प्रेमको परिणाम : अष्ट्रेलियाका उपप्रधानमन्त्रीद्वारा राजीनामा

जोयस आफ्नै पार्टी कार्यालयमा काम गर्ने पूर्व कर्मचारीसँगको प्रेम सम्बन्धका कारण चर्चामा रहेका

थिए । शुक्रबार पत्रकार सम्मेलन गर्दै उनले यँही सोमबार हुने पार्टीको बैठकबाट आफुले पार्टी प्रमुखबाट राजीनामा दिने जानकारी दिएका हुन् । उपप्रधानमन्त्री जोयसको आफ्नै पार्टी कार्यलयमा काम गर्ने एक पुर्व महिलासँगको प्रेम सम्बन्ध करिब ३ साताअघि सार्वजनिक भएको थियो । ती पुर्व कर्मचारी जोयसको बच्चाको आमा बन्न लागेको सार्वजनिक भएपछि उनी आलोचित बनेका थिए । विपक्षी तथा आफ्नै दलका केही नेताहरुले समेत उनले राजीनामा दिनुपर्ने माग गर्दै आएका थिए ।

जोयसले अहिले कार्यवाहक अध्यक्ष रहेका माथियस कोरम्यानलाई आफुले पदबाट राजीनामा दिने बिषयमा जानकारी दिइसकेको बताएका छन् । उनले पार्टी प्रमुख तथा उपप्रधानमन्त्रीबाट राजीनामा दिएपनि सांसदका रुपमा भने रहनेछन् । उनी केही महिनाअघि दोहोरो नागरिकता काण्डमा सांसद पद गुमाएर पुन सोही स्थानबाट निर्वाचित बनेका हुन् । उनी प्रमुख रहेको नेशनल पार्टी अहिले अष्ट्रेलियामा गठन भएको सरकारको मुख्य सत्ता साझेदार पार्टी हो ।

यसैगरी जोयसमाथि पश्चिम अष्ट्रेलियाकी एक महिलाले पनि यौन उत्पीडनको आरोप लगाएकी छन् । तर उपप्रधानमन्त्री जोयसले भने आरोप झुठो भएको र पुर्णरुपमा अनुसन्धान गरिनुपर्ने बताएका छन् ।

जोयसको राजीनामाप्रति विपक्षीहरुले राम्रो तर ढिलो भएको बताएका छन् । विपक्षी दलका नेता विल सर्टनले यँही विषयले सरकारसँगै समग्र देशलाई नै क्षति पुऱ्याएको प्रतिक्रिया दिएका छन् । ग्रिन पार्टीका नेता रिचार्ड डिनतालीले जोयसको राजीनामा ढिलो आएको प्रतिक्रिया दिएका छन् । उनले साताअघि नै राजीनामा दिइनुपर्ने बताए । उनले अब जोयसको समस्याभन्दा पनि आफ्नो देशको समस्याका बारेमा छलफल गर्नुपर्ने समेत बताए ।