कांग्रेस सांसद् रिजालले भने, 'सभामुख महोदय यसरी संसद् चल्दैन'

कांग्रेसको विरोधबीच सभामुखले सरकारको नीति तथा कार्यक्रमको प्रक्रियालाई अगाडि बढाएका थिए । 'सभामुख महोदय यसरी संसद चल्दैन । यसरी संविधान पालना हुँदैन भन्ने आशंका व्यक्त गरेरै हामीले संशोधन प्रस्ताव दर्ता गरायौं' रिजालले भने, 'संसदको गरिमा हुन्छ । प्रधानमन्त्रीबाट संसदको गरिमा कायम भएन । सभामुखले पनि कायम गर्न सक्नु भएन । दुःखसाथ भन्नुपर्छ । यो भन्दा नराम्रो काम संसदीय अभ्यासमा हुन सक्दैन ।'

सभामुखले प्रधानमन्त्रीको प्रतिष्ठाका लागि संसदलाई कमजोर बनाउने भूमिका निभाएको सांसद रिजालको आरोप थियो । 'सभामुख महोदय संसद्को गरिमालाई यसरी तल नपार्नुस्, कमजोर नबनाउनुस्' उनले भने, 'एउटा व्यक्तिको प्रतिष्ठाका लागि संसद् झुक्नु पर्ने, नागरिक झुक्नु पर्ने । यो लोकतन्त्र होइन । यो संविधानसम्मत होइन ।' उनले सदनमा देखिएको गतिविधिका विषयमा कांग्रेसले आम नागरिकका बीचमा पुर्‍याउने चेतावनी दिए ।

नीति तथा कार्यक्रममाथि उठेका प्रश्नको जवाफ दिने क्रममा प्रधानमन्त्री केपी ओलीले संसदीय मर्यादाविपरीतका शब्दावली प्रयोग गरेको कांग्रेसको आरोप छ ।