मुख्यमन्त्री अखिलेशलाई गरिएको कारवाही एकैदिनमा फिर्ता

एजेन्सी

लखनउ — परिवारमा राजनीतिक किचलोका कारण शुक्रबार समाजवादी पार्टीबाट निष्कासनमा परेका उत्तर प्रदेशका मुख्यमन्त्री अखिलेश यादव र रामगोपाल यादवको कारवाही फिर्ता लिइएको छ। मुख्यमन्त्री अखिलेश र उनका काका रामगोपललाई मुलायमसिंह यादवले ६ वर्षका लागि पार्टीबाट निष्कासन गरेको हिजो बताएका थिए ।

आजै एक ट्विट गर्दै समाजवादी पार्टी, उत्तर प्रदेशका अध्यक्ष शिवपाल सिंह यादवले अखिलेश र रामगोपाललाई गरिएको कारवाही फिर्ता लिएको बताएका छन् ।
 


समाजवादी पार्टीमा यूपीमा २०१७ मा हुने निर्वाचनमा कसलाई कसलाई कहाँबाट उम्मेदवार बनाउने भन्ने विषयलाई लिएर विवाद सुरु भएको थियो । सो विवादले उग्ररुप लिँदै गएपछि अखिलेशले आफ्नो बाबुले जारी गरेको उम्मेदवार सूचिलाई इन्कार गर्दै आफ्नो सूचि जारी गरेका थिए । तत्पश्चात पार्टी सभापति मुलायामसिंह यादवले शुक्रबार साँझ रामगोपाल र अखिलेशलाई पार्टीबाट निष्कासन गरेका थिए । तर उक्त निर्णयको पार्टीभित्रै चर्को विरोध भएपछि कारवाही फिर्ता लिइएको विभिन्न संचारमाध्यमले उल्लेख गरेका छन् । शिवपाल यादवले आगामी निर्वाचनमा पार्टीको उम्मेदवारका विषयमा पुनर्विचार गर्ने गरी कारवाही फिर्ता लिइएको बताएका हुन्।

यूपीका मुख्यमन्त्री अखिलेशमाथि आफ्नो काका रामगोपालकोको साथमा पार्टीमा गुटबन्दी गरेको आरोप उनकै बाबु मुलायम तथा अर्को काका शिवपालले लगाएका थिए । बहालवाला मुख्यमन्त्री आफ्नै पार्टीबाट निष्कासित भएपछि यूपीमा राजनीतिक तथा संवैधानिक संकट उत्पन्न भएको थियो । कारवाहीसँगै अखिलेखको सरकार अल्पमतमा परेको थियो भने समाजवादी पार्टी विभाजनको संघारमा पुगेको थियो ।

अखिलेश यादव सबैभन्दा कम उमेरमा मुख्यमन्त्री बन्ने नेताभित्र पर्छन् । उनी २०१२ मा यूपीको मुख्यमन्त्री बनेका थिए । उनले २०१२ को उत्तर प्रदेश विधानसभा निर्वाचनमा महत्वपूर्ण भूमिका निर्वाह गरेका थिए।

प्रकाशित : पुस १६, २०७३ १५:५५
प्रतिक्रिया
पठाउनुहोस्

भिक्षुमय लुम्बिनी [फोटो फिचर]

मनोज पौडेल

कपिलवस्तु — पवित्रभूमि लुम्बिनी पुरै भिक्षुमय बनेकोछ । भर्खर भिक्षु जीवनमा प्रवेश गरेकादेखि युवा, वयस्क र पाका उमेरका भिक्षु बिहानबाट साँझसम्म पुजामा बसेका छन् ।

१० दिन लामो विश्व शान्ति (मोन्लाम) महा पुजामा ५ हजार बढी भिक्षु सहभागी छन् । पहेंलो बस्त्रधारी उनीहरु एक स्वरमा सुत्र पाठ गरिरहेका छन् । 

यस वर्ष २५ औं शान्ति पुजा भएकाले विशेष रुपमा गरिएको छ । साक्यपा सम्प्रदायका सबैभन्दा ठूला गुरु साक्या ठेन्जेन रिम्पोछेले पुजा गराइरहेका छन् । उनी शाक्य सम्प्रदायको ४१ औं गद्दिधारी रिम्पोछे हुन् । सबै प्राणीको दु:ख निवारणको कामना गर्दै विश्व शान्तिकालागि पुजा भइरहेको आयोजक साक्या मुलुम फाउण्डेसनका अध्यक्ष ङागा लामाले बताए । ‘नेपालका सबै मानिसको चित्त शान्त होस्,’ उनले भने, 'विश्वमा शान्ति फैलिरहोस् भन्ने कामनाका लागि मन्त्रोच्चारण हुन्छ ।'

आइतबारदेखि सुरु भएको पुजा मंगलबारसम्म चल्नेछ । ठेन्जेन रिम्पोछे नेतृत्वमा अन्य ७ रिम्पोछेले पुजा गराइरहेका छन् । पुजामा सम्बन्ध भद्र र मन्जुश्रीको प्रार्थना गरिएको छ । 

सम्बन्धभद्रको उच्चारण १ लाख पटक हुने मोन्लम पुजा आयोजक समिति सदस्य टाक्या विष्टले बताए । पुजामा समन्तभद्र चरी, मञ्जुश्री नाम संगिति र सोह् महाप्रार्थना लाखौं पटक हुनेछ ।
नेपाल, भारत, भुटान, सिंगापुर, चीन र अमेरिका लगायत १० बढी मुलुकबाट पुजामा भिक्षु, भिक्षुणी लामा सहभागी छन् । मायादेबी मन्दिरसंगै सटेर पुर्व तर्फ भईरहेको पुजा विहान ९ बजे देखि साझ ५ बजेसम्म हुन्छ । दिउसो १२ देखि २ बजे खाना र आराम गर्ने समय दिईएकोछ । 

हिमाली बौद्ध समुदाय (लामा धर्म) का चार सम्प्रदाय मध्ये तीन ङिङ्गुपा, गेलुक्पा र काग्युप्पाले भारतमा शान्ति पुजा गर्दै आएका छन् । शाक्यपाले मात्रै लुम्बिनीमा पुजा गर्दै आएका छन् । बुद्धधर्मका धाममध्ये एक धाम मानिने जन्मस्थल लुम्बिनीमा गर्दा सबैभन्दा पुन्य प्राप्ति हुने भएकाले यहाँ गरिएको रिम्पोछे गुरु बताउँछन् । 

पुजा अवधी भर कार्यक्रम स्थलको साख्या बिहारमा ३ लाख दीप प्रज्वलन गरिनेछ । पुजामा सहभागी हुन एक हजार बढी गृहस्थ जीवन यापन गरेका उपासक उपासिका पनि आएका छन् । 

साच्चै पुजाले बुद्धकालको झल्को दिइरहेको छ लुम्बिनीस्थित राजकीय थाई बिहार प्रमुख भिक्षु सुपोत किन्नवत्तीले भने यस्ले लुम्बिनी प्रतिको आकर्षण अझ बढेको छ । 'यस्ता शान्ति, करुणा र मुदिता प्रेमी कार्यक्रम भइरहँदा लुम्बिनी प्रति विश्वको आस्था अझ बढ्छ,' उनले भने । लुम्बिनीमा हुने धार्मिक पूजामध्ये मोन्लाम नै सबैभन्दा ठूलो हो 

प्रकाशित : पुस १६, २०७३ १५:५०
पूरा पढ्नुहोस्
प्रतिक्रिया
पठाउनुहोस्