सन् २०१८ का चर्चित प्रविधि र ग्याजेट्स 

दिनेश यादव

काठमाडौँ — वर्ष २०१८ लाई विदाई गरेर नयाँ वर्षलाई स्वागत गरिसेका छौँ । वर्ष २०१८को सर्वश्रेष्ठ प्रविधि, ग्याजेट्स, गियर लगायतका नयाँ उत्पादनहरुबारे जानकारी दिने उद्देश्यले यो सामग्री तयार पारिएको हो । नयाँ प्रविधि र उत्पादनहरुबारे विभिन्न सञ्चार माध्यमहरुको आ–आफ्नै दाबी छ । तर, सुक्ष्म विश्लेषणका आधारमा केही राम्रा उत्पादनहरु यहाँ पस्कने जमर्को गरिएको छ । 

‘वायर्ड’ अनलाइन पत्रिकाले तयार पारेको सूचीमा सामसङको ‘८ के टिभी’ देखि ‘ग्यालेक्सी एस नाइन प्लस’ स्मार्टफोनसम्म समेटिएका छन्। पत्रिकाका अनुसार सामसङले गत वर्ष आफ्नो कम्पनीको महत्वाकांक्षी र सर्वाधिक चर्चामा रहेको टेलिभिजन बजारमा ल्यायो।

कम्पनीले ल्याएको सामसङ ‘क्युइ ६५क्यु ९००’ नामको ‘८के टिभी’ वर्षभरी चर्चामा रहयो। तीन साईज (८५ इन्च, ७५ इन्च र ६५ इन्च) मा उपलब्ध यो टिभी पूर्ण एचआरडी हो। ४ हजार निट्स( १ निट्स बराबर १ क्यान्डेलाप्रति वर्गमिटर) को चम्किलोपना रहेको यसमा दर्शकले वास्तविकताको अनुभूति गर्न सक्छन्।

यसमा जडान गरिएको १५ एमएस इन्पुट ल्यागले खेलका लागि क्यु ९०० लाई पूर्ण बनाइदिन्छ। यसको मूल्य ४ हजार ९ सय ९९ पाउन्ड(करिब ७ लाख ११ हजार रुपैयाँ) निर्धारण गरिएको छ। ग्राहकका लागि यो मूल्य चर्को हो। तर नयाँ अनुभव लिनका लागि यो टिभी धेरैका लागि रोजाईको वस्तु बनेको छ।

सन् २०१८मा वायरलेस हेडफोन्सको संसारमा ‘सोनी डब्लूएच–१००० एक्सएमटू’ लाई तारविहिन कोलाहल रोक्ने हेडफोनमा राम्रा उपकरणको उपाधि प्राप्त भयो। यसअघि बोस क्वीसी ३५ लाई यो कामका लागि प्रयोग गरिन्थ्यो। सोनी कम्पनीका उत्पादन ध्वनी र डिजाइनका लागि प्रसिद्ध छ।

तर कम्पनीले कोलाहल नसुन्ने हेडफोन बजारमा ल्याएर चर्चा बटुल्न सफल भएको छ। यो सेटलाई एक पटक पूर्ण चार्ज गरिसकेपछि ३० घन्टासम्म लगातार प्रयोगमा ल्याउन सकिन्छ। टच कन्ट्रोल प्रणाली रहेको यसलाई सजिलै आफू अनुकूल उपयोग गर्न सकिने दाबी कम्पनीको छ। सुरुमा यसको मूल्य अलिक बढी छ। यो वायरलेस हेडफोनको मूल्य ३ सय २९ पाउन्ड(४६ हजार ७ सय ९७ रुपैयाा) रहेको छ।

रनिङ वाच ‘जर्मिन फोररनर ९३५’ पनि वर्षको चर्चित उत्पादन बन्यो। ४ सय ३९ पाउन्ड(६२ हजार ४ सय ४३ रुपैयाँ) मूल्य राखिएको यो वाच दौड्नमा रुची राख्नेहरुका लागि महत्वपूर्ण अविष्कार हो। यसमा धेरै समय टिक्ने ब्याट्री जडान गरिएको छ। यसलाई स्ट्यान्वाई मोडमा राख्दा कम्तिमा एक सातासम्म आफ्नो गतिविधिहरुलाई २४ घन्टासम्म बिना ण्कुनै अवरोधको नियाल्न सकिन्छ।

यो घडीले पौडी, साइकलिङ, गल्फसहितका विभिन्न गतिविधिलाई रेकर्ड गर्ने क्षमता राख्छ। यसले शारीरिक व्यायामसँग सम्बन्धित विभिन्न प्रशिक्षणको सुविधा पनि उपलब्ध गराउँछ। यति मात्रै होइन, मुटुको गति दरलाई पनि मोनिटर गर्न सक्छ। मात्र ४९ ग्राम तौल रहेको यो ग्याजेटले एउटा रनिङवाचमा हुने सबै गतिविधिलाई कैद गर्न सक्छ।

सन २०१८ को अर्को महत्वपूर्ण उत्पादनमध्ये वायरलेस इयरबर्ड्स ‘ज्याब्रा इलिट ६५ टी’ पनि एक हो। यसको प्रयोग गरिए एपलको एयरपोड्सलाई बिर्सिन सहयोग गर्छ। एक सय ३९ पाउन्ड (१९ हजार ७ सय ७१ रुपैयाँ) मूल्य रहेको यो वायरलेस इयरबर्ड कुनैपनि समारोहमा सजिलै प्रयोग गर्न सकिने दाबी कम्पनीको छ। यसलाई जिम र दौड तथा अन्य गतिविधिमा पनि उपयोगमा ल्याउन सकिन्छ। यसलाई एक पटक पूर्ण चार्ज गरेपछि पाँच घन्टासम्म नन–स्टप प्रयोग गर्न सकिन्छ। यसमा दुईवटा चार्ज केस जडान गरिएको छ।

‘वायर्ड’ का अनुसार ल्यापटपको संसारमा ‘डेल एक्सपीएस १३’ लाई वर्षको महत्वपूर्ण उत्पादनमा दरियो। एक हजार ९९ पाउन्ड(१ लाख ५६ हजार ३ सय २२ रुपैयाँ) मूल्य रहेको यो ल्यापटपलाई म्याकबुकको किलरका रुपमा प्रस्तुत गरिएको छ। मात्र १ दशमलव २ किलो तौल भएको यो ल्यापटप १३ इन्चको छ। ह्याभी वर्कलोड हुनेहरुका लागि चाहिने शक्तिशाली क्षमता यसमा छ। यसमा नन–ग्लेयर पर्दा र टचस्क्रिन सहित विविध अप्सनहरु समेटिएका छन्। ४ एमएमको पातलो रहेको यो ल्यापटपलाई जुनसुकै झोलामा पनि सजिलै राख्न सकिन्छ। यो बोक्न पनि सजिलो छ।

एप्पलले ल्याएको ‘एप्पल आइप्याड ९.७’ ट्याबलेटले सन् २०१८मा चर्चा कमायो। केहीले आईप्याड प्रो मन पराउँछन्। तर, धेरै मासिनको राम्रो छनौटमा ‘ ९.७’ इन्चको आइप्याड पर्ने गर्छ। यो साइजलाई धेरैले मानकका रुपमा पनि लिएको पाइन्छ। त्यसैले यो धेरैको चाहना बन्न पुग्यो। उच्च रिज्योलुसन स्क्रिन रहेको यो ट्याबलेटमा महत्वपूर्ण सफ्टवेयर र एपहरुको विशाल संग्रह सञ्चित छ।

हालसम्म ट्याबलेटमा असम्भव रहेको एप्स पनि यसमा राखिएका छन्। यो २०१८ संस्करणले एपल पेन्सिललाई सपोर्ट गर्छ। ब्लुतुथ किबोर्ड भएको यो सेटलाई एउटा ल्यापटप र फोरजी भर्सन मोबाइलको विकल्पका रुपमा प्रयोग गर्न सकिन्छ। यसलाई जहाँसुकै र जुनसुकै बेलामा पनि स्वतन्त्रतापूर्वक प्रयोग गर्न सकिन्छ। कम्पनीले यसको मूल्य ३ सय १९ पाउन्ड (४५ हजार ३ सय ७४ रुपैयाँ) निर्धारण गरेको छ।

‘अमेजोन किन्डल पेपरह्वाइट’ ई–रिडर पनि चर्चा बटुल्यो। १ सय २० पाउन्ड(१७ हजार ६८ रुपैयाँ) मूल्य रहेको यो ई–रिडर सोचे जस्तो अत्याधुनिक नभएपनि एक जना व्यक्तिको सबै खाले इलेक्ट्रोनिक आवश्यकता पुरा गर्न सक्छ। यसमा जडान गरिएको प्रकाशले पाठकलाई पढ्न अनुकूल बनाउँछ। ३०० पीपीआईको स्क्रिन आनन्दको अनूभूति गराउन काफी छ। इलेक्ट्रोनिक्स भर्सन पढ्नेहरुका लागि यसलाई गजबको ग्याजेट भनिएको छ।

यसैगरि फिटनेस ट्रयाकर ‘फिटबिट अल्टा एचआर’ पनि राम्रै उत्पादनका रुपमा चर्चामा रहयो। यति तपाईले अहिलेसम्म कुनै फिटनेस ट्रयाकर खरिद गर्नु भएको छैन भने यो तपाईका लागि उपयोगी हुन सक्छ। यो एउटा स्मार्टवाचको जस्तै काम गर्छ। यसमा जडित ब्याट्री धेरै समयका लागि टिकाउ हुने खालको छ। यो डिभाइसबाट मानिसको स्टेप्स, क्यालोरी बर्न, सुतेको समय र मुटुको गतिबारे राम्ररी जानकारी प्राप्त गर्न सकिन्छ। कम्पनीले हाल यो छ रङमा बजारमा ल्याएको छ। यसको कमजोरी भनेको यो वाटरफ्रुप छैन। यदि तपाई पौडीको पारखी हुनुहुन्छ भने यो फिटनेस ट्रयाकर तपाईका लागि काम लाग्दैन। यसको मूल्य सय पाउन्ड (१४ हजार २ सय २४ रुपैयाँ) निर्धारण गरिएको छ।

यो वर्षको अर्को महत्वपूर्ण ग्याजेटमा नदेखिने गरी राखेर पनि चलाउन मिल्ने अडियो साउन्डबार ‘क्यू एकास्टिक्स एमथ्री’ पनि हो। यो उच्च गुणयुक्त छ। कुनैपनि टिभीको तल सजिलै जोडन मिल्ने यो स्पिकरको मूल्य दुई सय १९ पाउन्ड(३१ हजार १ सय ५० रुपैयाँ) रहेको छ। यसलाई पर्खालमा पनि झुन्ड्यान सकिन्छ। यसमा ब्लुतुथ र एचडीएमआई जडान गरिएको छ।
यो वर्ष स्मार्टफोनमा सामसङको ‘ग्यालेक्सी एसनाइन प्लस’ चर्चाको शिखरमा रहयो। ८ सय ६९ पाउन्ड मूल्य(१ लाख २३ हजार ६ सय ७ रुपैयाा) पर्ने यो फोनको डिस्प्ले ६.२ इन्चको छ। यो सेट ‘ग्यालेक्सी एस एट प्लस’ भन्दा खासै फरक नभएपनि यसमा प्रयोग गरिएका हाडवेयर चाही गजबको भएको दाबी कम्पनीको छ।

(एजेन्सीहरुको सहयोगमा)

प्रकाशित : पुस २०, २०७५ १५:१८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

वाइडबडी प्रतिवेदनबारे सांसद विभाजित 

सत्तारूढ सांसदले बदनियतपूर्वक आरोप लगाइएको भन्दै प्रतिवेदन परिमार्जनको माग गरेका छन् । विपक्षीले हुबहु पारित गर्नुपर्नेमा जोड दिएका छन् ।
कृष्ण ज्ञवाली

काठमाडौँ — सांसदहरूबीच मतभेद भएपछि सार्वजनिक लेखा समितिले शुक्रबार वाइडबडी खरिद अनियमितता छानबिन उपसमितिले दिएको प्रतिवेदनमाथि कुनै निर्णय लिन सकेन । अधिकांश सत्तारूढ सांसदले प्रतिवेदनमाथि आपत्ति जनाउँदा उपसमिति सदस्य र विपक्षी सांसदले हुबहु पारित हुनुपर्नेमा जोड दिए ।

तस्बिरः इलिट जोशी

सत्तारूढतर्फ पनि प्रधानमन्त्री केपी ओलीनिकट सांसदहरूले पर्यटनमन्त्री रवीन्द्र अधिकारीमाथि ‘बदनियतपूर्वक’ आरोप लगाइएको बताए । पूर्वमन्त्रीहरू जीवनबहादुर शाही र जितेन्द्र देवलाई नैतिक प्रश्नमात्रै उठाइएको तर अधिकारीको हकमा कठोरता देखाइएको भनी टिप्पणी गरे ।

उनीहरूको अर्को आपत्ति तत्कालीन पर्यटन सचिव प्रेम राईलाई मुछिएकोमा थियो । एउटा उपसमिति गठन गरेकै कारण राईलाई सुगतरत्न कंसाकारसरह दोषी ठहर गरिएको भन्दै सांसदहरूले आपत्ति जनाए । राई अहिले गृहसचिव छन् ।

सांसद विशाल भट्टराईले कतिपय सार्वजनिक पदाधिकारीलाई प्रतिवेदनमा एउटै रूपमा हेरिएको टिप्पणी गरे । उनले तीन पूर्वमन्त्रीहरूमाथि फरक रूपमा प्रतिवेदन आएको भन्दै आपत्ति जनाए ।

उपसमितिले कामभन्दा बढी हल्ला गर्दा प्रतिवेदन तयार हुनुअघि नै सञ्चारमाध्यमले सबै विवरण थाहा पाएको भट्टराईले बताए । ‘प्रधानमन्त्री स्वयंले जाँचबुझ आयोग गठन गर्नुभएको छ, त्यसलाई पनि हेर्नुपर्छ,’ उनले भने, ‘दोहोरो मापदण्ड हुनुभएन । बिचौलिया खडा गर्नेलाई नैतिक जिम्मेवार भन्ने अनि विमान आइसकेपछि भुक्तानी गर्नेलाई कानुनी कारबाही ?’

अर्का सांसद सूर्य पाठकले निरपराधहरूलाई मुछ्न खोजिएको भन्दै आपत्ति जनाए । यज्ञबहादुर बोगटीले पनि सचिव राईलाई कंसाकारसरह कारबाही गर्न नहुने बताए । लेखराज भट्ट, अमनलाल मोदीलगायतले प्रतिवेदन परिमार्जन गर्नुपर्ने धारणा राखे ।

सांसद हृदयेश त्रिपाठीले प्रतिवेदन कार्यान्वयन नभए समितिको विश्वसनीयतामाथि प्रश्न उठ्ने भन्दै परिमार्जन गर्नुपर्नेमा जोड दिए । अनियमितताको आकार हेर्दा ‘राष्ट्रिय सहमति’ जस्तो देखिने भन्दै उनले सबै दलका शीर्षनेताहरूको मिलेमतो रहेको संकेत गरे । ‘राष्ट्रिय सहमतिकै कारण एनसेल पचिसकेजस्तो देखिन्छ,’ उनले भने, ‘यो पनि त्यस्तै देखिन्छ ।’

त्रिपाठीले सबैलाई एउटै नजरले हेरेर कारबाही गरिए वायुसेवा निगममा पियनबाहेक कोही बाँकी नरहने प्रतिक्रिया दिए ।

विपक्षी सांसदले भने प्रतिवेदन हुबहु पारित हुनुपर्नेमा जोड दिए । प्रतिवेदनमा आधारित भएर छानबिन गर्न अख्तियारलाई कुनै अप्ठेरो नहुने भन्दै उनीहरूले परिमार्जनका नाममा प्रतिवेदन फेरबदल गर्न नहुने धारणा राखे ।

मीनेन्द्र रिजालले लेखा समितिले आफ्नो काम गर्दा प्रधानमन्त्रीबाट आपत्ति प्रकट भएको भन्दै चिन्तित नहुन सुझाव दिए । सरकारले जाँचबुझ आयोग गठन गर्दैमा अख्तियारले आफ्नो कामकारबाही रोक्न नहुने जनाउँदै रिजालले भने, ‘सरकारले समिति बनाइरहोस् । तर एउटा उपसमितिले गरेको काम र औचित्यमा प्रश्न गर्न मिल्दैन ।’

पूर्वाग्रह राखिएको छैन : उपसमिति
सांसदहरूको सवालजवाफपछि उपसमिति संयोजक राजन केसीले प्रतिवेदनमा कुनै राजनीतिक पूर्वाग्रह नराखिएको प्रतिक्रिया दिए । पर्यटनमन्त्री अधिकारीको हकमा परिस्थिति नै फरक भएको उनले बताए । ‘उपसमितिमा आउनुभएका अरू मन्त्रीहरूले जिम्मा लिनुभयो । रवीन्द्रजीले महालेखा परीक्षकको प्रतिवेदनबारे थाहा थियो भन्नुभयो । अनि महालेखा परीक्षक टंकमणि शर्मासँग सोधेरै पठाएको हुँ भन्नुभयो,’ केसीले भने, ‘तर टंकमणिजीले भेट नभएको कुरा गर्नुभयो । रवीन्द्रजीको कुरा झूटो देखियो । नैतिक जिम्मेवारी लिनुपर्छ भनिएको हो । कहींकतै भ्रष्टाचार गर्नुभएको भनिएको छैन ।’

विमान खरिदको मुख्य निर्णायक सञ्चालक समिति रहे पनि मन्त्री जिम्मेवारीबाट भाग्न नहुने उनको भनाइ थियो । ‘निगमले कुनै उपलब्धि हासिल गरे मैले गर्दा सफल भयो भनेर प्रचार गर्ने तर गलत भएमा जिम्मेवारी नै नलिने भन्ने हुँदैन,’ केसीले भने । उनले नयाँ विमान खरिदको निर्णय गरी पुरानो विमान खरिद गर्ने कानुनी प्रक्रिया अवलम्बनमा सचिवहरूले भूमिका खेलेको आरोप लगाए । उपसमितिले प्रेम राई, शंकर अधिकारी र कृष्ण देवकोटालाई दोषी किटान गरेको थियो ।

उपसमितिका अर्का सदस्य प्रेम आलेले उडान भर्दाको अधिकतम भार २४२ बाट २३० टन बनाउँदा सिड्नीलगायत गन्तव्यमा सोझो उडान गर्न नसकिने बताए । दिल्लीलगायत छोटो गन्तव्यमा वाइडबडीका विमानबाट उडान गर्दा उपकरणको आयु घट्ने भन्दै उनले कंसाकारलाई नै मुख्य योजनाकारका रूपमा चित्रण गरिएको प्रतिक्रिया दिए । ‘मलाई रवीन्द्र अधिकारीलाई हटाएर मन्त्रीपद खान खोजेको आरोप लागेको छ । त्यो हुँदै होइन,’ उनले भने ।

अर्का सदस्य प्रदीप यादवले पर्यटनमन्त्री अधिकारीबाट निगम र विमानस्थल कर्मचारीहरूमाथि समेत दबाब परेको आरोप लगाए । आफूहरू विमान निरीक्षणमा जाँदा कर्मचारीहरूले डरकै कारण सहयोग नगरेको उनले बताए । ‘मन्त्री अधिकारीले सुगतरत्न कंसाकारलाई सँगै राखेर उहाँलाई सहयोग गर्नुपर्‍यो, नत्र तपाईंहरूलाई कारवाही हुन्छ भन्नुभएछ,’ उनले भने, ‘कर्मचारीहरू सबै त्रासमा देखिए ।’

महाप्रबन्धक कंसाकारले महत्त्वपूर्ण कागजात लुकाएको जनाउँदै यादवले दोषीमाथि जसरी पनि कारबाही हुनुपर्ने बताए । उनले दुई पूर्वमन्त्रीमा नैतिकता देखिए पनि पर्यटनमन्त्री अधिकारीले नैतिकता नदेखाएको आरोप लगाए । ‘महाप्रबन्धक कंसाकारले मन्त्री मात्रै होइन, देशै घुमाएका छन्,’ उनले भने ।

मन्तव्यपछि छलफलका क्रममा समेत कतिपय सांसदले प्रतिवेदनको भाषा परिमार्जन गर्न सुझाव दिए । यज्ञबहादुर बोगटीले सबै मन्त्रीका हकमा भाषा एउटै हुनुपर्ने भन्दै कंसाकारलाई नै बढी जिम्मेवार देखाउन माग गरे । ‘मन्त्रीहरूको सन्दर्भमा फरक भाषा बन्नु हुँदैन । कंसाकार नै दोषी भए उनैमा जाऔं,’ उनले भने । मतभेदपछि बैठक सोमबारसम्मलाई स्थगित गरिएको छ ।

प्रकाशित : पुस २०, २०७५ १४:५१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT