थप ३ देशका नागरिकलाई अमेरिका पस्न रोक

ह्वाइटहाउसले नयाँ प्रतिबन्ध विदेशी सरकारले उपलब्ध गराएका सूचनाका आधारमा समीक्षा गरेपछि लगाइएको बताएको छ । यसअघि अमेरिकाले इरान, लिबिया, सिरिया, सोमालिया र यमनका नागरिकलाई प्रवेशमा रोक लगाएको थियो, जसलाई ‘मुस्लिम प्रतिबन्ध’ को रूपमा लिइएको थियो ।

प्रतिबन्धको घोषणा गर्दै राष्ट्रपति डोनाल्ड ट्रम्पले सुरक्षाका कारण पछिल्लो निर्णय गरिएको दाबी गरे । ‘मेरो पहिलो प्राथमिकता अमेरिका सुरक्षित बनाउनु मेरो पहिलो प्राथमिकता हो,’ उनले भने, ‘जो अमेरिकाका लागि असुरक्षित महसुस हुन्छ, उनीहरूलाई हामी आउन दिँदैनौं ।’

भेनेजुएलाका लागि लगाइएको प्रतिबन्ध सरकारी एजेन्सीमा काम गर्ने अधिकारी र परिवार लक्षित रहेको अमेरिकाले जनाएको छ । यसअघि ट्रम्पले प्रतिबन्ध लगाएका ६ मुस्लिम देशमध्ये सुडानको फुकुवा गरिएको छ । उत्तर कोरिया र भेनेजुएला थपिएपछि अब यात्रा प्रतिबन्ध लगाएका सबै मुलुकहरू मुस्लिम बहुल रहेनन् । अधिकारीले हाल अमेरिका भ्रमण गर्ने उत्तर कोरियाली नागरिक अत्यन्त न्यून रहेको जनाएका छन् ।

मानव अधिकारवादी संस्था एम्नेस्टी इन्टरनेसनलले अमेरिकी कदमको निन्दा गरेको छ । विज्ञप्ति जारी गर्दै उसले अमेरिकी सरकारको विभेदकारी निर्णयको विपक्षमा रहेको जनाएको छ । प्रतिबन्ध अक्टोबर १८ देखि कार्यान्वयनमा आउने जनाउँदै ह्वाइटहाउसले प्रवेशाज्ञा पाइसकेकालाई निषेध नगरिने जनाएको छ ।