आईएसविरुद्ध थप आक्रमण

बग्दाद (बीबीसी) — आफ्नो नियन्त्रणमा रहेका अर्का अमेरिकी पत्रकारको समेत हत्या गर्ने इस्लामिक स्टेट (आईएस) ले दिएको चेतावनीको उपेक्षा गर्दै अमेरिकाले उत्तरी इराकमा लडाकुमाथि ताजा आक्रमण गरेको छ।


मोसुल सहर नजिक आईएससँग लडिरहेको कुर्दिस र इराकी सुरक्षा बललाई अमेरिकी नौसेनिक योद्धा र चालकरहित विमानले हवाई सुरक्षा प्रदान गरेको छ। आईएस समूहले मंगलबार अमेरिकी युद्ध पत्रकार जेम्स फोलीको हत्या गरेको भिडियो सार्वजनिक गरेको थियो।
उनी सन् २०१२ देखि सिरियाबाट हराइरहेका थिए। इराकमाथिको आक्रमण र हस्तक्षेप नरोकेमा लडाकुले उक्त भिडियोमा अर्को एक अमेरिकी पत्रकारको हत्या गर्ने धम्की दिएको थियो।
उक्त भिडियो बाहिर आएदेखि अमेरिकी सुरक्षा बलले लडाकुको मुख्य थलो मोसुल बाँधमा १४ थप हवाई आक्रमण गरेको छ। आईएसको सवारी र अन्य लक्ष्यलाई सफलतापूर्वक सफाया गरिएको अमेरिकी अधिकारीहरूले भनेका छन्। सिरिया र इराकको ठूलो भू-भागमा आधिपत्य जमाएको आईएसविरुद्ध ८ अगस्टदेखि अमेरिकाले आक्रमण जारी राखेको छ। जारी आक्रमणको बदलामा अमेरिकी पत्रकार फोलीको हत्या गरेको आईएसले भिडियोमार्फत जनाएको छ। अमेरिकी राष्ट्रपति बाराक ओबामाले बुधबार राति उक्त हत्यालाई पूरा विश्वको अन्तरआत्मालाई चेाट पुर्‍याउने आतंककारी गतिविधि बताए।



 

प्रकाशित : भाद्र ६, २०७१ ०९:१५
प्रतिक्रिया
पठाउनुहोस्
ADVERTISEMENT

थाइल्यान्डमा सेना प्रमुख प्रधानमन्त्री मनोनयन

बैंकक (एपी/बीबीसी) — दक्षिण-पूर्वी एसियाली मुलुक थाइल्यान्डको सैनिक सरकार 'जुन्ता' ले जनरल प्रायुथ चान ओचालाई अन्तरिम प्रधानमन्त्री पदमा मनोनयन गरेको छ। मुलुकको राष्ट्रिय व्यवस्थापिका सभा (एनएलए) वा सैनिक 'कू' पछिको अन्तरिम व्यवस्थापिकाले बिहीबार चान ओचालाई मुलुकको २९ औं प्रधानमन्त्री घोषणा गरेको छ।


सरकारद्वारा मनोनयन गरिएका सबै १ सय ९४ व्यवस्थापिका सभासद्हरूमध्ये १ सय ९१ जनाले ओचाको समर्थनमा मतदान गरेका थिए। ६० वर्षे ओचाले अर्को महिनादेखि थाई सैनिक सेवाबाट अवकाश प्राप्त गर्दै छन्। राष्ट्रिय राजनीतिमा उनलाई निरन्तरता दिने मनसायले प्रधानमन्त्री पदको एकल उम्मेदवार बनाइएको बताइन्छ। १५ मिनेटभित्र संसदीय मतदानको औपचारिकता पूरा गरिएको थियो।
निर्वाचित सरकारलाई गत मे २२ मा सैनिक 'कू' द्वारा अपदस्थ गरेपछि प्रायुथले 'डी फ्याक्टो' प्रधानमन्त्रीको रूपमा सत्ता चलाउँदै आएका थिए। उनी उक्त नाटकीय 'कू' का बेला सेना प्रमुख थिए। जननिर्वाचित प्रधानमन्त्री यिंग्लक सिनावात्रा र विपक्षीबीच महिनौंसम्म चलेको तनावबीच उनले उक्त कदम चालेका थिए। उक्त मनोनयनलाई नरेश भूमिवल अदुल्यादेजबाट साताभित्र औपचारिक समर्थन प्राप्त हुनुपर्नेछ। त्यसपश्चात् मात्र ओचाले मन्त्रिमण्डल गठन गर्न पाउने छन्।
मनोनयन हुनुअघि आफूले उक्त पदका लागि कुनै पहल नगरेको द बैंकक पोस्टले उनलाई उद्धृत गर्दै लेखेको छ ।
'म मुलुकलाई अघि बढाउन चाहन्छु,' उनले एक प्रश्नको जवाफमा भने। ३५ सदस्यीय मन्त्रिपरिषद् र २ सय ५० सदस्यीय सुधार परिषद्को स्थापनामा ध्यान दिनु उनको अर्को महत्त्वपूर्ण कदम हुनेछ। राजनीति र सरकारको जरो एवं शाखामा सुधारको अभिभारा परिषद्माथि छ। यो निकै उच्च महत्त्वाकांक्षी एजेन्डा हो।
सन् २०१५ को अन्त्यतिर सेनाले निर्वाचन गर्ने योजना अघि सारेकोले अन्तरिम प्रधानमन्त्रीको रूपमा उनको भूमिकालाई विश्वले नियाल्नेछ। उनी सन् २०१० को अक्टोबरमा सेना प्रमुख भएका थिए। उनी सेप्टेम्बरमा अवकाश पाउँदै थिए।





प्रकाशित : भाद्र ६, २०७१ ०९:१३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT