लामखुट्टे मार्दै नगरपालिका

मनोज पौडेल

कपिलवस्तु — लामखुट्टेका कारण रातभरि सुत्न नसेकेको र रोगव्याधी बढेको गुनासो नगरवासीले गरेपछि कपिलवस्तु नगरपालिकाले लामखुट्टे मार्न भारतबाट १२ लाखको  ‘फगिङ्ग मेसिन’ भित्र्याएको छ । बजार क्षेत्रमा २ दिन बिराएर औषधि छर्कन थालेपछि लामखुट्टे निक्कै कम भएको नगरपालिकाले जनाएको छ । 


गाडीमा मेसिन राखेर मुख्य बाटो र सहायक बाटोमा धुवाँ फाल्ने गरिन्छ। हावामा औषधियुक्त धुवाँ मिसिएर पुग्ने ठाउँका लामखुट्टे मर्ने गर्छन्। ‘यो प्रविधिबाट लामखुट्टे कम गर्ने प्रयोग नेपालमै पहिलो पटक कपिलवस्तु नगरपालिकाले गरेको हो’ मेयर किरण सिंहले भने, ‘यसको प्रभाव निक्कै राम्रो छ।’ उनले २ सातायतादेखि लामखुट्टेको गुनासो नआएको बताए।

Yamaha

१२ वडामध्ये १ र ४ को पुरै बस्ती सहरी क्षेत्र हो। वडा नं. ३ को आधी बस्ती पनि बजार हो। गाडी पुगे कुना काप्चासम्म पनि औषधि छर्केने गरिएको नगरपालिकाले जनाएको छ।

‘अत्यधिक लामखुट्टे लागेर साँझ परेपछि घर बस्नै नहुने अवस्था हुन्थ्यो। तर, अब निक्कै सजिलो भएको छ’ कपिलवस्तु नगरपालिका ५ तिलौरीकी सुरक्षा गिरीले भनिन्।

नगरपालिकाका प्रमुख प्रशासकीय अधिकृत विमलराज आर्चायले २ घण्टामा ८ हजार खर्च हुने जानकारी दिए।

मुख्यत: २ हजार लिटर पर्ने केमिकल नै लामखुट्टे मार्ने औषधि हो। मेसिनसँग रहेको टयाङ्कीमा ५० लिटर डिजल, १० लिटर पेट्रोल, ५० लिटर पानी र २ सय मिलिलिटर केमिकल राखेर औषधि बनाइन्छ। यो औषध कम्तीमा पनि लगातार २ घण्टासम्म छर्कन सकिन्छ। मिसाइल छोडेजस्तै मेसिनबाट धुवाँ निस्कन्छ। त्यही धुवाँ जमिन, कुनाकाप्चा र घरवरपर पुग्दा लामखुट्टे भटाभट मर्ने गरेका छन्।

प्रकाशित : भाद्र १, २०७५ १८:३६
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सडक बगाएपछि विकल्पमा पदमार्ग

आश गुरुङ

लमजुङ — हिमाली जिल्ला मनाङको चामेमा पहिरोले सडक बगाएपछि मानिस हिँड्न वैकल्पिक मार्ग बनाइएको छ । सेना, प्रहरी र स्थानीयले मानिस हिँड्ने बाटो बनाएका हुन् ।

आइतबारदेखि चलेको पहिरो बुधबारसम्म मानिस आवातजावत समेत गर्न नमिल्ने गरी मर्स्याङदीमा मिसिएपछि आवतजावतको लागि पहिरो माथि जंगलको बाटो बनाएको नेपाली सेनाको चामेस्थित रणदल गुल्मले जनाएको छ । गुल्मपति मेजर दिलिप घलेका अनुसार मानिस आवतजावत नै रोकिएपछि वैकल्पिक मार्ग निर्माण गर्न सेनाका जवान खटिएका थिए । यसमा प्रहरी र स्थानीयले सहयोग गरेको उनले बताए ।

‘मानिस हिँड्नै भएन । माथिको माथि नै तलको तल नै अलपत्र पर्‍यो । जनतालाई गन्तब्यमा पुर्‍याउन करीब ५ सय मिटरको वैकल्पिक पदमार्ग बनाइएको उनले बताए । उनका अनुसार खोल्साखोल्सीमा काठका अस्थायी फड्के समेत निर्माण गरिएको छ ।

डीएसपी खड्कबहादुर खत्रीका अनुसार मनाङको चामे नजिकै त्रिचुङाल्डा र कोतोको बीचमा पहिरो गएको छ । खुकुलो माटो, कमलो भएकाले यसअघि देखि उक्त ठाउँ पहिरोको जोखिममा थियो । मस्र्याङदी नदीमा पानीको बहाव बढेपछि त्यसले कटान गर्दा पहिरो चलेको उनले बताए ।

‘सवारी हिँड्ने बाटो बन्द भयो । मानिस आवतजावत पनि त्यही बाटो गर्दै आएको थियो । सडक बगाएपछि मानिस अलपत्र पर्‍यो । वैकल्पिक मार्ग बनायौं,’ उनले भने । पहिरो गएको ठाउँभन्दा माथि पहिरोको जोखिम नहुने गरी करीब २ सय मिटर माथिबाट वैकल्पिक पदमार्ग निर्माण गरिएको उनले बताए । उनका अनुसार पदमार्गमा हिँड्नेलाई चौविसै घण्टा प्रहरीले सुरक्षा दिइरहेको छ । पहिरोले कोतोस्थित क्युपार सीमा प्रहरी चौकी र यसको बिट पनि जोखिममा पारेको उनले बताए ।

चामे गाउँपालिका अध्यक्ष लोकेन्द्रबहादुर घलेका अनुसार बाटो बगाएसंगै बुधबारदेखि उक्त सडक पूर्ण रुपमा बन्द छ । चामेबाट माथिका सवारीसाधन चामे र त्रिचुङाल्डा साथै तलका सवारी साधन कोतोमा रोकिएका छन् । तल्लो क्षेत्रबाट ल्याइएका सामान मानिसले ओसारपसार गरिरहेका छन् । माथिल्लो क्षेत्रका सवारीलाई चाहिने पेट्रोलियम पदार्थ युवाहरुले बोकेर लाने गरिएको छ ।

विकल्पमा बनाइएको बाटोमा पर्यटक तथा विद्यार्थी हिँड्नलाई असहज भएको स्थानीयले बताएका छन् । निमित्त प्रमुख जिल्ला अधिकारी जयराज भण्डारीले पहिरो फालेर सडक खुलाउने प्रयास गरिएपनि नसकिएको बताए । उनका अनुसार पानी परिरहेकाले समस्या आएको छ । ‘हामीले डोजर लगाएर बाटो खुलाउने प्रयास गरेका छौं । पानी परिरहेकाले सकिएको छैन । मर्स्याङदीको भेल घटेको छैन,’ उनले भने । करीब डेढसय मिटर सडक बगाएको पहिरोले त्रिचुङाल्डाका करीब १० घरलाई उच्च जोखिममा पारेको छ ।

प्रकाशित : भाद्र १, २०७५ १८:२७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT