बेलायतले सम्पत्ति शुद्धीकरण नियममा थप कडाइ गर्ने

कान्तिपुर संवाददाता

लन्डन — बेलायत सरकारले अपराधीहरुले प्रयोग गरिरहेका कानुनी छिद्र बन्द गर्ने गरि मनी लाउन्डरिङ नियम कार्यन्वयनका लागि वाचडग निकाय शुरु गर्ने भएको छ । सन् २०१८ जनवरीदेखिसम्पत्ति शुद्धीकरण (मनी लाउन्डरिङ) र आतंकवादीले प्रयोग गर्नेआर्थिक श्रोतको बढ्दो समस्या निराकरणका लागि वाचडग निकाय क्रियाशील गराउनलागिएको हो ।

बेलायत सरकारले अन्तर्राष्ट्रिय मापदण्ड अनुरुप मनी लाउन्डरिङ नियम कडा गर्ने जनाएको छ । अर्थ मन्त्रालय, फाइनान्सियल कन्डक्ट अथोरिटी,ग्याम्बलिङ (जुवा ब्यवसाय) कमिसन लगायत २२ वटा अकाउन्टेन्सी र कानुनी ब्यापार निकायहरुले मनी लाउन्डरिङ नियमको निरिक्षण गर्नेछन् ।

कानुनकाछिद्रलाई टेकेर अपराधीहरुले गर्न सक्ने दुरुपयोग मध्य नजर राखी यस्तो वाचडग बनाइएको बेलायती अर्थ मन्त्रालयले जनाएको छ । बेलायती मन्त्रीहरुले मनी लाउन्डरिङको कुनै सुपरिवेक्षण निकाय असफल भए जरिवाना दिनसक्ने अवधारणा अनुरुप यस्तो निकाय खडा गरिएको बताएका छन् । यस वाचडगले मनी लाउन्डरिङ नियम सरलीकरण गरि विभिन्न क्षेत्रमा कार्यन्वयन गर्नेछ । सम्पत्ति शुद्धीकरण र आतंकवाद फाइनान्सको मामिलामा बेलायत सरकारले शुन्य सहनशीलताको नियम थप सशक्त बनाउने बेलायतको अर्थ मन्त्रालयले जनाएको छ ।

अहिले बेलायतमा सम्पत्ति शुद्धीकरण नियम अनुगमन गर्ने फाइनान्सियल कन्डक्ट अथोरिटीले मनी लाउन्डरिङ नियम उल्लंघन गर्ने बैंक तथा वित्तीय संस्थाहरुलाई कानुनी दायरामा ल्याउन थप कदम चाल्ने बताएको छ । यस अथोरिटीले हालै बेलायती बैंकहरु एचएसबिसी र बैंक अफ स्कटल्याण्डले रसियन धनाढ्यहरुले गरेका करिब दुई हजार कारोबारमा करिब ७८ करोड पाउन्डबारे जानकारी मागेको जनाएको छ ।

बेलायतमा अवैध रुपले भित्रिएको नगद कारोबारको अनुसन्धानक्रम उच्च (रेकर्ड लेबल) रुपमा बढेको छ । बेलायतको राष्ट्रिय अपराध एजेन्सीले वर्षमा करिब ९० अर्ब पाउण्ड गैर कानुनी रुपमा नगदकारोबार हुने गरेको जनाएको लन्डनस्थित अर्थ व्यवस्थापन बिज्ञ विकलचन्द्र आचार्यले बताए । बढ्दो आतंककारी क्रियाकलाप साथै गैर कानुनीरुपमा बढिरहेको नगद कारोबार नियन्त्रण गर्न बेलायती अधिकारीहरुले थप कडाइ
गर्नेदेख्छन् आचार्य ।

मनी लाउन्डरिङ अपराधीहरुले पैसावा सम्पतिको स्वामित्व ढाकछोप गरि अपराधिक क्रियाकलाप गर्न उक्त पैसा नियन्त्रण गर्ने र यस्तो कार्य कानुनीरुपमा नै भएको जस्तो देखाउने गर्छन् ।

अपराधीहरुले यस्तो कार्य अनेक झुटको आडमा सत्यता जस्तो देखाउँदै अर्बौं डलर बैंक तथा वित्तीय संस्थाहरुमार्फत उपयोग गर्न सफल भइरहेका छन् । वित्तीय संस्थाहरुले अर्काको स्वामित्वमा रहेको पैसा तथा सम्पतिको व्यवस्थापन र नियन्त्रणआफ्नो साथ राख्ने हुंदा दुरुपयोग हुने अधिक सम्भावना रहन्छ । आम्दानीको श्रोत तथा व्यक्तिको परिचयपत्र अनिवार्य राख्नुपर्ने भन्ने अन्तर्राष्ट्रिय कानुनी मान्यतालाई सबै देशले गम्भीर रुपमा अंगाल्नु पर्ने आवश्यकता देख्छन् आचार्य ।

युरोपियन युनियन (ईयू) देशहरुमा चौथो मनी लाउन्डरिङ निर्देशिकासन् २०१५, जुन १ देखि तयार गरी दुईवर्ष भित्र सबै ईयू देशमा लागू गर्नुपर्ने प्रावधान क्रियाशिल छ ।

भ्रष्टाचार, अपराध तथा आतंकवादको फाइनान्स र मनी लाउन्डरिङबीच सिधा सम्बन्ध रहने भएकाले वित्तिय पारदर्शीता ल्याउन मनी लाउन्डरिङ नियमको आवश्यकता सबै देशका निकायले बुझ्न अत्यन्त खांचो रहेको विश्लेषकहरुको राय छ ।

प्रकाशित : भाद्र २६, २०७४ १७:२५
ADVERTISEMENT
प्रतिक्रिया
पठाउनुहोस्
ADVERTISEMENT

सृजनालाई मिस यूके नेपाल ताज

कान्तिपुर संवाददाता

लन्डन — मिस यूके नेपाल ०१७ को छैटौं संस्करण सृजना गुरुङले जितेकी छन् । आइतबार अबेर बेलायतको अल्डरसटस्थित एम्पायर हलमा सम्पन्न प्रतिष्पर्धामा अन्य ७ सुन्दरीलाई उछिनेर सृजनाले मिस यूके नेपाल ताजसहित आठसय पाउण्ड पाइन् ।

उनलाई गत वर्षकी विजेता टेनिसा रानाले ताज लगाइदिएकी थिइन् । सृजनाले मिस इन्टेलेक्चुअल टाइटिल समेत जितेकी छन् । हाल लन्डन बस्ने पोखरा स्थायी घर भएकी २४ वर्षीया सृजना बायो मेडिकल साइन्सकी विद्यार्थी हुन् ।

पिपल मोर्गेजेज मिस यूके नेपाल प्रतियोगितामा फष्ट रनर अप सुजना पुन र सेकेन्ड रनरअप लिसा सुनार भए । ६ अन्य सबटाइटल अन्तर्गत एलिन गर्बुजाले मिस पब्लिक च्वाइस, मिस पर्सनालिटी र ब्युटी वीथ दि परपोज गरि तीन उपाधि जितिन् भने लिसा सुनार मिस टयालेन्ट भइन् ।

प्रतियोगिताको निर्णायकमा कृष्ण भट्ट, विमला सेने, गायक आनन्द कार्की, दुर्गा गुरुङ र डा. रेणुका गुरुङ थिए ।

कार्यक्रमका प्रमुख अतिथि दूतावासका उपनियोग प्रमुख शरदराज आरणले प्रवासमा नयाँ प्रतिभाको खोजी गरिनु सरहानीय भएको बताउँदै यसले नेपाली कला संस्कृति र भाषाको जगेर्ना समेत गर्ने धारणा राखे ।

प्रतिष्पर्धीलाई प्रशिक्षण दिन महिना दिन यता बेलायत रहेकी पूर्व मिस नेपाल माल्भिका सुब्बाले सबै ८ प्रतियोगीले नै उपाधि जितेको बताइन् । ‘शुरुमा उनीहरु बोल्न समेत लजाउने स्वभावका थिए’, माल्भिकाले भनिन्, ‘तर प्रतियोगिताको अन्तिम दिनसम्म आइपुग्दा प्रतियोगीमा जसरी आत्मबल बढ्यो त्यो नै जित हो ।’ माल्भिकाले विजयी सुन्दरीहरुलाई सामुदायिक सेवामा लाग्न पनि सुझाइन् ।

इभेन्टस एण्ड आइडियाज प्रोडक्सनले सन् २०१० देखि मिस यूके नेपाल प्रतियोगिता आयोजना गर्दै आएको छ ।

प्रोडक्सनकी निर्देशक शान्ति गुरुङले स्वागत मन्तव्य व्यक्त गर्दै नयां प्रतिभाहरुलाई अवसर दिने आफूहरुको प्रयास रहेको बताइन् । निलम गुरुङले संयोजन गरेको उक्त कार्यक्रममा विभिन्न नाच र गायन समेत प्रस्तुत गरिएको थियो ।

प्रकाशित : भाद्र २६, २०७४ १७:२५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT