‘सैतानी ब्याज’ को पासोमा जकडिएकाहरुको पीडा (भिडियो)

जनकराज सापकोटा

काठमाडौँ — सैतानी ब्याजको पासोमा परी सर्लाहीको जब्दी, पिपरिया लगायतका ३० महिला सहित ३६ जना न्यायको खोजीमा भौतारिएको दुई बर्ष पुग्नै लाग्यो । यो अवधीमा उनीहरु कहाँ मात्रै पुगेनन् । तर कतैबाट केही हात परेन् ।

प्रहरीको ढोका ढक्ढकाएनन् कि, जिल्ला प्रशासन कार्यालयका उच्च अधिकारीसँग विन्ती बिसाएनन् कि, जिल्लाका राजनीतिक दलका नेता कहाँ अनुरोध गरेनन्। तर कतैबाट केही हात परेन्।

सर्लाहीकै श्याम प्रदेशी भनिने श्याम कृष्ण शाहले थापेको सैतानी ब्याजको पासोमा परेर मर्नु न बाँच्नु बनेकाहरुको संख्या करिव तीन सयको हाराहारीमा रहेको अनुमान छ। सय कडा पाँच रुपैया व्याजदरमा ५० हजार देखि दुई लाखसम्म ऋण दिने श्याम प्रदेशीले ऋणीको परिबन्दको फाईदा उठाउँछन् र तीन/चार वटा फर्जी कागज बनाएर ऋणीलाई कज्याउँछन्। रकम लिएको भन्दा धेरै पैसा भएको यस्तो फर्जी कागजका आधारमा प्रदेशीले ऋणी बिरुद्ध सर्लाही जिल्ला अदालतमा लेनदेन मुद्दा दायर गरेका छन्।
सर्लाही जिल्ला अदालतका कर्मचारी दिनेश मिश्रका अनुसार प्रदेशी र उनका परिवारका नाममा जारी लेनदेनको ५० मुद्दामा उनको पक्षमा फैसला गरी अदालतले ३५ दिने पुनरावेदनको म्याद जारी गरिसकेको छ। अदालतले जारी गरेको यस्तो म्याद तामेल भएको सात दिनभित्र अदालतमा उपस्थित नभएका कानून बमोजिम सजाय हुने कानूनी व्यवस्था छ। प्रदेशीले दायर गरेको लेनदेनको ३५ वटा मुद्दा भने अदालतमा फैसलाको क्रममा छ। प्रदेशीले दायर गरेको मुद्दाकै आधारमा दुई ऋणी भने जेल सजाय भोगिरहेका छन्। चलाख प्रदेशीले ऋण आफुले दिएपनि ऋणीहरुसँग आफ्नो छोरी ईला शाह, ज्वाई रामबाबु शाहदेखि छोरा सुजय शाह देखि श्रीमती रन्जु शाहसम्मको नाममा कागज बनाउँदै उनीहरुले ऋण दिएको कागज बनाएका छन्।

सर्लाहीका कांग्रेस नेता एवं मन्त्री शम्भु श्रेष्ठले कानुन हातमा लिएर गरीब र निमुखामाथि शोषणको श्रृखलाबद्ध धन्दा चलाईएको बताउँछन्। हरिऔन नगरपालिकाका मेयर गणेश प्रसाई पनि प्रदेशीको ब्याजी मिटर धन्दाबारे राम्रोसँग जानकार छन्। उनले भने, ‘साँवा र ब्याज तिर्नेलाई भर्पाई नदिने र एउटै ऋणबाट बर्षौसम्म शोषण गरिरहने काम भईरहेछ।’

एक लाख ४० हजार ऋण लिएका एक ऋणीले तीन बर्ष पछि ४ लाख ८० हजार बुझाउन खोज्दा पनि प्रदेशीले नमानेको कथा सुनाउँदै उनले भने, ‘यसैबाट थाह हुन्छ, उनी सुदखोर हुन्।’ सर्लाहीका एमाले अध्यक्ष रेवती पन्त ब्याजी मिटरमा निर्लज्ज रुपमा ठगी भईरहेको बताउँछन्।

प्रकाशित : पुस २१, २०७४ १३:०७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

स्मिथ र खवाजा अस्ट्रेलियालाई सम्हाल्दै

एएफपी

सिड्नी — एसेज सिरिज अन्तर्गत पाँचौ टेस्टको दोस्रो दिनको खेल सकिँदा अस्ट्रेलियाले सम्हलिएको प्रदर्शन गरेको छ । अघिल्लो दिन २३३-५ को स्थितिमा रहेको इंग्ल्याण्डलाई ३ सय ४६ रनमा समेटेको अस्ट्रेलियाले आफ्नो पहिलो इनिङ्समा राम्रो सुरुआत गर्‍यो । 

अस्ट्रेलियाले दोस्रो दिनको अन्त्यसम्म पहिलो इनिङ्समा २ विकेटको क्षतिमा १ सय ९३ रन जोडेको छ । क्रिजमा कप्तान स्टिभ स्मिथ ४४ र उस्मान खवाजा ९१ रन बनाएर खेलिरहेका छन् ।

स्मिथले शुक्रबार टेस्ट क्रिकेटमा ६ हजार रन पुरा गरे । उनले १ सय ११ इनिङ्समा ६ हजार रन पुरा गर्दै उक्त सफलता हासिल गर्ने डन ब्राडम्यान पछिका सर्वाधिक तेज ब्याट्सम्यान पनि बने । ग्यारी सोबर्सले पनि १ सय ११ इनिङ्समै ६ हजार रन पुरा गरेका थिए ।

अस्ट्रेलियाले ओपनर क्यामरन ब्यान्क्रफ्टलाई शून्यमै गुमाएपनि डेविड वार्नरले ५६ रन जोड्दै टोलीलाई सम्हाले । वार्नर आउट भएपछि आएका स्मिथले खवाजासँग तेस्रो विकेटका लागि अविजित १ सय ७ रनको साझेदारी गरेका छन् । इंग्ल्याण्डका लागि स्टुआर्ट ब्रोड र जेमी एन्डरसनले १-१ विकेट लिए ।

त्यसअघि इंग्ल्याण्डको तल्लो क्रमलाई समेट्न अस्ट्रेलियाका मिचेल स्टार्कले ६२ रनमा खेलिरहेका डेविड मालानलाई स्लिपमा क्याच गराए । मोइन अली (३०), टम कर्रान (३९) र ब्रोड (३१) ले राम्रो स्कोर बनाए । समग्रमा अस्ट्रेलियाका लागि प्याट्रिक कमिन्सले ४ तथा मिचेल स्टार्क र जोश हेजलवुडले २-२ विकेट लिए । नाथन लायनले स्टुआर्ट ब्रोडको महत्त्वपूर्ण विकेट लिएका थिए ।

अस्ट्रेलियाले पाँच खेलको सिरिज ३-० ले जितिसकेको छ ।

प्रकाशित : पुस २१, २०७४ १२:३७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT