टर्किस फौज सिरिया प्रवेश 

यसअघि टर्कीले सिरियाको उत्तरी क्षेत्रमा कुर्दिस लडाकुमाथि हवाई हमला गरेको थियो । उक्त कदमले टर्की र अमेरिकाबीच तनाव बढाउन सक्ने बताइएको छ । टर्की आफ्नो दक्षिणी सीमासँग जोडिएको आफ्रिन क्षेत्रबाट कुर्दिस वाईपीजी लडाकुलाई कुनै हालतमा धपाउने बताउँदै आएको छ ।

उसले वाईपीजीलाई ‘आतंकवादी’ को संज्ञा दिँदै आएको छ । तर अमेरिकाले भने वाईपीजीलाई समर्थन जनाउने गरेको छ । टर्कीको पछिल्लो हवाई आक्रमणमा कम्तीमा ९ जना वाईपीजी सदस्य मारिएको अन्तर्राष्ट्रिय सञ्चार माध्यमले उल्लेख गरेका छन् ।

यसैबीच, सिरियामा स्थायित्व र शान्ति स्थापना गर्ने विषयमा रुसी विदेशमन्त्री सेर्गेई ल्याभरोभ र उनका अमेरिकी समकक्षी रेक्स टिलरसनबीच टेलिफोन वार्ता भएको छ । उनीहरूबीच सिरियामा जारी ५ वर्ष लामो युद्ध अन्त्य गर्नेबारे छलफल भएको रुसी विदेश मन्त्रालयले जनाएको छ ।