ट्रम्पको नयाँ आदेश : एचवानबी भिसा कार्यक्रम पुनरावलोकन हुने

वासिङ्टन — अमेरिकी राष्ट्रपति डोनाल्ड ट्रम्पले दक्ष विदेशी कामदार अमेरिका ल्याउने भिसा कार्यक्रम (एचवानबी) पुनरावलोकन गर्न ल्याइएको नयाँ कार्यकारी आदेशमा हस्ताक्षर गरेका छन् । ‘अमेरिकी किनौं, अमेरिकीलाई राखौं’ भनिएको उक्त आदेशलाई ट्रम्पले विस्कन्सिनस्थित एउटा उद्योगको भ्रमणका क्रममा हस्ताक्षर गरेका हुन् ।

उक्त आदेशले सरकारी योजनाहरूको बोलपत्रमा विदेशी ठेकेदारहरूलाई सहभागी नगराउन सरकारी निकायलाई निर्देशन दिएको छ । 

निर्वाचन अभियानका क्रममा गरेको ‘अमेरिका फस्र्ट (अमेरिकीलाई पहिलो प्राथमिकता)’ प्रतिबद्धतालाई पूरा गर्न ट्रम्पले यो आदेश जारी गरेका हुन् । तर एचवानबी भिसा कार्यक्रम अन्त्य गर्ने ट्रम्पको पूर्वप्रतिबद्धता भने यो आदेशले पूरा गर्दैन । ट्रम्पले अमेरिकी रोजगारीका लागि विदेशी कामदार ल्याउनेसम्बन्धी कार्यक्रममा सुधारको प्रस्ताव पेस गर्न विदेश, न्याय, गृह सुरक्षा तथा श्रम मन्त्रालयहरूलाई निर्देशन दिनेछन् । यो कार्यबाट हामीले विश्वलाई ठूलो सन्देश दिएका छौं, हामीले हाम्रा कामदारको रक्षा गर्नेछौं, हाम्रा रोजगारको रक्षा गर्नेछौं र अन्त्यमा अमेरिकीलाई नै पहिलो प्राथमिकतामा राख्नेछौं,’ कार्यकारी आदेशमा हस्ताक्षर गर्नुअघि सयौं कामदारसामु ट्रम्पले भने । यो आदेशबाट सूचना प्रविधि क्षेत्रका कम्पनीहरू प्रभावित हुनेछन् । अमेरिकाको एचवानबी भिसा पाउनेमा सबैभन्दा धेरै भारतीय कामदार छन् । फेसबुकका १५ प्रतिशत कामदार पनि अस्थायी कामदार भिसामार्फत आएका थिए । भारतको सबैभन्दा ठूलो सूचना प्रविधि कम्पनी टाटा कन्सल्टेन्सीका प्रमुखले अमेरिकामा यस विषयमा भएको पछिल्लो बहस भावनामा आधारित भएको बताए । 

राष्ट्रपति कार्यालयका सञ्चार सचिव साराह सन्मेर्सले यो आदेशले अमेरिकालाई थप बलियो बनाउने विश्वास व्यक्त गरिन् । अमेरिका बनाउने अमेरिकी कामदारहरूको पक्षमा यो आदेश भएको उनको भनाइ छ ।  आदेशमा विशेष दक्षता आवश्यक पर्ने क्षेत्रमा काम गर्ने विदेशीलाई दिइने प्रवेशाज्ञासम्बन्धी कार्यक्रममा समीक्षा गर्ने उल्लेख छ । एचवानबी भिसा कार्यक्रमअनुसार, हरेक वर्ष ८५ हजार आप्रवासीलाई अमेरिकाले भिसा दिन्छ । 

आफ्नो पेसामा दक्ष भएका विदेशी कामदारलाई दिइने यो भिसामा आउने अधिकांश प्रविधि क्षेत्रका हुन्छन् । सरकारले चिठ्ठामार्फत ६५ हजार भिसा दिन्छ भने स्नातक विद्यार्थीलाई थप २० हजार भिसा दिने गर्छ । 

प्रकाशित : वैशाख ६, २०७४ १४:३९
प्रतिक्रिया
पठाउनुहोस्

मिसाइल परीक्षण निरन्तर गर्छौं : उत्तर कोरिया

युद्धमा कसैको पनि जित हुँदैन : चीन
बीबीसी

प्योङयाङ — अन्तर्रास्ट्रिय समुदायको चर्को आलोचना र अमेरिकासँग सैन्य तनाव बढे पनि उत्तर कोरियाले मिसाइल परीक्षण निरन्तर गर्ने चेतावनी दिएको छ । प्योङयाङमा बीबीसी संवाददाता जोन सुडवर्थलाई अन्तरवार्ता दिँदै उत्तर कोरियाली उपविदेशमन्त्री हान सङ र्‍योलले परीक्षणलाई निरन्तरता दिने बताएका हुन् ।

‘हामी साप्ताहिक, मासिक र वार्षिक रूपमा थप मिसाइल परीक्षणहरू गर्नेछौं,’ उनले भने । हानले अमेरिका सैन्य कारबाहीमा उत्रिए युद्धको परिस्थिति सिर्जना हुने पनि बताए ।

उनले अमेरिकाले आफ्नो देशविरुद्ध सैन्य आक्रमण गर्ने योजना बनाए आफूहरूले आफ्नै शैली र तरिकाले पहिल्यै आणविक आक्रमण गर्ने चेतावनी दिए । उपविदेशमन्त्री हानले आफ्ना आणविक हतियारहरूले अमेरिकी सैन्य कारबाहीको खतरालाई सामना गर्नेमा उत्तर कोरियाको विश्वास रहेको पनि बताए । दक्षिण कोरिया भ्रमणमा रहेका अमेरिकी उपराष्ट्रपति माइक पेन्सले सोमबार मात्र उत्तर कोरियालाई थप मिसाइल परीक्षण नगर्न चेतावनी दिँदै अमेरिकाको धैर्य समाप्त भएको बताएका थिए ।

एसिया भ्रमणका क्रममा मंगलबार टोकियो पुगेका पेन्सले उत्तर कोरिया शासन यस क्षेत्रकै लागि ‘सबैभन्दा अनिष्टकारी खतरा’ रहेको बताए । यसैबीच, राष्ट्रसंघमा सोमबार आयोजित पत्रकार सम्मेलनमा राष्ट्रसंघका लागि उत्तर कोरियाली स्थायी प्रतिनिधि किम इन–र्‍योङले रासायनिक आक्रमणको आशंकामा अमेरिकाले सिरियाली एयरबेसमा गरेको मिसाइल आक्रमणको भत्र्सना गरे । उनले अमेरिकाले विश्व शान्ति र स्थायित्वलाई खल्बलाइरहेको आरोप लगाउँदै सार्वभौम मुलुकहरूमा हस्तक्षेप अस्वीकार्य हुने बताए ।

युद्धमा कसैको पनि जित हुँदैन : चीन
चीनले कोरियाली प्रायद्वीपमा जारी तनाव कूटनीतिक माध्यमबाट अन्त्य गर्नुपर्ने बताएको छ । बेइजिङमा आयोजित नियमित पत्रकार सम्मेलनमा चिनियाँ विदेशमन्त्री
वाङ यीले सबै पक्षले शान्तिपूर्ण समाधान खोज्नुपर्ने बताए ।

‘यदि साँच्चै युद्ध भएमा त्यसले धेरै क्षति निम्त्याउनेबाहेक अरू परिणाम दिँदैन, कसैको पनि जित हुँदैन,’ वाङले भने । उनले औपचारिक या अनौपचारिक, एउटा च्यानल या धेरै च्यानल, बहुपक्षीय या द्विपक्षीय जसरी भए पनि हुने वार्तालाई चीनको सहयोग र समर्थन रहने पनि बताए ।

प्रकाशित : वैशाख ६, २०७४ १४:३९
पूरा पढ्नुहोस्
प्रतिक्रिया
पठाउनुहोस्