मलेसियाली विमान दुर्घटना

एक सय ९६ शव भेटिए

किभ (बीबीसी/सिन्हवा) — मलेसियन एयरलाइन्सको विमान दुर्घटनामा मृत्यु भएका १ सय ९६ यात्रुको शव भेटिएको युक्रेनी अधिकारीले जानकारी दिएका छन् । विमानमा चालक दल र यात्रु गरी २ सय ९८ सवार थिए । रुस समर्थक विद्रोहीले विमानको ब्ल्याक बक्सजस्तै सामग्री फेला पारेको बताएका छन् ।

त्यसलाई अन्तर्राष्ट्रिय अनुसन्धानकर्ताको जिम्मा लगाइने स्वघोषित दोनेत्स्क जनगणतन्त्रका प्रधानमन्त्री अलेक्जेन्डर बोरोदाईले बताए ।
एयरलाइन्सको अस्तित्व संकटमा
मलेसियन एयरलाइन्स कम्पनीको सेयरमा शुक्रबार ११ प्रतिशत गिरावट आएर बन्द भयो । विमान दुर्घटनापछि पश्चिमी देश, युक्रेन र रुसबीच तनाव बढेको छ । त्यसको असर एसियाली बजारमा देखिएको छ । गत मार्च ८ देखि बेपत्ता मलेसियन एयरलाइन्सकै एमएच ३७० विमान अहिलेसम्म भेटिएको छैन । ती घटनाले उक्त कम्पनीको अस्तित्वमाथि प्रश्न उठेको छ ।
'केही महिनाको अन्तरमा कुनै राष्ट्रिय ध्वजावाहक कम्पनीले आफ्ना दुई विमान गुमाएको यो घटना इतिहासमा पहिलो हो,' उक्त एयरलाइन्सका बैंकर तथा डीभीबी बैंकको एभिएसन विभाग प्रमुख बट्ररान्ड ग्राबोस्कीले भने, 'मलेसियन एयरलाइन्सलाई ज्यादा सरकारी सहायता आवश्यक छ ।' उक्त एयरलाइन्स केही वर्षयता निरन्तर घाटामा छ । ९ महिनायता मात्र कम्पनीको बजार मूल्यमा ४० प्रतिशतले गिरावट आइसकेको छ ।
एयरलाइन्सको ठूलो हिस्सेदार सरकारी कम्पनी 'खजाना नेसनल' ले आफ्नो सेयर निजी कम्पनीलाई दिनेबारे छलफल थालेको छ । 'ठूलै परिमाणको सेयर नभित्र्याए मलेसियन एयरलाइन्स आगामी एक वर्षसम्म पनि सञ्चालन हुन नसक्ने देखिएको छ,' क्वालालम्पुरका सेयर विश्लेषक मोहसिन अजिजले भने । जानकारको भनाइमा युरोपेली दृष्टिकोणबाट यी दुई दुर्घटनाका कारण मलेसियन एयरलाइन्सको ब्रान्डमाथि प्रश्न उठिसकेको छ ।

प्रकाशित : श्रावण ५, २०७१ ०९:५०
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

चीनबाट १९ अर्बको आयात

चौतारा — चीनबाट तातोपानी नाका भएर गत आर्थिक वर्षमा १९ अर्बको व्यापारिक सामान आयात भएको छ ।

मूल्यका आधारमा अघिल्लो वर्षको तुलनामा २ अर्ब ६९ करोड बराबरको आयात वृद्धि भएको हो । गत आव ०६९/०७० मा १६ अर्ब ३६ करोडको पैठारी भएकोमा ०७०/०७१ मा १९ अर्ब ६ करोडको भएको छ ।
गत आवको राजस्व लक्ष्य ५ अर्ब ९ करोड ५६ लाख रहेकामा ५ अर्ब ९ करोड ८१ लाख संकलन भएको छ । राजस्व लक्ष्य पूरा गर्न तयारी पोसाकको आयातले महत्त्वपूर्ण भूमिका निर्वाह गरेको छ । भन्सार प्रमुख मिमांश अधिकारीका अनुसार तयारी पोसाक मात्र ५ अर्ब ६९ करोड ३६ लाख बराबरको पैठारी भएको छ । गत आवमा टेलिफोन उपकरणबाट १८ करोड ६५ लाख राजस्व संकलन भएको छ ।
यस वर्ष ९९ करोड ९४ लाख बराबरको टेलिफोन सामग्री आयात भएको थियो ।
आघिल्लो वर्ष यो शीर्षकमा ७ करोड राजस्व संकलन भएको थियो । मेसिनरी पार्टसबाट ६ करोड राजस्व संकलन भएको छ । उक्त आवमा ४५ करोडको मेसिनरी सामान आयात भएको थियो ।
यहाँबाट आयात भएका मुख्य वस्तुमा तयारी पोसाक, सुती कपडा, जुत्ता, चप्पल, टेलिफोन उपकरण, रेसम धागो, धातुका फर्निचर, हातेझोला, टेरिकटन, सल दोसल्ला, सीडी चक्का, डम्फर, तन्ना, क्याप (टोपी), मेसिन पार्टस, मोटर ब्याट्री, स्याउलगायत सामान आयात भएको छ । यी सामानको आयात परिमाण बढेको छ ।
मिनी बस, अदुवा, सुठो, रंगीन टेलिभिजन, ब्लाङ्केट, माइक्रो बस, ताररहित टेलिफोन, भीसीडी, डीभीडी, प्लेयर्स, स्यानेटरी टायल, चकलेट, उनी कपडा, प्लास्टिकका सामान, लसुन, सिन्थेटिक कार्पेट, बि्रफकेस, किताब राख्ने झोलालगायतका सामानको आयात घटेको छ ।



 

प्रकाशित : श्रावण ५, २०७१ ०९:५०
पूरा पढ्नुहोस्
प्रतिक्रिया
पठाउनुहोस्
ADVERTISEMENT