आइफोनमा जासुसी गर्न मिल्ने समस्या 

आइफोनको फेसटाइम एपमार्फत जासुसी गर्न मिल्ने स्विकार्दै एप्पलले एक साताभित्र समाधान गर्ने जनाएको छ 
एजेन्सी

क्यालिफोर्निया — विश्व चर्चित मोबाइल आइफोन उत्पादक कम्पनी एप्पलले आफ्नो एपमा जासुसी गर्न मिल्ने समस्या रहेको स्वीकार गरेको छ । आइफोनमार्फत कुराकानी गर्न मिल्ने ‘फेसटाइम’ एपमा प्रयोगकर्ताले कल नउठाए पनि केही समयका लागि जासुसी गर्न मिल्न सकिने आरोपपछि कम्पनीले उक्त कुरा स्वीकार गरेको हो । 

Citizen

त्यसैगरी, आइफोनले प्रयोगकर्ताको जानकारीबिना भिडियो पनि पठाउने गरेको पाइएको छ । एप्पलले विज्ञप्तिमार्फत यसको समाधान चाँडै नै गर्ने जनाएको छ । ‘हामीलाई उक्त समस्याबारे जानकारी भयो र समाधानका लागि यसै साता सफ्टवेयर अद्यावधिक गरिनेछ,’ विज्ञप्तिमा उल्लेख छ ।

ट्वीटरका प्रमुख कार्यकारी ज्याक डोर्सेसहित कतिपय प्रविधिका जानकारले सामाजिक सञ्जालमार्फत ‘फेसटाइम’ लाई निष्क्रिय पार्न सुझाव दिएका छन् । आइफोनको सेटिङमा गएर फेसटाइमलाई निष्क्रिय बनाउन सकिन्छ ।

कम्पनीले प्रयोगकर्ताको विरोधपछि सफ्टवेयर अद्यावधिक नभएसम्मका लागि फेसटाइममा एकैपटक २ जनाभन्दा बढी प्रयोगकर्ताले कुरा गर्न मिल्ने सुविधा स्थगित गरेको जनाएको छ ।
सूचना प्रविधिसम्बन्धी एउटा ब्लगका अनुसार एप्पलको आईओएस १२ वा त्योभन्दा नयाँ भर्सनको अपरेटिङ सिस्टम भएका मोबाइलबाट उक्त जासुसी गर्न सकिने दाबी गरेको थियो ।

उक्त ब्लगका अनुसार आइफोनमार्फत समूहमा कुराकानीका लागि रिक्वेस्ट पठाउनेबित्तिकै ‘फेसटाइम’ एपले फोन नउठाएका प्रयोगकर्ताको मोबाइलको माइक्रोफोनसमेत सक्रिय गराउने गर्छ ।

कल नउठेर घण्टी जान बन्द भएपछि भने माइक्रोफोन आफैं निष्क्रिय हुने जनाइएको छ । तर फोन अस्वीकार गर्दा वा आइरहेको बेला मोबाइल फोन बन्द गर्दा भने कल गर्ने व्यक्तिलाई प्रयोगकर्ताको जानकारीबिना छोटो भिडियो पठाइने ब्लगले बताएको छ । यद्यपि, एप्पललाई उक्त समस्याबारे पहिले नै थाहा थियो/थिएन भन्नेबारे केही उल्लेख गरिएको छैन ।

एप्पलका प्रमुख कार्यकारी अधिकृत टिम कुकले ‘गोपनीयता संरक्षणका लागि काम गर्ने’ बताएका छन् । अमेरिकाको लस भेगासमा हालै भएको इलेक्ट्रोनिक्ससम्बन्धी एक प्रदर्शनीमा एपलले आफ्ना उत्पादनको गोपनीयतासम्बन्धी उच्च क्षमताबारे प्रचार गरेको थियो ।

प्रदर्शनीमा भाग नलिए पनि एप्पलले नजिकै प्रचार सामग्री राखेको थियो जसमा लेखिएको थियो, ‘तपाईंको आइफोनमा जे हुन्छ, त्यो आइफोनमै रहन्छ ।’

प्रकाशित : माघ १६, २०७५ २०:२५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

भाषा आयोगमा ‘योग्यता लत्याएर नियुक्ति’

कान्तिपुर संवाददाता

काठमाडौँ — सरकारले भाषा आयोगमा योग्यतै नपुगेकालाई सदस्य नियुक्त गरेको भाषाशास्त्रीले आरोप लगाएका छन् । उनीहरूले शिक्षा मन्त्रालयकी अवकाशप्राप्त उपसचिव तथा लेखक उषा हमालको नियुक्तिप्रति आपत्ति जनाएका हुन् । 

अन्य सदस्यसमेत विभिन्न क्याम्पसमा कार्यरत नेपाली र अंग्रेजी विषयका शिक्षकलाई नियुक्त गर्न लागिएको विज्ञहरूको दाबी छ । २०७३ भदौमा आयोग गठनसँगै शिक्षा मन्त्रालयका पूर्वसचिव तथा भाषाशास्त्री लवदेव अवस्थी अध्यक्ष बनाइएका थिए ।

सदस्यमा प्रदेशगत प्रतिनिधित्व हुनुपर्ने व्यवस्था छ । सरकारले गत माघ ३ गते हमाललाई सदस्य नियुक्त गरेको हो । उनले नेपाली विषयमा स्नातकोत्तर र शिक्षाशास्त्रमा एमफिल गरेकी छन् । उनको नेपाली भाषामा दुई कविता संग्रह, एक नियात्रा र एक बाल उपन्यास कृति प्रकाशित छन् ।
आयोगमा नियुक्तिका लागि भाषाविज्ञानमा स्नातकोत्तर र भाषामै अध्ययन, अध्यापन अनुसन्धान र अन्वेषणमा २० वर्षको अनुभवप्राप्त हुनुपर्ने संवैधानिक व्यवस्था रहेको विज्ञले बताए ।

‘नेपाली वा अंग्रेजी भाषामा स्नातकोत्तर गरेकालाई आयोगको सदस्य नियुक्त गर्नु संविधानलाई लत्याउनु हो,’ भाषाशास्त्री माधवप्रसाद पोखरेलले भने, ‘भाषा आयोगको मर्म भनेको विज्ञहरूले निश्चित अवधिभित्र नेपालका भाषाहरूको स्थिति केलाएर सरकारलाई नीतिगत रूपमा अघि बढ्न सिफारिस गर्ने हो । तर, यसरी प्रज्ञा प्रतिष्ठानभन्दा पनि तल्लो योग्यताका आफ्ना मान्छे भर्ती गर्नु संविधान लत्याउनु हो ।’ मुलुकको भाषाहरूको भाषावैज्ञानिक अध्ययन हुन नसक्दा संख्या यकिन हुन सकेको छैन ।

स्रोतका अनुसार सत्तारूढ दल नेकपा आफूनिकटकालाई आयोग सदस्य नियुक्त गर्ने तयारीमा छ । प्रधानमन्त्री केपी शर्मा ओली प्रगतिशील प्राध्यापक संगठनका अध्यक्ष यादव लामिछानेलाई नियुक्त गर्ने प्रयासमा छन् । नेकपा अध्यक्ष पुष्पकमल दाहाल पक्षलाई समेत भाग पुर्‍याउनुपर्ने भएकाले नियुक्तिमा ढिलाइ भएको हो ।

‘आयोगको सदस्य भएर काम गर्दा विश्वविद्यालय सेवा अवधि गणना हुने कि नहुने भन्ने अन्योल छ,’ स्रोतले भन्यो, ‘केही क्याम्पसमा कार्यरत शिक्षकको आयोग सदस्यमा नाम सिफारिस परेको छ । उता (प्रधानमन्त्री कार्यालय) बाट मिलाए चाँडै अरू सदस्य पनि नियुक्त हुनेछन् ।’

प्रकाशित : माघ १६, २०७५ २०:००
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT