शान्ति वार्ताका लागि किम दक्षिण कोरियामा
कोरिया — एक महिना अघिसम्म युद्धको संघारमा रहेको कोरियन प्रायद्वीपमा एकपछि अर्को गर्दै शान्तिको लहरहरु उठ्न थालेका छन् । विश्वलाई आश्चर्यचकित पार्दै उत्तर कोरियाका सर्वोच्च नेता किम जोङ उनले शान्ती वार्ता गर्नका लागि पहिलो पटक सैनिक रेखा पार गर्दै दक्षिण कोरियामा प्रवेश गरेका हुन् ।
किमलाई स्वागत गर्नका लागि दक्षिण कोरियाका राष्ट्रपति मुन जे इन सीमा रेखा नजिकै पुगेका थिए । हात मिलाएर उत्तर कोरियाका नेता किमलाई स्वागत गरेसँगै उनले दक्षिण कोरियाका नेतालाई केही छिनका लागि भए पनि सैनिक सीमा रेखा पार गरेर उत्तर कोरियाको जमिनमा खुट्टा राख्न आग्रह गरेका थिए । राष्ट्रपति इनले पनि मुस्कुराउँदै सीमा पार गरी उत्तरको जमिनमा टेकेका थिए ।
त्यसलगत्तै किमलाई दक्षिण कोरियाको सेनाले विशेष सलामीसहित 'गार्ड अफ अनर' दिएको थियो ।
निकै हसिलो मुद्रामा देखिएका दुवै नेताले गार्ड अफ अनरको अवलोकन पछि सामूहिक तस्बिर खिचाएर वार्तास्थल तर्फ लागेका थिए ।
वार्ताको बिहानी सत्र सकिएको छ । दुई नेताहरुबीच निकै सौहार्दपूर्ण वातावरणमा वार्ता भएको बताइएको छ । उनीहरुबीच शान्ती सम्झौता लगायत आणवीक कार्यक्रमका बारे पनि छद्यफल हुने बताइएको छ ।
दुई कोरिया विभाजित भए यता किम दक्षिण कोरिया पुग्ने पहिलो उत्तर कोरियाली नेता हुन् ।
प्रकाशित : वैशाख १४, २०७५ १०:४५