एयर अल्जेरीमा सवार सबैको मृत्यु
पेरिस (बीबीसी) — फ्रान्सेली राष्ट्रपति फ्रान्स्वाँ होलान्डले बिहीबार मालीमा दुर्घटनाग्रस्त एयर अल्जेरी एएच- ५०१७ यात्रु जेटमा सवार कोही पनि जीवित नरहेको बताएका छन् । त्यसमा ५१ फ्रान्सेली नागरिकसहित १ सय १६ यात्रु सवार थिए ।
पश्चिम अफ्रिकी मुलुक बुर्किना फासोसँग जोडिएको मालीको सीमा नजिकको दुर्घटनास्थलमा फ्रान्सेली सेनाले फ्लाइट डाटा रेकर्डर बरामद गरेको उनले जानकारी दिए । उडान गरेको करिब ५० मिनेटमै बिहीबार बिहानै चालकले डरलाग्दा धुलोको आँधी चलिरहेको रिपोर्ट नाइजरको राजधानी नियामीस्थित कन्ट्रोल टावरलाई गरेपछि उक्त विमान एयर ट्राफिक कन्ट्रोलको सम्पर्कबाट हराएको थियो ।
बुर्किना फासोको राजधानी विगडुईगुईबाट अल्जियर्सका लागि उडेको म्याकडोनल डुगल्स एमडी-८३ विमानलाई स्पेनी एयरलाइनको स्विफ्ट एयरले चार्टर गरेको थियो । पहिलो उडान सन् १९८४ मा गरेको उक्त विमानमा १ सय ७२ यात्रु अटाउन सक्छ । दुर्घटनामा परेलगत्तै विमान नष्ट भएको फ्रान्सेली गृहमन्त्री बर्नाड काजेनुभले पुष्टि गरेका छन् । 'आँधीकै कारणले दुर्घटना भएको भनिए पनि केही भन्न सकिने अवस्था छैन,' उनले भने । ३० वाहनसहित सय फ्रान्सेली सैनिकको समूह शुक्रबार दुर्घटनास्थलमा पुगेको थियो । मालीमा अल कायदा समर्थित विद्रोहीसँग लड्न गत वर्ष परिचालन गरेको सैन्य बलसँग उक्त समूह आबद्ध छन् । 'सैनिकले पहिलो अनुसन्धान सुरु गरेको छ,' राष्ट्रपति फ्रान्स्वाँ होलान्डले भने, 'कोही पनि नबच्नु दुःख लाग्दो हो ।' विमानमा लेबनानका ८, अल्जेरियाका ६, लक्जेमवर्गका दुई, क्यानाडाका पाँच, जर्मनीका चार, क्यामरुन, बेल्जियम, इजिप्ट, युक्रेन, स्विट्जरल्यान्ड, नाइजेरिया र मालिका एक/एक यात्रु थिए । जहाजका ६ कर्मचारीहरू भने स्पेनका थिए ।
प्रकाशित : श्रावण १०, २०७१ ०९:५२
प्रतिक्रिया