ग्वाटेमालमा ज्वालामुखी विस्फोटबाट मृत्यु हुनेको सङ्ख्या ६५ पुग्याे

रासस/एएफपी

ग्वाटेमाला सिटी, ग्वाटेमाला — ग्वाटेमालमा भएको भीषण ज्वालामुखी विस्फोटमा परी ज्यान गुमाउनेको सङ्ख्या ६५ पुगेको छ । राजधानी शहरनजिकै अवस्थित स्थानमा एक शताव्दियताकै शक्तिशाली विस्फोट भएको पुष्टि गरिएको छ ।

ग्वाटेमालाको एल रोडियो क्षेत्रमा भएको ज्वालामुखी विस्फोटपछि देखिएको धुवाँको मुस्लो । तस्बिर : एजेन्सी

उक्त स्थानमा यस वर्षमात्र दुई पटकसम्म ज्वालामुखी विस्फोट भएको अधिकारीहरुले जनाएका थिए।

Yamaha

मध्य अमेरिकी देश ग्वाटेमालाको विपद्सम्बन्धी निकायले फोएगो ज्वालामुखी भन्दा तल रहेका भिरालो क्षेत्रमा शवहरू फेला परेकाे र दर्जनौँ मानिसहरू हराइरहेकाे जानकारी दिएको छ।

ग्वाटेमाला सिटीभन्दा ३५ किलोमिटर पर रहेको उक्त क्षेत्रमा तीव्र वेगमा तातो खरानी र लाभाबाट जोगाउने क्रममा चार हजार भन्दा बढी व्यक्तिलाई उद्धार गरिएको जनाइएको छ।

उद्धार गरी सुरक्षित स्थानमा पुर्‍याइएका कैयौं व्यक्तिहरूले आफ्ना आफन्त हराइरहेकाे बताएका छन्।
त्यसमा परी अरु करिब ४६ व्यक्ति घाइते भएका र ती मध्ये प्रायःको अवस्था चिन्ताजनक भएको बताइएको छ।

आइतबार राति भएको याे प्रकोपमा परी कम्तीमा पनि १७ लाख व्यक्ति प्रभावित भएका बताइएको छ। ती मध्ये ३ हजार २७१ व्यक्तिलाई १ हजार ७८७ शरणार्थी स्थलमा सारिएको बताइएको छ।

सुरुमा यस प्रकोपमा परी मृत्यु हुने व्यक्तिको सङ्ख्या २५ भएको बताइएको थियो। पछि सो सङ्ख्या बढेर ६५ पुग्यो अझै पनि व्यक्ति हराइरहेका र घाइते मध्ये पनि कैयौको अवस्था चिन्ताजनक भएकाले मृतकको सङ्ख्या बढ्न सक्ने अनुमान गरिएको छ।

यहाँको सेना र प्रहरीले उद्धारको काम जारी राखेका छन्। उनीहरुकाे सहयोगमा ठूलो सङ्ख्याका स्थानीयलाई पनि अन्यत्रै सारिएको छ।

उद्धारकर्ताले उक्त पहाडी क्षेत्रमा अकस्मात ज्वालामुखीको गतिविधि बढेको र खरानीको मुस्लोका कारण दिउँसोको नै रातिको दश बजे जस्तो लागेको बताएका छन्।
ज्वालामुखी विज्ञ जेनिन क्रिपनरले फोएगो एकदमै सक्रिय ज्वालामुखी भएको त्यहाँ खुकुलो प्रकृतिका ज्वालामुखीबाट निस्कने बस्तुहरू रहेका बताए।उनले भीषण पानी परेको अवस्थामा यस्ता ज्वालामुखीबाट एकदमै ठूलो परिमाणमा भग्नावशेष र चट्टानसहितको भेल बाहिर बग्ने गर्छ जुन एकदमै खतरनाक र घातक हुनसक्ने जानकारी दिएका छन्।

Esewa Pasal

प्रकाशित : जेष्ठ २२, २०७५ १२:४२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

भन्सार नाका पार गरेर भारत लैजाँदै गरेकाे १२ टन मरिच बरामद

भूषण यादव

वीरगन्ज — मुलुकमा आयात निर्यात हुने प्रमुख नाका वीरगन्ज भन्सारबाटै मरिच भारत तस्करी भएको पाइएको छ । विशेष सुचनाको आधारमा पर्सा प्रहरीले सोमबार राति भन्सार गेट पार गरेर भारततर्फ गइरहेको ट्रकलाई नियन्त्रणमा लिएर चेकजाँच गर्दा ठूलो परिमाणमा मरिच बरामद भएको हो । 

युपी ७८ बीटी ३८०४ नम्बरको ट्रकलाई जिल्ला प्रहरी कार्यालय र इनर्वा प्रहरी चौकीको टोलीले शंकराचार्य गेट नजिकैबाट नियन्त्रणमा लिएको थियो । ट्रकबाट १२ टन भन्दा बढी मरिच बरामद भएको छ ।

वीरगन्ज भन्सार गेट पार गरेर दक्षिणतर्फ गइरहेको उक्त ट्रकलाई वीरगन्ज र भारतको रक्सौल जोड्ने मितेरी पुल अगाडिबाट नियन्त्रणमा लिएको प्रहरीले जनाएको छ । प्रहरी उपरीक्षक रेवती ढकालले भारतीय नम्बरको ट्रकमा मरिच लोड गरी मुख्य नाकाबाटै भारत लगिरहेको सूचना आएको बताए । सूचनाकै आधारमा प्रहरीले नाकामा प्रत्येक भारतीय गाडीको चेकजाँच गरेको थियो । उक्त ट्रकबाट १२ टन दुइ सय किलो मरिच बरामद भएको एसपी ढकालले बताए । ‘युपी र झारखण्ड नम्बरको १० चक्के ट्रकमा मरिच लोड भएर भारततर्फ गइरहेको सूचना आएको थियो,’ एसपी ढकालले भने, ‘मरिच लोड भएको ट्रक नियन्त्रणमा लिन नाकामा प्रहरीले विशेष निगरानी बढाएको थियो ।’ भारतको उत्तर प्रदेश कानपुर जिल्लाका बासिन्दा ट्रकचालक धर्मेन्द्र कुमारलाई प्रहरीले नियन्त्रणमा लिएर थप अनुसन्धान थालेको छ । एकदिन अगाडि आलु लिएर आएको ट्रकमा फर्कने बेला छाला भनेर मरिच लोड गरिएको चालकले बताएका छन् ।

वीरगन्जको बाइपास रोडमा अर्को ट्रकबाट मरिचको बोरा लोड गरिएको उनले प्रहरीलाई बयान दिएका छन् । ‘भारतको कुन सहरमा सामान अनलोड गर्ने कुनै जानकारी चालकलाई दिइएको थिएन्,’ चालकको भनाई उद्धृत गर्दै एक प्रहरीले भने, ‘पारि रक्सौल पुग्ने बित्तिकै कुनै व्यक्तिले चालकलाई सम्पर्क गर्ने कुरा थियो ।’ नेपालबाट भारततर्फ जाने मालवाहक सवारी होस् वा कुनै खाली भारतीय गाडी भन्सार गेट पार हुनु अगाडिनै भन्सारका कर्मचारी र सशस्त्र प्रहरीको गस्ती टोलीले चेकजाँच गर्ने गरेको छ । वीरगन्ज भन्सारका प्रवक्ता सन्तोष यादवले मरिच लोड भएको उक्त गाडी कसरी भन्सार गेट पार गर्‍यो भन्ने विषयमा छानबिन गर्न समिति बनाएको बताए । ‘समितिले छानबिन गर्दैछ,’ कान्तिपुरसँग उनले फोनमा भने, ‘अहिले नै केही भन्ने अवस्था छैन्, कहाँ कमजोरी भयो त्यो छानबिन पछि थाहा हुन्छ ।’

वीरगन्जबाट रक्सौलमात्र पुर्‍याइदिए तेब्बर बढी मूल्यमा मरिच बिक्री हुने भएकाले व्यापारीले तेस्रो मुलुकबाट मरिच नेपाल भित्र्याई खुल्ला नाकाबाट भारततर्फ पठाउँदै आएका छन् । सम्बद्ध कारोबारीका अनुसार वीरगन्जमा ६ सय रुपैयाँ पर्ने एक किलो मरिचको रक्सौलमा एक हजार देखि एक हजार दुई सय भारतीय रुपैयाँ पर्छ । पछिल्लो १० महिनायता प्रहरीले १८ टन मरिच भारततर्फ तस्करी हुने क्रममा बरामद गरेको छ । मरिच ढुवानी गर्ने एक थान १० चक्के ट्रक, दुइवटा ट्रयाक्टर, एउटा मोटरसाइकलसहित ८ जनालाई नियन्त्रणमा लिएर कारवाहीका लागि सम्बन्धित निकायमा पठाएको छ ।

प्रकाशित : जेष्ठ २२, २०७५ १२:३०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT