अादिवासी युवा हत्या गरेकाे अभियाेगमा २ पक्राउ
केरला — भारतको केरला राज्य स्थित पलक्कड जिल्लामा एक आदिवासी युवाको हत्या गरेको अभियागमा प्रहरीले दुई जनालाई पक्राउ गरेको छ । हत्या गर्नुअघि सामाजिक सञ्जालमा सेल्फी खिचेर पोष्ट गरेपछि प्रहरीले उनीहरुलाई पक्राउ गरेको हो ।
प्रहरीले घटनामा संलग्न अन्यको खोजी कार्य जारी राखेको छ ।
मधु नाम गरेका ती व्यक्तिलाई गत बिहीबार स्थानीयले चोरीको आरोपमा बाँधेर मरणासन्न हुने गरी कुटपिट गरेका थिए । उपचारका लागि अस्पतालमा लैजाने क्रममा ती युवाको मृत्यु भएको प्रहरीले जनाएको छ ।
सामाजिक सञ्जालमा पोष्ट गरिएको उक्त सेल्फीको फोटो र भिडियो भारतभरी भाइरल भएको थियो ।
सो घटनालाई लिएर केरेलाका चर्चित कलाकार म्यामोटिले निन्दा गरेका छन् । उनले आफ्नो फेसबुकमा लेखेका छन्, ‘मधुको मृत्युको हाम्रो शासन प्रणाली जिम्मेवार छ । एउटा नियम जसले मानिसलाई बाँधेर मार्ने फैसला गर्छ,एउटा व्यक्ति जसले अर्को व्यक्तिलाई मार्छ ऊ मानव हुन सक्दैन । अनि कसरी हामी हामीलाई नै आधुनिक र प्रगतिशिल घोषणा गर्छौँ । ’
राज्यका मुख्यमन्त्री पिनारयी भिजेयानले घटनामा संलग्न हुनेलाई कडा कारवाही हुने बताएका छन् ।
आदिवासी अभियन्ता धन्य रमनले बीबीसीलाई यस्तो अवस्थामा सेल्फी खिचेर सामाजिक सञ्जालमा पोष्ट गर्नु झन् खराब भएको बताए ।