कान्टेको प्रभाव

फ्रान्सेली मिडफिल्डर एन्गोलो कान्टेले इंग्लिस प्रिमियर लिगमा कसरी गति लिइरहेका छन् त ?
राजु घिसिङ

एन्गोलो कान्टे फ्रान्सेली लिग वान क्लब काएनबाट २०१५ अगस्टमा ५६ लाख पाउन्डमा लेस्टर सिटी पुगेका थिए । क्लाउडियो रानेइरीले सम्हालेको लेस्टर अविश्वसनीय रूपमा इंग्लिस प्रिमियर लिग च्याम्पियन बन्यो ।

कान्टे, रियाद महारेज, जेमी भार्डीसहितको टिमले पूरा सिजन नै उत्कृष्ट खेल प्रदर्शन गरेको थियो । त्यसैले २०१६ जुलाईमा कान्टेलाई अनुबन्ध गर्न चेल्सीले ३ करोड २० लाख पाउन्ड तिर्नुपर्‍यो ।

गएको सिजन २०१५–१६ लेस्टर र चेल्सीका लागि ठीक उल्टो रह्यो । 
रेलिगेसनमा पर्ने अनुमान गरिएको लेस्टर च्याम्पियन परेडमा निस्कियो भने अघिल्लो सिजनको विजेता चेल्सी युरोपेली प्रतियोगितामा छनोट पनि भएन, दसौं स्थानमा सीमित भयो । सिजन नसकिँदै जोसे मोउरिन्होले लन्डन क्लब छाड्नुपरेको थियो । वास्तवमा कान्टेसहितको लेस्टर र कान्टे बिनाको लेस्टर टिममा आकाश–जमिनको भिन्नता देखिएको छ । यही खाडल पुर्न नसक्दा लेस्टरलाई रेलिगेसनको डर बढ्यो र रानेइरीलाई बर्खास्त नै गर्‍यो ।

अहिले चेल्सीको हट–सिटमा इटालियन एन्टोनियो कोन्टे छन् । उनको नेतृत्वमा चेल्सीले फेरि उत्कृष्ट लय समातेको छ । उनको टिमले ११ खेल बाँकी छँदा प्रिमियर लिगमा १० अंकको अग्रता लिइसकेको छ । अब नाटकीय नतिजा आयो भने मात्रै चेल्सी लिग च्याम्पियन हुने छैन ।

मोउरन्होले सम्हालेको म्यानचेस्टर युनाइटेडलाई सोमबार १–० ले हराएर चेल्सी एफए कपको सेमिफाइनल पनि प्रवेश गर्‍यो । निर्णायक गोलकर्ता थिए एन्गोलो कान्टे । प्रिमियर लिग च्याम्पियन भए पनि अहिले रेलिगेसन टार्न संघर्षरत लेस्टर इंग्ल्यान्डको ठूला टिमको दर्जामा पर्दैन । रसियन अर्बपति रोमन अब्रामोभिच स्वामित्वको चेल्सी भने फोब्र्सको सूचीमा विश्वकै धनाढ्य फुटबल क्लबको सूचीमा सातौंमा पर्छ ।

द ब्लुजमा उत्कृष्ट खेलाडीहरूको ठूलै घुइँचो छ । त्यसैले चेल्सी सरुवा हुँदा कान्टे सुपरस्टारहरूको बीचमा हराउने पो हो कि भन्ने डर थियो । तर, उनले त्यो भीडमा पनि आफूलाई टिमको आधारस्तम्भका रूपमा स्थापित गरेका छन् । उनी भलै गोल कम गर्छन् तर उनको खेल मिडफिल्डमा लोभलाग्दो हुने गर्छ । ‘कान्टे अहिलेको विश्व फुटबलकै सर्वोत्कृष्ट सेन्ट्रल मिडफिल्डर हुन्,’ फ्रयांक लाम्पार्डको भनाइ गार्डियनले लेखेको छ ।

कान्टेलाई लेस्टरमा छँदै एलेक्स फर्गुसनले प्रिमियर लिगकै सर्वोत्कृष्ट खेलाडी भएको बताएका थिए । फर्गुसनले म्यानेजरका रूपमा २७ वर्ष बिताएको म्यानचेस्टर युनाइटेडले समर ट्रान्सफलर २०१६ मा पउल पोग्बालाई नौ करोड पाउन्डमा अनुबन्ध गर्दै विश्वकै सबभन्दा महँगा फुटबलर बनाएको थियो । कान्टे र विश्वकै सबभन्दा महँगा फुटबलर पउल पोग्बा सोमबार एउटै मैदानमा थिए । स्टामफोर्डब्रिजमा भएको खेलमा कान्टे पूरा समय चारैतिर छाइरहेका थिए भने नौ करोड पाउन्डमा रेड डेभिल्स पुगेका पोग्बा मैदानमा हराइरहेका थिए । यी दुवै खेलाडी फ्रान्सेली हुन् ।

५ फिट साढे ६ इन्चका कान्टेले गर्ने पास, ट्याकल, क्रस सटीक हुने गर्छ । २५ वर्षीय उनी निकै मिहिनेती छन् । त्यसैले उनी भएको टिममा सेन्टर–ब्याकले कमै समस्या बेहोर्ने गर्छन् । लेस्टरमा मोर्गन र हुथलेजस्तै अहिले चेल्सीमा गेरी काहिल, सिजर अपिलिकुएटा, डेविड लुइजले विपक्षीलाई तर्साउने गरी खुलेर खेल्न पाएका छन् ।

‘कान्टेलाई जहाँ पनि देख्छु । दायाँ–बायाँ जता फर्कंदा पनि,’ चेल्सीका इडन हाजर्डले भनेका छन्, ‘जुम्ल्याहासँग खेलिरहेको जस्तो लाग्छ ।’ प्रशिक्षक कोन्टेले पनि कान्टेको खुलेर प्रशंसा गर्दै आएका छन् । ‘उनको स्टामिना र स्तर उत्कृष्ट छ । यसलाई अझ राम्रो बनाउन हामी प्रयासरत छौं,’ उनको भनाइ थुप्रै मिडियामा लेखिएको छ ।

फाइनल खेल्ने अवसर नपाए पनि कान्टे युरो कप २०१६ को उपविजेता फ्रान्सेली टिममा थिए । 

फ्रान्सको तल्लो डिभिजनको बोलोग्नेबाट फुटबलर करिअर सुरु गरेका उनी लिग वानको काएन हुँदै प्रिमियर लिग पुगेका हुन् । उनले यो सिजन चेल्सीबाट ३० खेल खेलेका छन् र त्यसमा दुई गोल गरे । उनको दुवै गोल स्टामफोर्ड ब्रिजमा भएको थियो र दुवै गोल म्यानचेस्टर युनाइटेडसँग । गोल संख्या पनि वृद्धि गर्न सके उनी वास्तवमै विश्व फुटबलका सुपरस्टार हुनेछन् । 

प्रकाशित : चैत्र ४, २०७३ १५:३२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

भर्खरै जुटेको राप्रपा काभ्रेमा विद्रोह

बहुमत समूहले अध्यक्ष घोषणा गर्‍यो
नगेन्द्र अधिकारी

काभ्रे — एकता अधिवेशबाट गठन भएको राष्ट्रिय प्रजातन्त्र पार्टी जिल्ला कार्यसमितिका बहुमत सदस्यको बैठकले उपाध्यक्ष टुल्कु लामालाई अध्यक्ष घोषणा गरेको छ । पशुपतिशमसेर राणाको प्रमुख आतिथ्यतामा भएको बैठकले उनलाई अध्यक्ष घोषणा गरेको हो । लामा तत्कालीन पशुपतिशमसेर राणा नेतृत्वको राप्रपाका जिल्ला उपाध्यक्ष हुन् ।

तत्कालीन राप्रपा नेपालका सांसद समेत रहेका जिल्ला अध्यक्ष रेशम लामा केन्द्रीय सदस्य पदमा निर्वाचित भएपछि पद खाली थियो । राप्रपा विधानमा माथिल्लो पदमा उम्मेदवारी दिए साबिकको पद स्वत: खारेज हुने व्यवस्था छ । अध्यक्षमा सर्वसम्मत हुन लामाले टुल्कु लामालाई उपाध्यक्ष र धनजीत लामालाई सचिव बनाउन लिखित सहमति गरेका थिए । सहमतिविपरीत अध्यक्ष लामाले फागुन ७ गते उपाध्यक्षमा आरजुकुमार केसी, सचिव राजेन्द्र केसी, कोषाध्यक्ष पशुपति कुमार शाह र सहसचिवमा धनजीत लामालाई मनोनित गरेका थिए ।

५० सदस्यीय कार्यसमितिमा ३४ जना आफ्नो पक्षमा रहेको टुल्कुले दाबी गरे । ४ वटा निवार्चन क्षेत्रमध्ये १ का केशव लामा, २ का चन्द्रबहादुर खड्का, ३ का गोपाल सेढाईंले टुल्कुलाई समर्थन गरेका छन् । अध्यक्ष घोषणा गरेका लामाले एकलौटि बढ्न खोजेकोले बहुमत सदस्यको बैठकबाट अध्यक्ष चयन भएको बताए । राप्रपा नेपालका तत्कालीन जिल्ला अध्यक्ष रेशम लामा समूहले पनि शनिबार छुट्टै बैठक बोलाएको छ । 

प्रकाशित : चैत्र ४, २०७३ १५:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT