेको बताउँदै दाहालले लोकतन्त्र, विकास र समृद्धिका लागि आफू र प्रधानमन्त्रीले ओलीले ठूलो कष्ट व्यहोरेको उल्लेख गरे । समृद्धि र विकासका लागि म १० वर्ष वनबास बसें, प्रधानमन्त्री १४ वर्ष जेलबास बस्नुभयो,’ उनको भनाइ थियो, ‘फुटाउ र राज गर भन्नेहरुले प्रो–इन्डिनय, प्रो–मोनार्की, प्रो–कांग्रेस भनेर फुटाउन खोज्छन्, त्यसो हुन दिनुहुँदैन । अब हामी प्रो–नेपाल प्रो–नेपाली भएर अघि बढ्नुपर्छ ।’

प्रकाशित : चैत्र १७, २०७४ १७:४०
पूरा पढ्नुहोस्
प्रतिक्रिया
पठाउनुहोस्