तानसेनको जंगलमा भीषण डढेलो 

माधव अर्याल

पाल्पा — सदरमुकाम तानसेन नजिकैको वनदेवी, होलाङ्दी , धरमपानी जंगल क्षेत्रमा बुधबार दिउँसो भीषण डढेलो लागेको छ । डिभिजन वन कार्यालय अन्तर्गत सब–डिभिजन कार्यालय, तालिम हल, नर्सरी क्षेत्रमा भीषण डढेलो लागेको हो ।

नेपाली सेना, प्रहरी, सशस्त्र प्रहरी बल, नगरपालिकाको दमकलले नियन्त्रणको प्रयास गरेका थिए। सयौंको संख्यामा सुरक्षाकर्मी, स्थानीय बासिन्दा परिचालन भएपनि हावाहुरीका कारण नियन्त्रणमा निकै कठिनाइ भएको थियो।

Citizen

आगोलागी नियन्त्रणमा खटिएका नेपाली सेनाका कुमार दाहालका अनुसार दिउँसो लाग्ने हावाहुरीका कारण तत्काल नियन्त्रणमा लिन समस्या भएको थियो। सानो दमकल भएकाले पानी थोरै हुने हुँदा धेरै जंगल आगो फैलिएको हो। सब–डिभिजन कार्यालय, कर्मचारी निवास जोगाउन सबै सुरक्षाकर्मी, दमकल परिचालन गर्नु परेको थियो। वनका कर्मचारी समेत खटिएर आगो नियन्त्रण लिने प्रयास गरेका थिए।

एकै दिनमा दुई तीन स्थानमा आगलागी भएकाले झन् समस्या आएको प्रहरी निरीक्षक देवराज पौडेलले बताए। माथिल्लो क्षेत्रमा दुई घण्टा लगाएर नियन्त्रणमा लिएर फर्किँदा पुनः तल्लो क्षेत्रमा आगलागी भएको थियो। जसले गर्दा सेना, प्रहरी र दमकललाई हम्मे परेको हो। वन कार्यालयका यमलाल पोखरेलका अनुसार सबै जनाको प्रयासबाट सब–डिभिजन कार्यालय, नर्सरी, तालिम हल, निवासलाई जोगाउन सकिएको छ।

सेना, प्रहरी, सशस्त्र, स्थानीय, कर्मचारी सबै खटिएर अग्निरेखा बनाउने र घर जोगाउन सक्रिय भएका थिए। आगो सब–डिभिजन होलाङदीको तल्लो भेगबाट सल्किएको थियो। जसले गर्दा उकालो र हावाहुरीले तत्कालै धेरै क्षेत्रमा आगलागी भएको हो। नर्सरीमा कार्यरत कर्मचारी धनकुमारी गैरेका अनुसार तल्लो भेगमा युवायुवती चुरोट, गाँजा खान पुग्छन्। उनीहरुले नै लापरवाहीले लगाउने गरेको आफूले पाएको बताइन्।

प्रकाशित : वैशाख १९, २०७६ १६:५५
ADVERTISEMENT
प्रतिक्रिया
पठाउनुहोस्
ADVERTISEMENT

श्रम ऐन कार्यान्वयन गराउन नसक्नु सरकारको लाचारीपन: नेता केसी

अर्जुन राजवंशी

बिर्तामोड — नेपाली कांग्रेसका नेता अर्जुननरसिंह केसीले चिया श्रमिकहरु एक महिनादेखि आन्दोलनमा रहेपनि सरकारले श्रम ऐन कार्यान्वयन गराउन नसक्नु यो सरकारको लाचारीपन भएको बताएका छन् ।

उनले ऐन कार्यान्वयनका लागि श्रमिक सडक आन्दोलनमा रहेपनि सरकारले नदेखेजस्तो गर्नु दुःखद भएको बताए । उनले श्रमिकहरुका बारे धेरै हावादारी र भ्रमपूर्ण भाषण नगर्न प्रधानमन्त्री केपी ओलीलाई आग्रह गरे ।

‘चिया श्रमिक ३३ दिनदेखि सडक आन्दोलनमा छन् । प्रधानमन्त्री भने अब श्रमिकले आन्दोलन गर्नु पर्दैन । हामीले ऐन बनाएर लागू गरिसकेका छौँ भन्छन्’ केसीले भने,‘प्रधानमन्त्री ओलीले आफ्नै गृहजिल्लाका श्रमिकको आन्दोलन नदेख्ने ? ऐन बनाए भनेर भाषण गर्ने, तर कार्यान्वयन गराउनेतिर ध्यान नदिने ?’ उनले प्रधानमन्त्रीको हावादारी र भ्रमपूर्ण कुराहरुले सरकारप्रतिको जनताको विश्वास गुमेर गएको बताए ।

बिहीबार झापाको बिर्तामोडमा प्रेस युनियनले आयोजना गरेको पत्रकार भेटघाट कार्यक्रममा बोल्दै नेता केसीले प्रधानमन्त्री ओलीलाई भाषणभन्दा काम गर्नेतिर ध्यान दिन सुझाव दिए । ‘हावादारी गफ गरेर काम देखाउनु पर्दैन । काम गर्नुस् जनताले आफैँ देख्छन्’उनले भने ।

केसीले सरकार भ्रष्टाचारी, भूमाफिया र अपराधीलाई संरक्षण दिने कार्यमा अघि बढेको आरोप लगाए । ‘सुन काण्ड, वाइडबडी, बालुवाटारको जमिन कब्जा, निर्मला हत्याजस्ता दर्जनौँ घटना भईसक्दासम्म सरकार किन चुप छ । किन कारबाहीतर्फ अघि बढ्दैन ?’उनले भने,‘किन भने सरकार भ्रष्टाचारी, भूमाफिया र अपराधीलाई संरक्षण दिन व्यस्त छ ।’

उनले बालुवाटारको जमिन प्रकरणमा जुन पार्टीको जोकोही संलग्न भएपनि सरकारले सबैलाई कारबाही गर्ने हिम्मत राख्नुपर्ने बताए । केसीले कांग्रेस महासमिति बैठकले पारित गरेका एजेण्डा पार्टी सभापतिले मानेर अघि बढ्नुको विकल्प नरहेको बताए ।

प्रकाशित : वैशाख १९, २०७६ १६:३९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT