इजिप्टको राष्ट्रपतिमा पुन: अल–सीसी

बीबीसी

कायरो — इजिप्टका राष्ट्रपति अब्देल फतेह अल–सीसीले दोस्रो कार्यकालका लागि आइतबार शपथ लिएका छन् । शपथलगत्तै उनले ‘हिंसा, आतंकवाद र अतिवादविरुद्ध’ लड्ने प्रतिबद्धता जनाएका छन् ।

गत मार्चमा भएको निर्वाचनमा अल–सीसी ९७ प्रतिशत मतसहित विजयी भएका थिए । चुनावमा ४१ प्रतिशत मात्र मतदान भएको थियो ।

शपथ ग्रहण समारोहको समयमा इजिप्टको संसदीय भवनमाथि लडाकु विमानहरूले गस्ती गरेका थिए । अल–सीसी शपथका लागि संसद् भवनतर्फ जाँदै गर्दा लडाकु विमानहरूले राष्ट्रिय झन्डाका रंगहरू मिश्रित धूवाँ उडाउँदै प्रदर्शन गरेका थिए ।

Yamaha

शपथलगत्तै सीसीले आफूले जहिले पनि इजिप्टका जनताका लागि ‘समान स्थान कायम गर्न लागिपर्ने’ बताए । इजिप्टको उत्तरी क्षेत्र सिनाईमा विभिन्न जिहादी आक्रमणमा सयौं सैनिक तथा सर्वसाधारणले ज्यान गुमाइसकेका छन् ।

त्यसतर्फ संकेत गर्दै सीसीले ‘सबैजना एकत्रित भए आर्थिक, सामाजिक र राजनीतिक चुनौती तथा त्यसको नकारात्मक प्रभाव अन्त्य गर्न सफल हुने’ बताए । सन् २०१३ मा निर्वाचित राष्ट्रपति मोहम्मद मोर्सीविरुद्ध आन्दोलन सुरु भएपछि सैनिक आडमा सीसीले सत्ता कब्जा गरेका थिए । उनी सेनाका अवकाशप्राप्त फिल्ड मार्सल हुन् ।

मानव अधिकारवादीहरूले सीसीले ठूलो संख्यामा विपक्षीलाई पक्राउ गरी थुनामा राखेको आरोप लगाउँदै आएका छन् । उनीहरूले दर्जनौं व्यक्तिहरू झूटो समाचार सम्प्रेषण गरेको तथा गैरकानुनी समूहसँग आबद्ध भएको आरोपमा पक्राउ गरिएको बताएका छन् ।

प्रकाशित : जेष्ठ २१, २०७५ ०८:५५
ADVERTISEMENT
प्रतिक्रिया
पठाउनुहोस्
ADVERTISEMENT

करको त्रासले नेप्से घट्यो

बोनस र हकप्रद सेयरमा पनि अंकित मूल्यकै आधारमा कर तिर्न विभागको निर्देशन
‘हकप्रद वा बोनस पाउनका लागि लगानीकर्ताले बजारमा ठूलो मूल्य चुकाएका हुन्छन् भन्ने तथ्य विभागले बिर्सिएको छ’
कान्तिपुर संवाददाता

काठमाडौँ — आन्तरिक राजस्व विभागले बोनस र हकप्रद सेयरको लागत मूल्य गणना गर्दा सेयरको अंकित चुक्ता मूल्यलाई लागत मानेर कर असुली गर्न निर्देशन दिएपछि बजार ओरालो लागेको छ ।

सेयर कारोबार मापक नेप्से परिसूचक आइतबार करिब ३४ अंकले घट्यो । उक्त दिन कारोबारमा आएकामध्ये उत्पादन तथा प्रशोधनबाहेक सबै समूहको परिसूचक घटेपछि समग्र नेप्से ३३.७१ अंकले घटेको हो ।


‘विभागको निर्देशनले लगानीकर्तालाई त्रसित बनाएको छ,’ एक सेयर दलालले भने, ‘अब पहिलेको तुलनामा धेरै कर तिर्नुपर्ने उनीहरूको बुझाइ छ ।’ विभागले शुक्रबार धितोपत्र बोर्ड, नेपाल स्टक एक्सचेन्ज र सीडीएस एन्ड क्लियरिङलाई पत्र पठाएर यस्तो निर्देशन दिएको हो ।


आय कर ऐन ०५८ को व्यवस्थालाई उद्धृत गर्दै विभागले सोही विधिअनुसार अग्रिम कर असुली गर्न/गराउन पत्र पठाएको छ । यो निर्देशनपछि अब लगानीकर्ताले बोनस र हकप्रद सेयरमा पनि अंकित मूल्यका आधारमा अग्रिम कर बुझाउनुपर्ने भएको छ । यसअघि अर्थ मन्त्रालयको निर्देशनमा बोनस र हकप्रदको समायोजित मूल्यका आधारमा पुँजीगत लाभ कर काटिँदै आएको थियो ।


विभागको निर्देशनले बजार धेरै प्रभावित हुने भएकाले आउँदा दिनहरूमा पनि नेप्से परिसूचक बढ्ने सम्भावना न्यून बन्दै गएको अर्का ब्रोकरले बताए । ‘यो व्यवस्थाले लगानीकर्तालाई ठूलो मर्का पर्छ,’ ती ब्रोकरले भने, ‘पुराना लगानीकर्ताको आत्मबल घट्छ भने नयाँ लगानीकर्ता उत्साहित हुँदैनन् ।’


उनका अनुसार लगानीकर्ताले बोनस तथा हकप्रद सेयरमा लगानीकर्ताको लागत सय रुपैयाँ मात्र हुन्छ भन्ने बुझाइका कारण विभागबाट यस्तो निर्देशन आएको हो । ‘हकप्रद वा बोनस पाउनका लागि लगानीकर्ताले बजारमा ठूलो मूल्य चुकाएका हुन्छन् भन्ने तथ्य विभागले बिर्सिएको छ,’ उनले भने ।

सरकारले बजेटमार्फत व्यक्तिगत लगानीकर्ताले तिर्ने पुँजीगत लाभकरको सीमा साढे २ प्रतिशत विन्दुले बढाएको छ । तर, संस्थागत लगानीकर्ताले तिर्ने लाभरको सीमा दस प्रतिशत नै कायम राखेको छ भने ‘अन्य लगानीकर्ता’ नामक नयाँ शीर्षक खडा गरेको त्यो समूहमा पर्ने लगानीकर्तालाई २५ प्रतिशतका दरले पुँजीगत लाभकर तोकेको छ ।


आगामी आर्थिक वर्षको बजेटमार्फत सरकारले पुँजीगत लाभकर घटाएकाले आइतबार सेयर बजार घटेको ब्रोकरहरूले बताएका छन् । अघिल्ला दिनहरूमा सामान्य अंकले घटबढ भइरहेको सेयर बजार आइतबार करिब ३४ अंकले घट्नुको प्रमुख कारण सरकारको कर नीति रहेको उनीहरूको दाबी छ ।

सरकारले बजेटमार्फत व्यक्तिगत लगानीकर्ताले तिर्ने पुँजीगत लाभकरको सीमा बढाएर साढे ७ प्रतिशत पुर्‍याएको छ । यसअघि व्यक्तिगत लगानीकर्ताले ५ प्रतिशतका दरले यस्तो कर तिर्दै आएका थिए ।


अघिल्लो दिनको तुलनामा आइतबार साढे २ प्रतिशतले घट्यो । कारोबार रकम भने बढेको छ । दिनभरको कारोबारमा ५४ करोड ६६ लाख रुपैयाँ बराबरको सेयर कारोबार भएको छ । करिब साढे ६ हजार कारोबारबाट १ सय ६५ कम्पनीका ९ लाख ५७ हजार ३ सय ३८ कित्ता सेयर किनबेच हुँदा करिब साढे ५४ करोड रुपैयाँ परिचालन भएको हो ।

उक्त दिन बिमा समूहको परिसूचक सबैभन्दा बढी ४.२५ प्रतिशतले घट्यो । यसैगरी, होटल, लघुवित्त, बैकिङ, विकास बैंक, जलविद्युत् र ‘अन्य’ समूहले पनि बिमा समूहलाई नै पछ्याएपछि बजारमा नकारात्मक प्रभाव परेको हो । आइतबार उत्पादन तथा प्रशोधन समूहको परिसूचक भने १.५५ प्रतिशतले बढेको छ ।

प्रकाशित : जेष्ठ २१, २०७५ ०८:३९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT