पुल नहुँदाको दु:ख

हरि गौतम

रुकुम पश्चिम — रुकुम पश्चिमको सदरमुकाम खलंगाको दूरी ३२ किलोमिटर छ । जिल्ला बाहिरबाट रुकुम पश्चिम राप्ती लोकमार्गमार्फत मुसीकोट खलंगा पुग्ने गर्दछन् । जिल्लाको सबैभन्दा पूरानो यो सडकको ३२ किलोमिटर दूरी पार गर्न नसोचेको समय खर्च गर्नुपर्ने बाध्यता । विशेषगरी वर्षायाममा यही सडकको झुल्नेटा–खलंगा खण्ड यात्रा गर्नेलाई पितिबाङ खोलाले रुवाउने गर्दछ ।

समयमै पितिबाङ पुग्नेहरु तर्न घण्टौं कुर्न बाध्य हुनुपर्छ । पुल नबनेका कारण सानो पानी पर्नेबित्तिकै पनि उर्लेर आउने पितिबाङ खोलाका कारण स्थानीयले १५ दु:ख भोग्दै आइरहेको छन् ।

मुसीकोट नगरपालिकाको ११ र १२ नम्बर वडा जोड्ने ठाउँ नजिकै काठे वा झोलुङ्गे पुल नहुँदा सवारीमा यात्रा गर्नेदेखि लिएर पैदल यात्रुहरुले समेत दु:ख पाउँदै आएका छन् । यो खोलाले हरेक वर्ष मान्छे र सवारीका साधन बगाउने गरेको छ । विशेषगरी मोटरसाइकल र त्यसमा सवार सर्वसाधारण पितिबाङ खोलामा बग्ने गरेका छन् । पितिबाङ खोलामा पुल नभएकै कारण १५ वर्षको अवधिमा धेरै जना बगेका छन् ।

Yamaha


हरेक वर्षामा पितिबाङ खोलाले त दु:ख दिन्छ नै, खोला छेवैमा रहेको पहिरोले पनि यात्रुलाई दु:ख दिने गरेको छ । हरेक वर्ष माथिबाट झर्ने पहिरोका कारण सवारीका साधन अघि बढ्न मुस्किल भइरहेको हुन्छ । माथिबाट झरेको पहिरोले सानादेखि ठूला सवारीका साधनसमेतलाई अघि बढ्न दिँदैन । हिलोमा फसेका गाडीलाई यात्रुले धकेलेर अघि बढाउनुपर्ने बाध्यता लामो समयदेखि कायमै छ । दैनिक सयौं यात्रु ओहोरदोहोर गर्ने पितिबाङ खोलामा पुल बनाउन र त्यस नजिकको पहिरो रोकथाममा सरोकारवालाको ध्यान नपुगेको गुनासो बढ्दै गएको छ । सडक डिभिजन कार्यालय चौरजहारीले पितिबाङ खोलामा पुल बनाउन डिजाइनिङको काम भइरहेको बताएको पनि वर्षौं बितेको स्थानीयको गुनासो छ ।

Esewa Pasal

प्रकाशित : श्रावण २२, २०७५ २२:१५
ADVERTISEMENT
प्रतिक्रिया
पठाउनुहोस्
ADVERTISEMENT

अवैध रूपमा कामदार टर्की पठाइयो 

सञ्चालक फरार, म्यानपावरको काम भने निरन्तर 
कान्तिपुर संवाददाता

काठमाडौँ — साकुरा इन्टरनेसनल इम्प्लोइमेन्ट कन्सल्टेन्सीले अवैध ढंगले टर्कीमा कामदार पठाउने गरेको पाइएको छ । वैदेशिक रोजगार विभागबाट श्रम स्वीकृति नलिई साकुराले कामदारसँग लाखौं रुपैयाँ असुल गरी टर्की पठाइरहेको पीडितहरूले बताएका छन् ।

टर्की पुगेर काम नपाएपछि फर्केका पीडित कामदारले साकुरालाई कारबाही गर्न वैदेशिक रोजगार विभागमा प्रमाणसहित उजुरी दिएका छन् । ‘हामी बूढाबूढीलाई साकुराका सञ्चालक महेन्द्र राना मगर, अर्जुन गिरी र ईश्वर राना मगरले दिल्लीबाट टर्की पठाए,’ काभ्रेका सुरज लुइँटेलले भने, ‘अन्तर्वार्ता दिने बेला कानुनी रूपमा पठाउने भनिएको थियो । तर, दिल्लीबाट पठायो ।’
तीनै आरोपी फरार छन् । महेन्द्र र ईश्वर रानाले काठमाडौंमा पैसा उठाउने र दिल्लीमा बसेर अर्जुन गिरीले कामदार पठाउने गरेका छन् । सुरज आफन्तको सहयोगमा काठमाडौं फर्केका छन् । ‘रकम जुटाउन नसकेपछि आफ्नै श्रीमतीलाई टर्कीबाट ल्याउन सकेको छैन,’ उनले भने, ‘श्रीमती टर्कीमै भेटिएका साथीहरूको सहयोगमा बसिरहेकी छिन् ।’

सुरज महेन्द्रबाट पैसा फिर्ता लिएपछि श्रीमती झिकाउने आशाबाट टर्कीबाट आएका थिए । ‘पैसा नपाएर म यता पागल झैं भौंतारिरहेको छु । उता श्रीमती रुँदै बसेकी छिन्,’ उनले भने ।

टर्की जान उनीहरूले साकुरा म्यानपावरका सञ्चालक रानालाई १५ लाख रुपैयाँ दिएका थिए । ‘केयरगिभर काममा मासिक ८ सय डलर तलब हुन्छ भनेर गएका थियौं । उता गएपछि काम दिलाउन सकेन । खाना पनि हामी आफैंले जुटाएका हौं,’ उनले भने ।

टर्कीका एजेन्टले उनीहरूलाई एउटा गार्मेन्ट उद्योगमा ३५ दिन थुनेर काममा लगाएको थियो । ‘टर्कीको एजेन्टले तीन सय ५० डलर कमिसन पाएपछि एउटा गार्मेट उद्योगमा पठायो । गार्मेन्टका मालिक बिहान ८ बजे आएर सटर खोलिदिन्थ्यो । दैनिक १५/१६ घण्टा काममा लगाउँथ्यो । त्यो काम गर्न नसक्ने भएपछि मालिकलाई ३ सय ५० डलर बुझाएर त्यहाँबाट बाहिर निस्कन पायौं,’ उनले भने, ‘त्यहाँ काम गर्दा मेरो नाकमुखबाट रगत आयो ।’

उनीहरूलाई इस्तानबुलको काक्सिन भन्ने ठाउँमा एउटा कोठाभित्र थुनेर राखिएको थियो । ‘मैले पैसा त पाइनँ । श्रीमतीलाई समेत झिक्न सकिनँ,’ उनले भने, ‘मेरो जीवन नै टक्क रोकिएको जस्तो भइरहेको छ ।’

पीडितले साकुराविरुद्ध उजुरी गरे पनि विभागबाट कारबाही अगाडि बढेको छैन । साकुराले जापान र पोल्यान्ड जाने कामदारसँग पनि पैसा उठाइरहेको छ । ‘श्रमस्वीकृतिबिना कामदार पठाउँदा झन् मानव तस्करीविरुद्ध तुरुन्तै कारबाही गर्नुपर्ने हो । सञ्चालक फरार छ । म्यानपावर भने चलिरहेको छ,’ उनले भने ।

प्रकाशित : श्रावण २२, २०७५ २२:०७
पूरा पढ्नुहोस्
प्रतिक्रिया
पठाउनुहोस्
ADVERTISEMENT