बाबुलाई ‘क’ छोरीलाई ‘ख’ खाना

एजेन्सी

इस्लामाबाद — लन्डनबाट स्वदेश फर्केलगत्तै शुक्रबार पक्राउ परेका पाकिस्तानका पूर्वप्रधानमन्त्री नवाज शरिफलाई ‘क’ श्रेणीको कैदीको सुविधा प्रदान गरिएको छ ।

नाम उल्लेख नगर्ने सर्तमा रावलपिन्डीस्थित अडियाला जेलका एक अधिकारीले शरिफकी छोरी मरियमलाई भने ‘ख’ श्रेणीको कैदीको सुविधा दिइएको जनाएका छन् । जेल अधिकारीहरूका अनुसार ‘क’ श्रेणीअन्तर्गत उच्च सरकारी अधिकारीहरूबाहेक पूर्वसंघीय मन्त्री र विगतमा बढी कर तिर्ने गरेकाहरूलाई राख्ने गरिएको छ । ‘क’ श्रेणीअन्तर्गत राखिने कैदीलाई बस्नका लागि २ वटा कोठा दिइन्छ । त्यसमा एसी, ओछ्यान, फ्रिज र टेलिभिजनका साथै भान्सा हुन्छ ।

‘क’ श्रेणीका कैदीले जेलको खानाको सट्टा आफैंले पकाएर पनि खाने सुविधा पाउँछन् । त्यसबाहेक उनीहरूले काम गर्ने २ जना कैदी पनि पाउँछन् । ‘ख’ श्रेणीका कैदीलाई भने एउटा कोठा र काम गर्ने एक कैदी उपलब्ध गराइन्छ । जेल अधिकारीले आवश्यक ठाने काम गर्ने अर्को एक कैदी पनि उपलब्ध गराउँछन् ।

Yamaha

पाकिस्तानको पञ्जाब प्रान्तका बहावलपुर र रावलपिन्डी जिल्लाका जेलमा मात्रै कैदीले ‘क’ श्रेणीको सुविधा पाउने व्यवस्था छ । प्रान्तमा ४२ जिल्ला छन् । ‘ग’ श्रेणीमा हत्या, लुटपाट, चोरी र झैझगडा लगायतका अपराधमा सजाय पाएका कैदीहरूलाई राख्ने गरिन्छ । झैझगडामा संलग्न भए पनि प्रतिष्ठित परिवारका कैदीलाई भने ‘ख’ श्रेणी अन्तर्गतका कारागारमा राखिन्छ । शरिफ र मरियमले अरू कैदीसरह पोसाक लगाउनुपर्ने अधिकारीहरूले जनाएका छन् । नाम उल्लेख नगर्ने सर्तमा एक अधिकारीका अनुसार जेलमा नियमितबाहेक थप सुरक्षा निकायका अधिकारी पनि खटाइएको छ ।

शरिफ र मरियमले चाहेमा कैदीको पोसाक आफैंले पनि बनाउन लगाउन सक्ने जेलका अधिकारीले बताएका छन् । उनीहरूका अनुसार पूर्वप्रधानमन्त्री भएको नाताले शरिफलाई ‘क’ श्रेणी र उनकी छोरी भएकाले मरियमलाई ‘ख’ श्रेणी’ को कैदीका रूपमा राखिएको हो ।

प्रकाशित : असार ३२, २०७५ ०८:२२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

ट्रम्पद्वारा ओबामाको आलोचना

बीबीसी

वासिङ्टन — अमेरिकी राष्ट्रपति डोनाल्ड ट्रम्पले सन् २०१६ मा भएको राष्ट्रपतीय निर्वाचनमा रुसी हस्तक्षेपबारे पूर्वराष्ट्रपति बाराक ओबामाको आलोचना गरेका छन् ।

अमेरिकाको राष्ट्रपतीय चुनावमा हस्तक्षेप गरेको आरोपमा शनिबार १२ रुसी गुप्तचर अधिकारीविरुद्ध अभियोग लगाइएको थियो । उनीहरूमाथि एउटा सफ्टवेयरको प्रयोग गरी डेमोक्रयाटिक पार्टीको राष्ट्रिय समिति अध्यक्षविरुद्ध गुप्तचरी गरेको तथा पार्टीका कम्प्युटर ‘ह्याक’ गरेको आरोप लगाइएको हो । ‘तिनीहरूले यसबारे किन केही गरेनन् ?’ ट्रम्पले यसबारे ओबामालाई पहिले नै जानकारी गराइएको दाबी गर्दै आइबार ट्वीट गरेका छन् । रुसले भने निर्वाचनमा आफूले हस्तक्षेप गरेको आरोप अस्वीकार गर्दै आएको छ ।

रुसी गुप्तचर अधिकारीमाथिको अभियोगपछि ट्रम्पलाई रुसी राष्ट्रपति भ्लादिमिर पुटिनसँग सोमबार फिनल्यान्डको राजधानी हेलसिन्कीमा हुने शिखर वार्ता स्थगित गर्न समेत दबाब परेको बीबीसीले उल्लेख गरेको छ । रुसले उक्त बैठक निर्धारित मितिमै हुनेमा विश्वास लिएको जनाएको छ । रुसी राष्ट्रपतिका सल्लाहकार युरी उसाकोभले भने, ‘दुई देशबीचको सम्बन्ध निकै खराब छ । हामीले त्यसलाई सही दिशामा ल्याउन आवश्यक छ ।’ यद्यपि, अमेरिकाले रुसी गुप्तचरमाथि अभियोग लगाएपछि भने दुई देशबीच आरोप/प्रत्यारोप बढेको छ ।

यसअघि अमेरिकी राष्ट्रपति कार्यालय ह्वाइटहाउसका प्रवक्ता सराह हकाबी स्यान्डर्सले दुई राष्ट्रपतिबीच हुने पूर्वनिर्धारित बैठक प्रभावित नहुने बताएकी थिइन् ।

प्रकाशित : असार ३२, २०७५ ०८:२१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT